លោក ឡែមផូរ សុថាវរិទ្ធិ ប្រធានគណៈកម្មការប្រតិបត្តិនៃសមាគមវារីវប្បករកម្ពុជា បានគូសបញ្ជាក់ថា ភាគច្រើនត្រីនៅក្នុងស្រះត្រូវបានកសិករលក់ចេញអស់តាំងពីខែមីនា មកម្ល៉េះ ហើយនៅក្នុងខែមេសា និងខែឧសភា នេះ ក៏ពុំមានត្រីនៅក្នុងស្រះច្រើននោះដែរ។ បើតាមអ្នកជំនាញរូបនេះ មកទល់ពេលនេះ សមាគមពុំទាន់ឃើញមានរបាយការណ៍ណាមួយបង្ហាញពីបញ្ហាត្រីងាប់ ដោយសារតែអាកាសធាតុឡើងកម្តៅខ្លាំងនៅឡើយទេ។ យ៉ាងណាក៏ដោយបញ្ហាអាកាសធាតុឡើងកម្តៅខ្លាំងនេះធ្វើឱ្យលោក ឡែមផូរ សុថាវរិទ្ធិ បារម្ភថា អាចនឹងធ្វើឱ្យការដាក់កូនត្រីចិញ្ចឹមត្រូវបានអូសបន្លាយពេល ដោយសារតែបច្ចុប្បន្ននៅក្នុងស្រះពុំមានទឹកគ្រប់គ្រាន់នោះឡើយ។
មន្ត្រីជាន់ខ្ពស់រូបនេះជឿជាក់ថា ការពន្យារពេលដាក់កូនត្រីចិញ្ចឹមនេះ ចង់ ឬមិនចង់វានឹងធ្វើឱ្យការប្រមូលផលត្រីនៅឆ្នាំនេះមានភាពយឺតយ៉ាវទៅតាមនឹងដែរ តែយ៉ាងណា លោក ពុំទាន់អាចព្យាករបាននៅឡើយទេ ខណៈបញ្ហានេះក៏បានកើតមានឡើងនៅបណ្ដាប្រទេសជិតខាងកម្ពុជាផងដែរ។ តែយ៉ាងណា កម្ពុជាមានត្រីទន្លេ ដែលអាចផ្គត់ផ្គង់ជីវភាពដល់ពលរដ្ឋនៅអំឡុងខែកញ្ញា ដល់ខែវិច្ឆិកា ខាងមុខ។
ពាក់ព័ន្ធនឹងអាកាសធាតុក្ដៅនេះ នៅក្នុងប្រទេសវៀតណាម មានត្រីរាប់សែនក្បាលបានងាប់នៅក្នុងអាងស្តុកទឹកមួយកន្លែងស្ថិតក្នុងខេត្ត Dong Nai ភាគខាងត្បូងប្រទេសវៀតណាម។ បើតាមសេចក្ដីរាយការណ៍បានឱ្យដឹងថា នៅក្នុងតំបន់ដែលមានត្រីងាប់នេះ មិនមានភ្លៀងធ្លាក់អស់រយៈពេលជាច្រើនសប្តាហ៍មកហើយ ហើយទឹកនៅក្នុងអាងមានកម្រិតទាបពេកជាហេតុធ្វើឱ្យត្រីក្នុងទឹកមិនអាចរស់បាន៕
អត្ថបទ៖ បូ ដូឡា
