ថ្លែងក្នុងបទសម្ភាស ជាមួយទូរទស្សន៍ TF1 កាលពីថ្ងៃអង្គារ ប្រធានាធិបតីបារាំង លោក ម៉ាក្រុង បានគំរាមរុស្ស៊ីថា ប្រសិនបើទីក្រុងមូស្គូ មិនយល់ព្រមលើបទឈប់បាញ់នៅប្រទេសអ៊ុយក្រែន លោកនឹងការដាក់ទណ្ឌកម្មថ្មីៗបន្ថែមទៀតលើរុស្ស៊ី នៅប៉ុន្មានថ្ងៃខាងមុខនេះ ដោយផ្ដោតសំខាន់លើសេវាកម្មហិរញ្ញវត្ថុ ប្រេង និងឧស្ម័នតាមដែលអាចធ្វើទៅបាន។
ការគំរាមរបស់លោក ម៉ាក្រុង នេះក៏ត្រូវបានបន្ទរតាមដោយអធិការបតីអាល្លឺម៉ង់ថ្មីលោក ហ្រ្វ៊ីឌ្រិច មែស (Friedrich Merz) ផងដែរថា សម្ពន្ធមិត្តអ៊ឺរ៉ុបនឹងដាក់ចេញការរឹតបន្តឹងយ៉ាងខ្លាំងលើប្រទេសរុស្ស៊ី ប្រសិនបើប្រធានាធិបតីរុស្ស៊ីលោក វ្ល៉ាឌីមៀ ពូទីន មិនយល់ព្រមចំពោះបទឈប់បាញ់ក្នុងសង្គ្រាមនៅអ៊ុយក្រែន។
ការប្ដេជ្ញាចិត្តរបស់សហភាពអឺរ៉ុបនេះអាចប៉ះពាល់ដល់ដំណើរការចរចាដោយផ្ទាល់រវាងលោកប្រធានាធិបតីរុស្ស៊ី វ្ល៉ាឌីមៀ ពូទីន និងសមភាគីអ៊ុយក្រែន លោក វ៉្លូឌីមៀ ហ្សឺឡិនស្គី ក្នុងប្រទេសតួកគី នៅថ្ងៃទី១៥ ខែឧសភា សម្រាប់បទឈប់បាញ់នៅអ៊ុយក្រែន ហើយប្រធានាធិបតីអាម៉េរិក លោក ដូណាល់ ត្រាំ បានគាំទ្រជំនួបកំពូលមួយនេះ។
ក្រុមអ្នកការទូត បានអះអាងថា បន្ទាប់ពីសហភាពអឺរ៉ុប បានដាក់ទណ្ឌកម្មជាកញ្ចប់ចំនួន១៦លើរុស្ស៊ី ដោយសារសង្រ្គាមនៅអ៊ុយក្រែន រួចមក វាអាចមានការលំបាកក្នុងការឯកភាពគ្នាជាធ្លុងមួយក្នុងចំណោមសមាជិកទាំង២៧របស់ប្លុកនេះ ដើម្បីអនុម័តវិធានការថ្មីសំខាន់ៗមួយចំនួន៕
ដោយ៖ សុខ មង្គល
