IMF ព្យាករថា កម្ពុជាជាប្រទេសដែលមានកំណើនសេដ្ឋកិច្ច និងទុនវិនិយោគផ្ទាល់ពីបរទេសខ្ពស់ជាងគេក្នុងឆ្នាំ២០២៤

ការរំពឹងមានកំណើនខ្ពស់ផ្នែកវិនិយោគរហូតដល់៣៩៣% របស់កម្ពុជា ត្រូវបាន IMF អះអាងថា គឺដោយសារកម្ពុជា បានពង្រឹងទំនាក់ទំនងពាណិជ្ជកម្មរបស់ខ្លួនជាមួយប្រទេសចិន កូរ៉េខាងត្បូង និងសហភាពអឺរ៉ុប។

កម្ពុជា បានឈរកំពូលតារាងក្នុងបញ្ជីឈ្មោះប្រទេសដែលមានសេដ្ឋកិច្ចរីកចម្រើនឆាប់រហ័សទាំង១០របស់មូលនិធិរូបិយវត្ថុអន្តរជាតិ ប្រចាំឆ្នាំ២០២៤។ ក្នុងនោះ IMF បានព្យាករថា កម្ពុជានឹងសម្រេចបានកំណើនសេដ្ឋកិច្ចនាំមុខគេក្នុងរង្វង់៦,១% ពីមូលដ្ឋានកំណើនសេដ្ឋកិច្ច៥,៦% ក្នុងឆ្នាំ២០២៣ និងមានកំណើនលំហូរទុនវិនិយោគផ្ទាល់ពីបរទេស(FDI)ខ្ពស់ជាងគេរហូតដល់៣៩៣% ដែលតាមពីក្រោយដោយហ្វីលីពីន ដោយរំពឹងសម្រេចបានកំណើនសេដ្ឋកិច្ច៥,៩%, កេនយ៉ា៥,៣% និងអ៊ីរ៉ាក់២,៩%។

តាមរយៈលទ្ធផលកំណើននេះ បានបង្ហាញឱ្យឃើញថា កម្ពុជាជាប្រទេសដែលមានសេដ្ឋកិច្ចលូតលាស់លឿនបំផុតនៅក្នុងតំបន់អាស៊ីអាគ្នេយ៍។ ភាពរីកចម្រើននៃសេដ្ឋកិច្ចរបស់កម្ពុជា ត្រូវបានស្ថាប័ន IMF វាយតម្លៃថា គឺដោយសារកម្ពុជា បានពង្រឹងទំនាក់ទំនងពាណិជ្ជកម្មជាមួយចិន កូរ៉េខាងត្បូង និងសហភាពអឺរ៉ុប។

លោក ង៉ែត ជូ ប្រធានក្រុមប្រឹក្សាភិបាល F.I Vision Capital និងជាអ្នកជំនាញហិរញ្ញវត្ថុ បានចាត់ទុកការព្យាកររបស់មូលនិធិរូបិយវត្ថុអន្តរជាតិ IMF ថា ប្រសិនបើកម្ពុជាអាចសម្រេចបានដូចអ្វីដែល IMF ព្យាករនេះមែន នោះលោកជឿជាក់ថា សេដ្ឋកិច្ចរបស់កម្ពុជានឹងមានភាពប្រសើរឡើងចាប់ពីឆ្នាំ២០២៥ តទៅ។

ជាមួយគ្នានេះ លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច និងជាប្រធានវិទ្យាស្ថានសិក្សាចិន នៃរាជបណ្ឌិត្យសភាកម្ពុជាយល់ឃើញថា តាមការគណនា និងការប៉ាន់ស្មាន គឺសេដ្ឋកិច្ចរបស់កម្ពុជានឹងមានកំណើនជាបន្តបន្ទាប់ ខណៈកំណើនខ្លះ ក៏មានការប្រែប្រួលទៅតាមវិស័យនីមួយៗដែរ។ បើតាមអ្នកជំនាញសេដ្ឋកិច្ចរូបនេះ នៅពេលណាដែលសេដ្ឋកិច្ចមានវិបត្តិ គឺការលក់រាយមិនទាន់មានបញ្ហាវិបត្តិភា្លមៗនោះទេ ប៉ុន្តែវានឹងកើតមានឡើងនៅពេលក្រោយ។ ទន្ទឹមនេះ នៅពេលណាដែលសេដ្ឋកិច្ចងើបឡើងមកវិញ ក៏វិស័យលក់រាយមិនទាន់ងើបឡើងមកវិញភ្លាមៗនោះដែរ ដែលទាំងនេះ គឺជាមូលហេតុដែលពលរដ្ឋមួយចំនួនពុំទាន់អាចរកចំណូលបានដូចពីមុន។

​គួរបញ្ជាក់ថា ក្រុមប្រទេសដែលមានសេដ្ឋកិច្ចរីកចម្រើនឆាប់រហ័សកំពូលទាំង១០ប្រចាំឆ្នាំ២០២៤ រួមមានកម្ពុជា ហ្វីលីពីន កេនយ៉ា អ៊ីរ៉ាក់ ណាមីប៊ី កាហ្សាក់ស្ថាន អាហ្ស៊ែរបៃហ្សង់ ម៉ារ៉ុក ស៊ែរប៊ី និងឥណ្ឌា។ បើតាមទិន្ន័យរបស់ IMF ការរីកចម្រើនផ្នែកវិនិយោគខ្លាំងបំផុតរបស់កម្ពុជានាឆ្នាំនេះ ក៏ដោយសារតែកម្ពុជា ទទួលបានអត្ថប្រយោជន៍ពីការស្ទុះងើបឡើងវិញនៃវិស័យទេសចរណ៍ ចាប់តាំងពីប្រទេសចិនបានចាប់ផ្តើមលុបចោលការរឹតបន្តឹងការធ្វើដំណើរទាក់ទងនឹងជំងឺកូវីដ-១៩ កាលពីដើមឆ្នាំ២០២៣៕

អត្ថបទ៖ បូ ដូឡា​