ថៃ ជួយឡាវ សាងសង់ផ្លូវមួយខ្សែតម្លៃជាង១៣២លានដុល្លារ ដើម្បីភ្ជាប់ពាណិជ្ជកម្មចំនួន៤ប្រទេស
ដើម្បីលើកកម្ពស់ប្រសិទ្ធភាព និងបង្កភាពងាយស្រួល ក៏ដូចជាសម្រួលដល់ការធ្វើពាណិជ្ជកម្មឆ្លងព្រំដែន ថៃ បានផ្តល់កម្ចីក្នុងអត្រាការប្រាក់ទាបដល់ប្រទេសឡាវ…
ថ្លែងក្នុងបទសម្ភាសជាមួយសារព័ត៌មាន នីកេអេស៊ា នៅខាងក្រៅវេទិកាអនាគតអាស៊ី នៅទីក្រុងតូក្យូ កាលពីសប្តាហ៍មុន លោក ម៉ាហាធៀ ម៉ូហាម៉េត អតីតនាយករដ្ឋមន្ត្រីម៉ាឡេស៊ីរូបនេះបាននិយាយថា ប្រទេសម៉ាឡេស៊ី គួរតែមានពាណិជ្ជកម្មឱ្យកាន់តែធំជាមួយនឹងប្រទេសចិន និងឥណ្ឌា ដើម្បីជំនួសការបាត់បង់ពាណិជ្ជកម្មជាមួយនឹងសហរដ្ឋអាម៉េរិក។ លោក ម៉ាហាធៀ បានពន្យល់ថា បណ្តាប្រទេសនៅអាស៊ាន មានទំនាក់ទំនងល្អជាមួយចិន ព្រោះចិន ជាទីផ្សារដ៏ធំមួយសម្រាប់បណ្ដាប្រទេសអាស៊ីអាគ្នេយ៍។
អតីតនាយករដ្ឋមន្ត្រីម៉ាឡេស៊ី រូបនេះ បានអះអាងថា ការធ្វើពាណិជ្ជកម្មរបស់អាស៊ាន ជាមួយចិន មានទំហំធំជាងទំហំពាណិជ្ជកម្មជាមួយសហរដ្ឋអាមេរិក ហើយអាស៊ាន ក៏មានឱកាសដើម្បីកសាងពាណិជ្ជកម្មជាមួយនឹងប្រទេសឥណ្ឌា ដែលមានប្រជាជនច្រើនជាងគេលើពិភពលោកបន្ថែមទៀតផងដែរ។ នៅក្នុងវេទិកាអនាគតអាស៊ី លោក ម៉ាហាធៀ មានជំនឿថា ចិននឹងអាចយកឈ្នះសហរដ្ឋអាម៉េរិក ក្លាយជាប្រទេសលេចធ្លោបំផុតនៅក្នុងពិភពលោក។
អាស៊ាន បានខិតចូលកាន់តែជិតនឹងប្រទេសចិន និងតំបន់ផ្សេងទៀតដូចជា តំបន់ឈូងសមុទ្រពែក្សជាដើម ដោយភាគីទាំង៣ បានរៀបចំកិច្ចប្រជុំកំពូលត្រីភាគីរវាងអាស៊ាន-ចិន-ក្រុមប្រឹក្សាសហប្រតិបត្តិការឈូងសមុទ្រពែក្ស (GCC) កាលពីខែមុននៅក្នុងទីក្រុងកូឡាឡាំពួ ប្រទេសម៉ាឡេស៊ី។
បើតាមទិន្នន័យពីបណ្ដារដ្ឋអាស៊ាន ទំនាក់ទំនងត្រីភាគីនេះ បានពង្រឹងរវាងតំបន់អាស៊ីអាគ្នេយ៍ និងរដ្ឋឈូងសមុទ្រពែក្ស ដោយពាណិជ្ជកម្មរបស់អាស៊ាន ជាមួយនឹងប្រទេសចិន និងក្រុមប្រឹក្សាសហប្រតិបត្តិការឈូងសមុទ្រពែក្ស បានកើនឡើងលើសពី៩០០ពាន់លានដុល្លារ កាលពីឆ្នាំមុន ដែលមានទំហំធំជាងជិតទ្វេដងនៃទំហំពាណិជ្ជកម្មចំនួន៤៥៣ពាន់លានដុល្លាររវាងប្លុកនេះជាមួយនឹងសហរដ្ឋអាម៉េរិក៕
ដោយ៖ សុខ មង្គល
