ទោះយ៉ាងណា ប្រធានសមាគមវារីវប្បករកម្ពុជា រំពឹងថា ក្រសួងកសិកម្ម និងខាងភាគីចិន នឹងពន្លឿននីតិវិធីក្នុងការការនាំចេញត្រីប្រាពីកម្ពុជាទៅចិនឲ្យបានឆាប់ ដើម្បីជួយលើកកម្ពស់ទីផ្សារត្រីកម្ពុជាឲ្យមានភាពប្រសើរឡើងវិញ។
លោក សុខ រ៉ាដែន ប្រធានសមាគមវារីវប្បករកម្ពុជា បានបញ្ជាក់ប្រាប់សារព័ត៌មានខេមបូណូមីសថា ប្រជាពលរដ្ឋដែលប្រកបបរបរចិញ្ចឹមត្រីនៅពេលបច្ចុប្បន្នមានការថយចុះជាងមុនគួរឲ្យកត់សម្គាល់។ ការចិញ្ចឹមថយចុះ ក៏ដោយសារតែពួកគាត់ខ្លះមិនអាចប្រកបរបរនេះតទៅទៀតបាន ដោយសារតែការចំណាយថ្លៃដើមលើការចិញ្ចឹមពិសេសចំណីត្រីមានតម្លៃកាន់តែខ្ពស់ទៅៗ ហើយត្រីក៏មិនសូវមានទីផ្សារ និងតម្លៃទាប ដែលធ្វើឲ្យពួកគាត់ពុំសូវទទួលបានផលចំណេញច្រើន និងអាចនឹងឈានដល់ការខាតផងដែរ។ ម្យ៉ាងវិញទៀត ដោយសារតែមានការនាំចូលត្រីច្រើនពីប្រទេសក្រៅផង ក៏បានធ្វើឲ្យអ្នកចិញ្ចឹមត្រីក្នុងស្រុកជួបបញ្ហាប្រឈមកាន់តែខ្លាំងផងដែរ។
លោក ង៉ោ ហុកឃាង អ្នកប្រកបរបរចិញ្ចឹមត្រីប្រា នៅឃុំកោះចិន
ស្រុកពញ្ញាឮ ខេត្តកណ្តាល បានបញ្ជាក់ប្រាប់ផងដែរថា
លោកមិនរំពឹងទទួលបានការចំណេញនោះទេ ក្នុងការចិញ្ចឹមត្រីក្នុងឆ្នាំនេះ
លោកបានលើកឡើងបន្ថែមដែរថា
ការប្រកបរបរចិញ្ចឹមត្រីក្នុងពេលបច្ចុប្បន្នត្រូវចំណាយដើមទុនច្រើន
ចំណីត្រីនិងវត្ថុធាតុដើមមានតម្លៃថ្លៃ ហើយទិន្នផលទទួលបាន
និងលក់ចេញទៅលើទីផ្សារមានតម្លៃទាប ដែលមិនសមាមាត្រគ្នានឹងការចំណាយថ្លៃដើមនោះឡើយ។
លោក ង៉ោ ហុកឃាង បន្ថែមថា កាលពីមុនលោកទិញចំណីត្រី (កន្ទួក)
តម្លៃត្រឹមតែជាង ៩រយរៀលក្នុងមួយគីឡូក្រាមប៉ុណ្ណោះ
តែបច្ចុប្បន្នមានការកើនឡើងរហូតដល់ជាង
១ពាន់៣រយរៀលក្នុងមួយគីឡូក្រាមឯណោះ។
អត្ថបទគួរអាន
ក្រៅពីកន្ទួកលោកក៏ប្រីប្រាស់ត្រីនុយ ឬកូនត្រីល្អិតៗតូចៗសម្រាប់ធ្វើជាចំណីត្រីផងដែរ ដែលមានតម្លៃរហូតដល់១ពាន់៣រយរៀលក្នុងមួយគីឡូក្រាម។ អ្នកចិញ្ចឹមត្រីនៅឃុំកោះចិនរូបនេះ លើកឡើងថា ស្របពេលចំណីត្រីឡើងថ្លៃ បច្ចុប្បន្នត្រីប្រារបស់លោកអាចលក់បានក្នុងតម្លៃ ៤៥០០រៀលក្នុងមួយគីឡូក្រាមប៉ុណ្ណោះ។
ដោយឡែក លោក ងួន ឈុន អ្នកប្រកបរបរចិញ្ចឹមត្រី នៅសង្កាត់សំរោង ខណ្ឌព្រែកព្នៅ រាជធានីភ្នំពេញ បានឲ្យដឹងថាដែរក្នុងឆ្នាំ ២០២២ នេះ បញ្ហាចំណីត្រីនៅមួយរយៈចុងក្រោយនេះ គឺបន្ដឡើងថ្លៃកាន់តែខ្ពស់ទៅ ដែលកំពុងចោទជាបញ្ហាដល់ការចិញ្ចឹមត្រីរបស់លោកកាន់តែខ្លាំងដែរ។ អ្នកចិញ្ចឹងមត្រីនៅខណ្ឌព្រែកព្នៅរូបនេះ អះអាងថា បច្ចុប្បន្នត្រីរបស់លោកលក់បានក្នុងតម្លៃ ៤៧០០ រៀលក្នុងមួយគីឡូក្រាម ចំពោះត្រីប្រា និង ៦៨០០ រៀលក្នុងមួយគីឡូក្រាមចំពោះត្រីពោរ។
គួរបញ្ជាក់ថា កន្លងមកខាងភាគីចិនបានមកសិក្សាអំពីនីតិវិធីក្នុងការនាំចេញត្រីប្រាពីកម្ពុជាទៅប្រទេសចិន ហើយអ្នកចិញ្ចឹមត្រីទាំងអស់បានបំពេញលក្ខខ័ណ្ឌ ការអនុវត្តន៍កសិកម្មល្អ (GAP) ទៅកាន់ភាគីប្រទេសចិនរួចរាល់ហើយ ខណៈដែលពេលនេះភាគីប្រទេសចិនកំពុងបន្ដដំណើរការចចាជាមួយក្រសួងកសិកម្ម។ លោក សុខ រ៉ាដែន ប្រធានសមាគមវារីវប្បករកម្ពុជា សង្ឃឹមថា ខាងភាគីចិន និងក្រសួងកសិកម្មកម្ពុជា នឹងពន្លឿនការងារនាំចេញត្រីប្រានេះ ឲ្យបានឆាប់ ដើម្បីជួយជំរុញទីផ្សារត្រីរបស់កម្ពុជា ដែលកំពុងជួបការលំបាក៕
អត្ថបទ សោម ស្រីពេជ្រ
None
