ការបោះទុនវិនិយោគយ៉ាងច្រើនសន្ធឹកសន្ធាប់របស់ក្រុមហ៊ុន Ford គឺដើរទៅតាមផែនការចំណាយ ៣០ពាន់លានដុល្លារអាមេរិក រហូតដល់ឆ្នាំ ២០៣០ ដើម្បីបង្កើតរថយន្តអគ្គិសនី ហើយក្រុមហ៊ុន Ford បង្ហាញពីក្តីរំពឹងខ្ពស់ ដោយដំឡើងការព្យាករអំពី ការចាប់យកចំណែកទីផ្សាររថយន្តអគ្គិសនីនៅលើសកលលោក ពី ៤០% ទៅ ៥០% ត្រឹមឆ្នាំ ២០៣០។
តាមរយៈគម្រោងវិនិយោគនេះ ក្រុមហ៊ុននឹងបង្កើតការងារជាង ១ម៉ឺនកន្លែង ដោយបើកដំណើរការរោងចក្រដំឡើងរថយន្តអគ្គិសនី ១កន្លែង និងរោងចក្រផលិតអាគុយរថយន្ត ៣កន្លែង នៅក្នុងរដ្ឋចំនួន ២ផ្សេងគា្នក្នុងសហរដ្ឋអាមេរិក ដែលគ្រោងនឹងបើកដំណើរការក្នុងឆ្នាំ ២០២៥ខាងមុខ។
សេចក្តីប្រកាសអំពីការវិនិយោគនេះ ក៏ជាការវិនិយោគតែមួយលើផលិតកម្មដ៏ធំបំផុត នៅក្នុងប្រវត្តិសាស្ត្រជាង ១១៨ឆ្នាំរបស់ក្រុមហ៊ុន Ford។
លោកស្រី Lisa Drake ប្រធានផ្នែកប្រតិបត្តិការនៃក្រុមហ៊ុន Ford ប្រចាំប៉ែកខាងជើងអាមេរិក បានប្រាប់ដល់សារព័ត៌មាន Reuters ថា វាជាចំណុចផ្លាស់ប្តូរយ៉ាងខ្លាំង ដែលក្រុមហ៊ុនបានបោះទុនយ៉ាងច្រើន ដើម្បីប្រែក្លាយទៅជា ការផលិតរថយន្តអគ្គិសនី។
ក្រុមហ៊ុន Ford ដែលជាប់លំដាប់ថ្នាក់លេខ ២ នៅសហរដ្ឋអាមេរិក បានបោះទុនប្រមាណ ៧ពាន់លានដុល្លារអាមេរិក ហើយក្រៅពីនោះ ក្រុមហ៊ុន SK Innovation របស់កូរ៉េខាងត្បូង ជាអ្នកបង្គ្រប់។ ក្នុងនោះទឹកប្រាក់ជាង ៥ពាន់ ៨រយលានដុល្លារអាមេរិក នឹងវិនិយោគនៅក្នុងរដ្ឋ ឃិនទូគី (Kentucky) ហើយ ៥ពាន់ ៦រយលានដុល្លារអាមេរិកទៀត នឹងវិនិយោគនៅក្នុងរដ្ឋតេណេសស៊ី (Tennessee)។
អត្ថបទគួរអាន
ចំពោះក្រុមហ៊ុន SK ដែលផ្គត់ផ្គង់អាគុយរថយន្តអគ្គិសនីឲ្យក្រុមហ៊ុន Ford Motor និងក្រុមហ៊ុន Hyundai Motor គឺមានរោងចក្រផលិតកម្មនៅក្នុងសហរដ្ឋអាមេរិក ប្រទេសហុងគ្រី ប្រទេសឈីលី និងប្រទេសកូរ៉េខាងត្បូង។
បន្ថែមរោងចក្រចំនួន ៣ទៀតខាងលើ និង ២ទៀតនៅក្នុងរដ្ឋ Geogia ក្រុមហ៊ុន SK នឹងមានសមត្ថភាពផលិតអាគុយរថយន្ដអគ្គិសនីដល់ទៅ ១៥០ ជីហ្គាវ៉ាត់ម៉ោងក្នុងមួយឆ្នាំ នៅក្នុងសហរដ្ឋអាមេរិក។
បច្ចុប្បន្ន ក្រុមហ៊ុន SK មានសមត្ថភាពផលិត ៤០ ជីហ្គាវ៉ាត់ម៉ោងក្នុងមួយឆ្នាំ ហើយក្រុមហ៊ុនរំពឹងថា នឹងអាចសម្រេចគោលដៅ ២០០ ជីហ្គាវ៉ាត់ម៉ោងក្នុងមួយឆ្នាំ ត្រឹមឆ្នាំ ២០២៥ខាងមុខ។
ក្រុមហ៊ុន Ford មានផែនការដាក់លក់នូវ រថយន្តអគ្គិសនីប្រភេទ F-150 Pickup នៅត្រីមាសទី ១ ឆ្នាំ ២០២២ខាងមុខនេះ ដែលជាយុទ្ធសាស្ត្រខ្លាំងក្លា ក្រោមការដឹកនាំថ្មីរបស់ នាយកប្រតិបត្តិលោក Jim Farley ដែលចូលកាន់តំណែងកាលពីខែតុលា ឆ្នាំ ២០២០៕
អត្ថបទ៖ វណ្ណ វុឌ្ឍវិវឌ្ឍន៍
None
