តាមសេចក្តីប្រកាសរបស់រដ្ឋមន្ត្រីក្រសួងសេដ្ឋកិច្ចអាល្លឺម៉ង់កាលពីពេលថ្មីៗ បងធំរបស់អឺរ៉ុបមួយនេះ នឹងបើកផ្លូវឱ្យរោងចក្រអគ្គិសនីដែលដើរដោយថាមពលធ្យូងថ្ម ត្រូវបង្កើនសកម្មភាពច្រើនជាងមុន ដើម្បីប្តូរមកទាញយកអគ្គិសនីពីការដុតធ្យូងថ្មវិញ ទោះបីត្រូវប្រាសចាកពីកិច្ចព្រមព្រៀងក្រុងប៉ារីសស្តីពីអាកាសធាតុសកលក៏ដោយ។
ក្រុមហ៊ុនឧស្ម័នរដ្ឋរុស្ស៊ី Gazprom បានប្រកាសកាលពីសប្តាហ៍មុនពីការកាត់បន្ថយ ការបង្ហូរឧស្ម័នតាមបំពង់បង្ហូរប្រេង និងឧស្ម័ន Nord Stream ទៅកាន់បណ្តាប្រទេសអឺរ៉ុប ដោយក្នុងនោះប្រមាណ ៤០% មកឲ្យអាល្លឺម៉ង់ ដោយយកហេតុផលថា មកពីបញ្ហាបច្ចេកទេស តែទីក្រុងប៊ែរឡាំងមិនជឿដូច្នេះឡើយ។ ក្រុមហ៊ុនឧស្ម័នរដ្ឋរបស់រុស្ស៊ី Gazprom បានអះអាងថា ការកាត់បន្ថយការផ្គត់ផ្គង់តាមរយៈបំពង់បង្ហូរ Nord Stream គឺដោយសារមានជួសជុល បំពង់បង្ហូរ ប៉ុន្តែមន្ត្រីសហភាពអឺរ៉ុបជឿថា ទីក្រុងម៉ូស្គូកំពុងព្យាយាមដាក់សម្ពាធលើសម្ព័ន្ធមិត្តរបស់អ៊ុយក្រែន ជាការសងសឹកនឹងការបន្តការគាំទ្រ និងផ្គត់ផ្គង់សព្វាវុធ។
ប្រឈមមុខនឹងបញ្ហានេះ រដ្ឋមន្ត្រីសេដ្ឋកិច្ចរបស់ប្រទេសអាល្លឺម៉ង់លោក រ៉ូបឺត ហាបេក(Robert Habeck) និយាយនៅក្នុងសេចក្តីថ្លែងកាណ៍កាលពីថ្ងៃទី ១៩មិថុនាថា អាល្លឺម៉ង់នឹងដាក់កំរិតលើការប្រើប្រាស់ឧស្ម័នធម្មជាតិ សម្រាប់ផលិតអគ្គិសនីឱ្យបានតិចជាងមុន ដោយជំនួសមកវិញដោយការប្រើប្រាស់ធ្យូងថ្ម ហើយដើម្បីធានាការផ្គត់ផ្គង់ថាមពលក្នុងប្រទេស រោងចក្រអគ្គិសនីដែលដើរដោយថាមពលធ្យូងថ្ម នឹងបង្កើនសកម្មភាពផលិតច្រើនជាងមុនទ្វេដងផងដែរ។
អត្ថបទគួរអាន
យ៉ាងណាក៏ដោយ ប្រការនេះ ត្រូវបានគេមើលឃើញថា គឺបានប្រាសចាកទាំងស្រុង ពីកិច្ចព្រមព្រៀងក្រុងប៉ារីសស្តីពីបញ្ហាអាកាសធាតុសកល។ កិច្ចព្រមព្រៀងស្តីពីអាកាសធាតុ ដែលបានចុះហត្ថលេខានៅខែធ្នូ ឆ្នាំ២០១៥ នៅទីក្រុងប៉ារីស បានកំណត់ទិសដៅពិភពលោក ឲ្យរួមគ្នាទប់ស្កាត់ការកើនឡើងនូវកំដៅផែនដី មិនឲ្យលើសពី១,៥អង្សាសេ។ ទន្ទឹមនឹងនេះ សម្រាប់រដ្ឋាភិបាលក្រុងប៊ែរឡាំង ធ្លាប់បានសន្យាថានឹងដកខ្លួន ឈប់ប្រើថាមពលធ្យូងថ្មយ៉ាងយូរបំផុតនៅឆ្នាំ២០៣០ ក្នុងគោលដៅកាត់បន្ថយឧស្ម័នផ្ទះកញ្ចក់។ ប៉ុន្ដែ ក្រោយប្រឈមមុខនឹងភាពតានតឹងជាមួយរុស្ស៊ី វាក៏បានធ្វើឲ្យអាល្លឺម៉ង់ ទុកការសន្យានេះមួយអន្លើសិន ដោយត្រូវបង្ខំចិត្តបន្ដបង្កើនការប្រើប្រាស់ធ្យូងថ្មឡើងវិញ ដើម្បីជំនួសឧស្ម័ននាំចូលពីប្រទេសរុស្ស៊ី។
ទោះយ៉ាងណា ក្រសួងសេដ្ឋកិច្ចអាល្លឺម៉ង់បានអះអាងហើយថា វិធានការបង្កើនការប្រើប្រាស់ធ្យូងថ្ម សម្រាប់ជំនួសឧស្ម័នរុស្ស៊ី គឺបណ្តោះអាសន្នប៉ុណ្ណោះ ពោលគឺសម្រាប់ដោះស្រាយបញ្ហាក្នុងពេលដែលទីផ្សារឧស្ម័នកំពុងជួបស្ថានភាពអាក្រក់បំផុត។
សូមជម្រាបថា អាល្លឺម៉ង់ជាប្រទេសនៅអឺរ៉ុបដែលត្រូវការឧស្ម័ន និងប្រេងរុស្ស៊ី ច្រើនជាងគេ បង្អស់ដល់ទៅ ៤០%នៃតម្រូវការប្រើប្រាស់ក្នុងស្រុកសរុប។ ប៉ុន្តែ ដើម្បីតែការដាក់ទណ្ឌកម្មលើម៉ូស្គូដែលឈ្លានពានអ៊ុយក្រែន ក្រុងប៊ែរឡាំង បានព្យាយាមកាត់បន្ថយការនាំចូលឧស្ម័នពីរុស្ស៊ី ពី ៥៥% មកនៅត្រឹម៣៥%ប៉ុណ្ណោះ។ យ៉ាងណាមិញ ការដែលអាល្លឺម៉ង់អាចធ្វើដូចនេះបានក៏ដោយសារតែគេបាន បង្កើនការទិញឧស្ម័នបន្ថែមពីអ្នកជិតខាង ដូចជាន័រវែស និងហូឡង់ជាដើម៕
None
