នេះបើតាមការបញ្ជាក់ពីសមាជិកសភាកូរ៉េខាងត្បូង ដែលត្រូវបានទីភ្នាក់ងារងារព័ត៌មានរ៉យទ័រសម្ភាសន៍។
មួយសប្តាហ៍បន្ទាប់ពីបងប្អូនកូរ៉េទាំងពីរ ខាងជើងនិងខាងត្បូងបានឈានដល់កិច្ចព្រមព្រៀងលើការផ្សារភ្ជាប់ទំនាក់ទំនងជាមួយគ្នាឡើងវិញ ដោយពង្រឹងចំណងការទូត និងស្តារឡើងវិញនូវខ្សែទូរស័ព្ទទាន់ហេតុការណ៍ ក្រោយពីប្រទេសកូរ៉េបងប្អូនទាំងពីរ បានផ្អាកទំនាក់ទំនងជាផ្លូវការរវាងគ្នាអស់រយៈពេលជាង២ឆ្នាំកន្លះរួចមក នៅថ្ងៃអង្គារសប្ដាហ៍នេះ កូរ៉េខាងជើងបានទាមទារឱ្យមានការបន្ធូរបន្ថយទណ្ឌកម្មលើការនាំចេញលោហធាតុ និង ការនាំចូល មុខទំនិញសំខាន់ៗមួយចំនួន ដូចជា ប្រេងឥន្ធនៈដែលបានចម្រាញ់រួច សម្លៀកបំពាក់ និងទំនិញប្រណិតៗជាដើម។
យ៉ាងណាក៏ដោយចុះ ប្រព័ន្ធផ្សព្វផ្សាយរដ្ឋរបស់កូរ៉េខាងជើងមិនបានបញ្ជាក់ អំពីសំណើថ្មីណាមួយ សម្រាប់ការដកទណ្ឌកម្ម ដើម្បីចាប់ផ្តើមកិច្ចចរចាឡើងវិញជាមួយអាមេរិកនោះទេ។
សូមជម្រាបថា មេដឹកនាំរដ្ឋកូរ៉េខាងជើង លោក គីម ជុងអ៊ុន ធ្លាប់បានប្រកាសប្រាប់ទៅប្រជាជនរបស់ខ្លួនថា កូរ៉េខាងជើង អាចនឹងជួបគ្រោះអត់ឃ្លានដោយសារតែទណ្ឌកម្ម បញ្ហាកង្វះស្បៀងអាហារ និង បញ្ហាវិបត្តិកូវីដ-១៩។ សមាជិកសភាកូរ៉េខាងត្បូងបានលើកឡើងថា ប្រទេសកូរ៉េខាងជើងត្រូវការអង្ករប្រមាណ ១ លានតោន ដោយសារសេដ្ឋកិច្ចរបស់ប្រទេសនេះ ត្រូវបានរងផលប៉ះពាល់ដោយជំងឺរាតត្បាតកូវីដ ១៩ និងបញ្ហាអាកាសធាតុកាលពីឆ្នាំមុន។
អត្ថបទគួរអាន
ធនាគារកណ្តាលរបស់ប្រទេសកូរ៉េខាងត្បូងបាននិយាយកាលពីសប្តាហ៍មុនថា សេដ្ឋកិច្ចរបស់ប្រទេសកូរ៉េខាងជើងក្នុងឆ្នាំ២០២0 បានដាំក្បាលធ្លាក់ចុះយ៉ាងខ្លាំងបំផុតក្នុងរយៈពេល ២៣ឆ្នាំកន្លងមកនេះ ដោយសារកូរ៉េខាងជើងត្រូវបានរងការដាក់ទណ្ឌកម្មពីអង្គការសហប្រជាជាតិ បូករួមទាំងបញ្ហាវិបត្តិកូវីដ១៩ផង។
សូមបញ្ជាក់ថា កូរ៉េខាងជើងបានធ្វើការសាកល្បងអាវុធនុយក្លេអ៊ែរចំនួន ៦លើករួចមកហើយ ចាប់តាំងពីឆ្នាំ ២០០៦ ហើយសមត្ថភាពអាវុធដែលបាញ់សាកល្បងនេះ គឺអាចបាញ់ដល់សហរដ្ឋអាមេរិកផងដែរ។ ជុំវិញបញ្ហាទាំងអស់នេះហើយ ដែលធ្វើឱ្យសហរដ្ឋអាមេរិកតែងតែដាក់ទណ្ឌកម្មជាច្រើនទៅលើកូរ៉េខាងជើង។
ថ្មីៗនេះដែរ សហរដ្ឋអាមេរិកបាននិយាយថា ទំនាក់ទំនងខ្លួនជាមួយកូរ៉េខាងជើងអាចធ្វើឱ្យប្រសើរឡើងវិញបាន លុះត្រាតែកូរ៉េខាងជើង មានការរំសាយចោលនូវកម្មវិធីអាវុធនុយក្លេអ៊ែររបស់ខ្លួន៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
