ប្រធានាធិបតីសហរដ្ឋអាមេរិក Joe Biden និងមេដឹកនាំប្រទេស G7 ផ្សេងទៀត បានជួបប្រជុំគ្នានៅរមណីយដ្ឋាន ឈ្កូសស៍ អេលម៉ៅ (Schloss Elmau) នៅភាគខាងត្បូងប្រទេសអាល្លឺម៉ង់ ហើយកិច្ចប្រជុំនេះ សម្រេចបាននូវគំនិតផ្ដួចផ្ដើមថ្មីៗមួយ ដែលឲ្យឈ្មោះថ្មីរួមគ្នាថា "ភាពជាដៃគូសម្រាប់ហេដ្ឋារចនាសម្ព័ន្ធ និងការវិនិយោគសកល"។
ក្នុងនោះដែរ លោក Biden បាននិយាយថា សហរដ្ឋអាមេរិកបានសន្យានឹងកៀគរថវិកាចំនួន ២០០ ពាន់លានដុល្លារ ដែលជាជំនួយមូលនិធិសហព័ន្ធ និងការវិនិយោគឯកជនក្នុងរយៈពេល ៥ ឆ្នាំ ដើម្បីគាំទ្រនិងជួយដល់ប្រទេសដែលមានចំណូលទាប និងមធ្យម ក្នុងការអភិវឌ្ឍគម្រោងហេដ្ឋារចនាសម្ព័ន្ធផ្សេងៗក៏ដូចជាជួយដោះស្រាយការប្រែប្រួលអាកាសធាតុ បួករួមទាំងការកែលម្អប្រព័ន្ធសុខភាពពិភពលោក សមធម៌យេនឌ័រ និងហេដ្ឋារចនាសម្ព័ន្ធប្រព័ន្ធឌីជីថលផងដែរ។
លោក ចូ បៃដិន បានសង្កត់ធ្ងន់ថា កញ្ចប់ថវិកាដ៍មហាសាលនេះ គឺមិនមែនជាជំនួយសប្បុរសធម៌នោះទេ តែវាជាថវិកាក្នុងការវិនិយោគ ដែលផ្តល់ប្រយោជន៍ជារួមសម្រាប់មនុស្សគ្រប់គ្នា ដោយលោកបន្ថែមថា វានឹងផ្តល់ឪកាសឲ្យប្រទេសនានាលើពិភពលោក "មើលឃើញពីអត្ថប្រយោជន៍ជាក់ស្តែងនៃការធ្វើជាដៃគូជាមួយលទ្ធិប្រជាធិបតេយ្យ"។
អត្ថបទគួរអាន
មួយវិញទៀត ប្រធានគណៈកម្មការអឺរ៉ុប លោកស្រី អ៉ូសូឡា វ៉ុនដើយេន (Ursula von der Leyen) បានប្រាប់នៅក្នុងកិច្ចប្រជុំនេះដែរថា សហភាពអឺរ៉ុបនឹងប្រមូលថវិកាជាង ៣០០ ពាន់លានដុល្លារសម្រាប់ជាជំនួយដូចអាមេរិកដែរក្នុងរយៈពេល ៥ ឆ្នាំ ដូចគ្នា ដើម្បីបង្កើតជម្រើសប្រកបដោយនិរន្តរភាពទល់នឹងគំនិតផ្តួចផ្តើមគម្រោងខ្សែក្រវាត់មួយ ផ្លូវមួយរបស់ចិន ដែលប្រធានាធិបតីចិន លោក ស៊ី ជីងពីន បានប្រកាសតាំងពីឆ្នាំ ២០១៣ កន្លងទៅ។
លោកលោកស្រី អ៉ូសូឡា វ៉ុនដើយេន (von der Leyen) បាននិយាយនៅក្នុងសន្និសីទសារព័ត៌មានមួយជាមួយមេដឹកនាំក្រុមប្រទេស G7 ថា វាអាស្រ័យលើប្រទេសទាំងអស់រួមគ្នា ក្នុងការផ្តល់នូវការជំរុញការវិនិយោគប្រកបដោយភាពវិជ្ជមាន ដើម្បីបង្ហាញទៅដល់ដៃគូប្រទេសកំពុងអភិវឌ្ឍថា ពួកគេមានជម្រើសក្នុងការវិនិយោគ។
គួររំលឹកបន្តិចថា គំនិតផ្តួចផ្តើមខ្សែក្រវ៉ាត់ និងផ្លូវរបស់ចិន គឺជាគម្រោងវិនិយោគទាក់ទងនឹងហេដ្ឋារចនាសម្ព័ន្ធ និងកម្មវិធីអភិវឌ្ឍន៍ផ្សេងៗនៅក្នុងប្រទេសជាង ១០០ ក្នុងគោលបំណងធ្វើទំនើបកម្ម និងផ្សាភ្ជាប់ទីផ្សារពាណិជ្ជកម្មពីទ្វីបអាស៊ីទៅអឺរ៉ុប។ ទន្ទឹមនឹងនេះ មន្ត្រីសេតវិមានបាននិយាយថា គម្រោងផ្លូវសូត្រនេះបានផ្តល់នូវអត្ថប្រយោជន៍ជាក់ស្តែងតិចតួចណាស់ម្រាប់ប្រទេសកំពុងអភិវឌ្ឍជាច្រើននៅក្នុងតំបន់៕
អត្ថបទ៖ ហ៊ុន គន្ធថៃ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
