ក្រុមហ៊ុនប្រតិបត្តិករល្បែងអនឡាញបរទេសនៅប្រទេសហ្វីលីពីន បានទទួលអាជ្ញាបណ្ណពីក្រុមហ៊ុនកាស៊ីណូរបស់រដ្ឋ PAGCOR ចាប់តាំងពីឆ្នាំ២០១៦ ក្នុងអំឡុងពេលហ្វីលីពីន ស្ថិតនៅក្រោមការដឹកនាំរបស់ប្រធានាធិបតី លោក រ៉ូឌ្រីហ្គោ ឌូធឺតេ (Rodrigo Duterte)។ តាមរយៈក្រុមហ៊ុនល្បែងអនឡាញនេះ វាក៏បានស្រូបទាញអតិថិជនជាជនជាតិចិន និងពលករបរទេសជាច្រើនឱ្យចូលមកប្រទេសនេះផងដែរ។
ស្របពេលល្បែងអនឡាញបានជួយជំរុញសកម្មភាពសេដ្ឋកិច្ច និងនាំយករូបិយប័ណ្ណបរទេសចូលទៅក្នុងប្រទេសហ្វីលីពីន គេក៏មានការព្រួយបារម្ភដែរថា ប្រតិបត្តិករកាស៊ីណូនេះអាចជាច្រកមួយក្នុងការរួមចំណែកដល់ការលាងលុយកខ្វក់ ការជួញដូរគ្រឿងញៀន និងការជួញដូរមនុស្សផងដែរ។ កត្តានេះបានជំរុញឱ្យសមាជិកសភាចាប់ផ្តើមអំពាវនាវឱ្យមានការហាមឃាត់លើឧស្សាហកម្មប្រភេទនេះ។
ក្រោយមកប្រធានាធិបតីហ្វីលីពីន លោក ហ្វឺឌីណាន់ ម៉ាកូស ជូនៀ (Ferdinand Marcos Jr) ក៏បានប្រកាសកាលពីខែកក្កដា ឆ្នាំនេះ ដោយសម្រេចហាមឃាត់មិនឱ្យបើក ឬលេងល្បែងស៊ីសងតាមប្រព័ន្ធអនឡាញនៅត្រឹមដំណាច់ឆ្នាំនេះ ដោយចាត់ទុកឧស្សាហកម្មល្បែងអនឡាញនេះជាសកម្មភាពឧក្រិដ្ឋកម្ម ក្រោយមហាជនរិះគន់រដ្ឋាភិបាលរបស់លោកកាន់តែខ្លាំងឡើង។
ការិយាល័យអន្តោប្រវេសន៍ហ្វីលីពីន បានប្រាប់បុគ្គលិកបរទេស ដែលរងផលប៉ះពាល់ការងារដោយសារការបិទល្បែងអនឡាញនេះ ឱ្យចាកចេញពីប្រទេសនេះ ហើយបើតាមតួលេខដែលបានប្រកាសកាលពីថ្ងៃទី១៨ ខែធ្នូ ពលករបរទេសប្រមាណ២៤,០០០នាក់ បានចាកចេញពីប្រទេសនេះ។
ការសម្រេចចិត្តរបស់លោក ម៉ាកូស ក្នុងការហាមប្រាមកាស៊ីណូអនឡាញនេះ ក៏មានអត្ថន័យនយោបាយផងដែរ ដោយបានបង្ហាញពីគោលជំហរប្រឆាំងនឹងលោក ឌូធឺតេ ដែលជាអ្នកបន្ធូរបន្ថយបទប្បញ្ញត្តិល្បែងស៊ីសងបរទេសពាក់ព័ន្ធនឹងប្រទេសចិន៕
អត្ថបទ៖ សុខ មង្គល
