ធនាគារជាតិនៃកម្ពុជា គ្រោងចាប់ដៃជាមួយធនាគារកណ្តាលឥណ្ឌូណេស៊ី ដើម្បីជំរុញការអភិវឌ្ឍន៍វិស័យធនាគារ និងការទូទាត់
ថ្នាក់ដឹកនាំធនាគារជាតិនៃកម្ពុជាបានអះអាងថា ធនាគារជាតិនៃកម្ពុជា និងធនាគារកណ្តាលឥណ្ឌូណេស៊ី នឹងគ្រោងចុះអនុស្សរណៈយោគយល់គ្នាទ្វេភាគីនៅក្នុងឆ្…
តើស្ថាបនិករបស់ក្រុមហ៊ុន BYD ជានរណា?
លោកវ៉ាង ចានហ្វូ ត្រូវបានគេស្គាល់ថា គឺជាស្ថាបនិករបស់ក្រុមហ៊ុនយក្ស BYD និងស្ថិតក្នុងចំណោមកំពូលមហាសេដ្ឋីគ្រាក់ៗរបស់ចិនផងដែរ។ ស្ថិតក្នុងវ័យ ៥៨ បច្ចុប្បន្ន លោក វ៉ាង មានទ្រព្យសម្បត្តិសរុបប្រហែល ១៥ពាន់លានដុល្លារអាមេរិក។ ប៉ុន្ដែ ទម្រាំអាចរកឃើញភាពជោគជ័យដ៏ធំធេងនេះបាន ខ្សែជីវិតរបស់មហាសេដ្ឋីចិនរូបនេះ មានប្រវត្តិជូរចត់ស្ទើរតែមិនគួរឲ្យជឿ។
កើតនៅឆ្នាំ១៩៦៦ លោកវ៉ាង គឺជាអតីតក្មេងកំព្រា ដែលមកពីគ្រួសារដ៏ក្រីក្របំផុតមួយ នៅក្នុងតំបន់ដាច់ស្រយាល នៃខេត្តអានហ៊ួយ (Anhui) ប្រទេសចិន។ ក្រោយពីឪពុកម្ដាយរបស់លោកចែកឋានទៅ លោកត្រូវបានរស់នៅជាមួយបងប្អូនបង្កើតយ៉ាងលំបាកវេទនា។ ប៉ុន្ដែ តាំងពីតូចមក លោកមិនដែលបោះបង់ការតស៊ូ និងការសិក្សានោះឡើយ រហូតទទួលបានអាហារូបករណ៍សិក្សាផ្នែកមុខវិជ្ជាគីមី នៅសាកលវិទ្យាល័យ ខាងត្បូងភាគកណ្ដាល ឬហៅថា Central South University។
ដោយមានការតាំងចិត្ត និងជំនះរាល់ឧបសគ្គលើការរៀនសូត្រ លោកវ៉ាង បានបញ្ចប់ការសិក្សាថ្នាក់បរិញ្ញាផ្នែកបច្ចេកវិទ្យាថ្មអាគុយ ពីវិទ្យាស្ថាន Beijing Non-Ferrous Metal General ដែលបច្ចុប្បន្ន មានឈ្មោះថា គ្រីម គ្រុប (GRINM Group)។ ប៉ុន្មានឆ្នាំក្រោយមក លោកបានចូលបម្រើការនៅក្នុងស្ថាប័នរដ្ឋចិន ក្នុងនាមជាអ្នកស្រាវជ្រាវ ហើយបានផ្លាស់ប្ដូរទីលំនៅមករស់នៅទីក្រុងស៊ិជិនវិញ។ ទីនោះហើយ ជាពេលដែលលោក រួមជាមួយនឹងបងប្អូនជីដូនមួយម្នាក់ទៀត បានចាប់ផ្ដើមបង្កើតក្រុមហ៊ុនផលិតថ្មទូរសព្ទដៃ ដោយបានដាក់ឈ្មោះថា BYD ខណៈពេលនោះ លោកវ៉ាង ទើបតែមានវ័យ ២៩ឆ្នាំប៉ុណ្ណោះ។
លោកធ្លាប់បានអះអាង មែនទែនទៅ ឈ្មោះក្រុមហ៊ុន BYD នេះ ដំបូងឡើយ មិនមានពាក្យពេញផ្លូវការអ្វីទេ ប៉ុន្ដែ ក្រោយមក ក៏ត្រូវបានដាក់ឈ្មោះពេញហៅក្រៅចំនួនពីរ គឺ «Build Your Dream» ឬជាភាសាខ្មែរថា «សាងអនាគតរបស់អ្នក» និងឈ្មោះមួយទៀត គឺ «Build Your Dollars» ឬមានន័យជាភាសាខ្មែរថា «កសាងលុយដុល្លាររបស់អ្នក»។ ការចាប់ផ្ដើមក្រុមហ៊ុនរបស់លោកដំបូង គឺបានចាប់ផ្ដើមឡើង ដោយដើមទុន ៣០ម៉ឺនដុល្លារ ដែលជាលុយរបស់បងប្អូនជីដូនមួយរបស់លោក សម្រាប់ធ្វើជាដើមទុនបង្កើតការិយាល័យ និងសាងសង់រោងចក្រផលិតថ្មទូរសព្ទ។
តាំងពីចាប់ផ្ដើមក្រុមហ៊ុន BYD ដំបូង លោកវ៉ាងមានទស្សនវិស័យមួយ គឺធ្វើយ៉ាងណាផលិតផលិតផលមានគុណភាព ជាមួយការចំណាយតិចបំផុត ហើយគោលដៅនាពេលនោះ គឺប្រកួតប្រជែងជាមួយនឹងផលិតផលរបស់ក្រុមហ៊ុនតូយ៉ូតា, Sanyo និង Sony ជាដើម ពោលគឺធ្វើយ៉ាងឲ្យផលិតផលរបស់ BYD មានតម្លៃទាបជាងម៉ាករបស់ជប៉ុនទាំងនោះ។
រហូតដល់ឆ្នាំ២០០២ BYD បានគ្រប់គ្រងទីផ្សារថ្ម ដែលអាចសាកឡើងវិញបាន ហើយអតិថិជនរបស់ក្រុមហ៊ុននេះ រួមមាន Motorola, Nokia, Sony Ericsson និង Samsung ជាដើម។
ទោះបីជាជោគជ័យលើការផលិតថ្មទូរសព្ទនៅលើទីផ្សារក្ដី ប៉ុន្ដែមហិច្ឆតារបស់លោក វ៉ាង ចានហ្វូ មិនទាន់បញ្ចប់នោះទេ។ នៅប៉ុន្មានឆ្នាំក្រោយមក លោកបានទិញយកក្រុមហ៊ុនផលិតរថយន្ដរបស់រដ្ឋមួយ ឈ្មោះ Tsinchuan Automobile ហើយបានប្ដូរឈ្មោះទៅជា BYD Auto វិញ។ លុះក្រោយមក ក្រុមហ៊ុននេះ បានពង្រីកបុត្រសម្ព័ន្ធរបស់ខ្លួនកាន់តែច្រើន រួមមាន BYD electronics ដែលជាក្រុមហ៊ុនផលិតថ្ម និងគ្រឿងបង្គុំទូរសព្ទជាដើម។
នៅឆ្នាំ ២០០៥ ផលិតផលរថយន្ដ ម៉ាក BYD ក៏បានចាក់កំណើតឡើងជាលើកដំបូង ជាប្រភេទរថយន្ដស៊ីដាន់ (Sedan) ម៉ូដែល F3 ដែលនាពេលនោះ រថយន្ដនេះ មានតម្លៃថោកជាងរថយន្ដកូរ៉ូឡារបស់តូយ៉ូតាទៅទៀត ហើយក៏បានក្លាយជារថយន្ដ ដែលមានការលក់ដាច់បំផុតនៅក្នុងប្រទេសចិន។
ទោះយ៉ាងណា នេះមិនទាន់ជាចំណុចរបត់ធំ របស់ BYD នោះទេ! BYD បានក្លាយជាក្រុមហ៊ុនលំដាប់ពិភពលោក គឺនៅពេលដែលលោក វ៉ាង ចានហ្វូ បានជួបជាមួយកំពូលអ្នកវិនិយោគរបស់អាមេរិក គឺលោក Warren Buffet នៅអំឡុងចុងទសវត្សរ៍ឆ្នាំ២០០០ ជាពេលដែលលោក Buffet តាមចែចូវទិញភាគហ៊ុនរបស់ BYD ម្ដងហើយម្ដងទៀត ក្រោយពីមើលឃើញសក្ដានុពលដ៏ធំធេងរបស់ក្រុមហ៊ុននេះ។
នៅទីបំផុត នៅឆ្នាំ២០០៨ ក្រុមហ៊ុន Berkshire Hathaway របស់មហាសេដ្ឋីអាមេរិក Warren Buffet បានសម្រេចវិនិយោគ ២៣២ លានដុល្លារអាមេរិក នៅក្នុងក្រុមហ៊ុន BYD។ ការលក់ភាគហ៊ុននេះ មិនត្រឹមតែធ្វើឲ្យ BYD ប្រមូលបានដើមទុនដ៏ច្រើនលើសលុបនោះទេ ប៉ុន្ដែ ក៏បានធ្វើឲ្យកេរ្ដិ៍ឈ្មោះរបស់ក្រុមហ៊ុនចិនមួយនេះ ល្បីសុសសាយនៅលើឆាកជំនួញអន្តរជាតិ។ មួយឆ្នាំក្រោយមក ក្រុមហ៊ុន BYD បានក្លាយជាក្រុមហ៊ុនមានតម្លៃដល់ទៅ ជាង ៥ពាន់លានដុល្លារ ហើយបានធ្វើឲ្យលោក វ៉ាង ចានហ្វូ ជាប់ឈ្មោះក្នុងបញ្ជីឈ្មោះកំពូលមហាសេដ្ឋីចិននៅក្នុងទស្សនាវដ្ដី Forbes ជាលើកដំបូងផងដែរ។
គិតមកទល់បច្ចុប្បន្ន BYD បានក្លាយជាក្រុមហ៊ុនផលិតរថយន្ដអគ្គិសនីដ៏ធំបំផុតមួយរបស់ពិភពលោក ដែលមានតម្លៃសរុប ៧៨ពាន់លានដុល្លារ និងជាគូប្រជែងដ៏ស្វិតស្វាញរបស់ក្រុមហ៊ុនអាមេរិក Tesla របស់មហាសេដ្ឋី Elon Musk។ បច្ចុប្បន្ន ក្រុមហ៊ុននេះ មានផែនការពង្រីករោងចក្ររបស់ខ្លួនទៅក្នុងទីផ្សារអឺរ៉ុប ដោយរំពឹងថា នឹងអាចដណ្ដើមបានទីផ្សារ ១០% នៅក្នុងចំណែកទីផ្សាររថយន្ដអគ្គិសនីសកលលោក៕
ប្រភព៖ Business Insider
None
