ក្រសួងពាណិជ្ជកម្មរំពឹងថា ចំណូលនៃការធ្វើពាណិជ្ជកម្មតាមប្រព័ន្ធអេឡិចត្រូនិកនឹងកើនដល់ជិត២ពាន់លានុដល្លារនៅឆ្នាំ២០២៥ ក្រោយមើលឃើញពីសន្ទុះអ្នកប្រើប្រាស់សេវាអ៊ិនធឺណិត ទូរស័ព្ទចល័ត និងបណ្តាញសង្គមមានការកើនឡើង។ ក្នុងនោះ សម្លៀកបំពាក់ គ្រឿងអេឡិចត្រូនិក គ្រឿងសម្អាង និងផលិតផលសុខភាព បច្ចុប្បន្ននេះ គឺសុទ្ធសឹងជាប្រភេទទំនិញ ដែលមានការបញ្ជាទិញ-លក់ច្រើនជាងគេនៅលើពាណិជ្ជកម្មតាមប្រព័ន្ធអេឡិចត្រូនិក។
ព្រឹត្តិបត្រស្ថិតិពាណិជ្ជកម្មរបស់ក្រសួងពាណិជ្ជកម្មប្រចាំឆ្នាំ២០២១ បានបង្ហាញពីទំហំ និងការវាយតម្លៃពីកំណើន នៃការធ្វើពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា ក៏ដូចជាប្រភេទទំនិញ ដែលទទួលបានការទិញលក់ច្រើនជាងគេនាពេលកន្លងមក។ ក្នុងនោះក្រសួងពាណិជ្ជកម្មរំពឹងថា ចំណូលនៃការធ្វើពាណិជ្ជកម្មតាមប្រព័ន្ធអេឡិចត្រូនិកនឹងអាចហក់ដល់ជិត ១ពាន់៨រយលានដុល្លារនៅឆ្នាំ២០២៥ ក្រោយមើលឃើញការធ្វើពាណិជ្ជកម្មតាមរបៀបនេះមានការកើនឡើងជាបន្តបន្ទាប់នៅប៉ុន្មានឆ្នាំចុងក្រោយនេះ។ ជាក់ស្តែងកាលពីឆ្នាំ២០២១ ការធ្វើពាណិជ្ជកម្មតាមប្រព័ន្ធអេឡិចត្រូនិកទទួលបានចំណូលជាង៩៧០លានដុល្លារមានការកើនឡើងជាង១៩% បើធៀបនឹងឆ្នាំ២០២០ ដែលមានជាង៨១៣លានដុល្លារ។
ជាមួយគ្នានេះក្រសួងពាណិជ្ជកម្មបានព្យាករណ៍ថា នៅឆ្នាំ២០២២ ចំណូលបានពីការធ្វើពាណិជ្ជកម្មតាមប្រព័ន្ធអេឡិចត្រូនិកនឹងកើនដល់ជាង១ពាន់១រយលានដុល្លារ, ឆ្នាំ២០២៣នឹងកើនដល់ជិត១ពាន់៣រយលានដុល្លារនិងបន្តហក់ដល់ជាង១ពាន់៥រយលានដុល្លារនៅឆ្នាំ២០២៤ មុនឈានដល់ជិត១ពាន់៨រយលានដុល្លារនៅឆ្នាំ២០២៥។
អត្ថបទគួរអាន
ព្រឹត្តិបត្រខាងលើបានបង្ហាញឲ្យឃើញថា កន្លងមកផលិតផលសម្លៀកបំពាក់មានការបញ្ជាទិញ-លក់ច្រើនជាងគេរហូតដល់ជាង២៦៣លានដុល្លារ បន្ទាប់មកផលិតផលអេឡិចត្រូនិចមានជាង២៥៤លានដុល្លារ, ផលិតផលសុខភាព គ្រឿងសម្អាង និងសម្ភារប្រើប្រាស់មានជាង២៣០លានដុល្លារ។ ចំណែកម្ហូបអាហារ និងភេសជ្ជៈទទួលបានការបញ្ជាទិញ-លក់ជាង១០០លានដុល្លារនិងផលិតផលជាច្រើនផ្សេងទៀត។
ប្រតិបត្តិការបញ្ជាទិញលក់ទាំងនេះធ្វើឡើងតាមកុំព្យូទ័រមានប្រមាណ៥៥% និងតាមថេប្លេក និងទូរស័ព្ទជាង ៤៥%។ បើតាមស្ថិតិរបស់ក្រសួងពាណិជ្ជកម្ម កាលពីឆ្នាំ២០២១ អ្នកប្រើប្រាស់សេវាអ៊ិនធឺណិតនៅកម្ពុជាមានចំនួនជាង១៣លាននាក់ អ្នកប្រើប្រាស់បណ្តាញសង្គមមាន១២លាននាក់ និងទូរស័ព្ទចល័តជាង ២២លានគ្រឿងត្រូវបានប្រើប្រាស់។
ពាក់ព័ន្ធការធ្វើពាណិជ្ជកម្មតាមប្រព័ន្ធអេឡិចត្រូនិកនេះដែរ លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជាមើលឃើញថា ការធ្វើពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា មានសកម្មភាពផុសផុលច្រើននៅមួយរយៈចុងក្រោយ តែមិនទាន់មានការរីកចម្រើនគួរឲ្យកត់សម្គាល់នោះទេ។ ពោលគឺការធ្វើពាណិជ្ជកម្មតាមរបៀបនេះនៅកម្ពុជា ភាគច្រើនធ្វើឡើងតែក្នុងក្របខណ្ឌក្នុងស្រុក និងក្នុងទ្រង់ទ្រាយតូចៗប៉ុណ្ណោះ។ អ្នកជំនាញរូបនេះអះអាងថា កត្តាដែលធ្វើឲ្យការធ្វើពាណិជ្ជកម្មតាមអនឡាញនៅកម្ពុជាមិនទាន់មានការរីកចម្រើនខ្លាំងរួមមានកត្តាចំណេះដឹង ការលក់បន្លំគុណភាព និងតម្លៃ និងបញ្ហាដឹកជញ្ជូនជាដើម។
អ្នកជំនាញកត់សម្គាលឃើញថា ការបញ្ជាទិញ និងលក់ទំនិញតាមប្រព័ន្ធអេឡិចត្រូនិកនៅកម្ពុជាមានការរីកចម្រើនគួរឲ្យកត់សម្គាល់នៅប៉ុន្មានឆ្នាំចុងក្រោយនេះ ជាពិសេសក្នុងអំឡុងពេលកម្ពុជាមានការបិទខ្ទប់តំបន់មួយចំនួនដោយសារការឆ្លងរាតត្បាតនៃជំងឺកូវីដ-១៩ កាលពីអំឡុងឆ្នាំ២០២០ និង២០២១។ បច្ចុប្បន្នការធ្វើពាណិជ្ជកម្មតាមអនឡាញនៅកម្ពុជាមានការរីកចម្រើន និងមានការពេញនិយមយ៉ាងខ្លាំងពីមហាជន ពិសេសស្រទាប់យុវជនតែម្តង៕
