បើតាមការឱ្យដឹងបន្ថែមពីមន្ត្រីជាន់ខ្ពស់អាមេរិក ទីក្រុងវ៉ាស៊ីនតោនទំនងជានឹងពិនិត្យមើលលទ្ធភាពដកពន្ធលើឧស្ម័ននាំចូលពីប្រទេសចិនមុនគេ ដើម្បីបន្ទាបតម្លៃថាមពលនៅក្នុងស្រុក។ បើសិនជារនាំងពន្ធគយលើទំនិញចិន ត្រូវបានអាមេរិកដកចេញពិតមែន តើវានឹងជួយបន្ថយអតិផរណានៅអាមេរិកបានកំរិតណា? ចុះឯណាទៅ គោលនយោយបាយអនុវត្តពាណិជ្ជកម្មដោយយុត្តិធម៌ និងស្មើភាពគ្នារវាងមហាអំណាចទាំងពីរ ដែលអាមេរិកតែងតែស្រែកទាមទារមិនដាច់ពីមាត់នោះ?
អត្រាអតិផរណានៅអាមេរិកកាលពីខែឧសភា បានកើនឡើងដល់កម្រិតខ្ពស់បំផុតក្នុងរយៈពេល៤០ឆ្នាំចុងក្រោយ ខណៈដែលតម្លៃក្នុងការប្រើប្រាស់សម្រាប់ជីវភាពទូទៅរបស់ពលរដ្ឋអាមេរិក បានកើនឡើង ៨,៦%។ ទំនិញស្ទើរគ្រប់មុខឡើងថ្លៃជាបន្តបន្ទាប់រាប់ចាប់ពីថាមពល អាហារ ការស្នាក់នៅ ដែលវាបានដាក់សម្ពាធយ៉ាងធ្ងន់ធ្ងរលើគ្រួសារពលរដ្ឋអាមេរិកាំងនៅទូទាំងប្រទេស។
អ្នកសេដ្ឋកិច្ច និងធុរកិច្ចជាច្រើនបាននិងកំពុងជំរុញ ក៏ដូចជាអំពាវនាវឱ្យលោក ចូ បៃឌិន ប្រធានាធិបតីអាមេរិក កាត់បន្ថយពន្ធលើទំនិញនាំចូលពីប្រទេសចិន ដើម្បីធ្វើឱ្យអតិផរណាក្នុងស្រុកបានធូរស្រាលខ្លះ។ ម្យ៉ាង គឺដើម្បីសម្រួលលើការងើបឡើងវិញនៃសេដ្ឋកិច្ចអាមេរិក ក្រោយកូវីដ១៩ ដែលបានប៉ះពាល់ដល់ខ្សែចង្វាក់ផ្គត់ផ្គង់ និងបញ្ហាផលប៉ះពាល់ពាក់ព័ន្ធនឹងសង្គ្រាមនៅអ៊ុយក្រែនជាដើម។
ឆ្លើយតបទៅនឹងបញ្ហាទាំងនេះ ប្រធានាធិបតីវ័យ៧៩ឆ្នាំលោក ចូ បៃឌិន បាននិយាយហើយថា លោកនឹងជួបជជែកជាមួយ មេដឹកនាំចិនឆាប់ៗ មុននឹងសម្រេចចិត្តថា ត្រូវដកពន្ធលើទំនិញណាខ្លះ។
អត្ថបទគួរអាន
ប៉ុន្តែកាលពីថ្ងៃអាទិត្យចុងសប្តាហ៍មុននេះ មន្ត្រីជាន់ខ្ពស់អាមេរិកចំនួនពីររូប ដែលជិតស្និទ្ធនឹងបញ្ហាខាងលើ បានបង្ហើបថា រដ្ឋបាលក្រុងវ៉ាស៊ីនតោនកំពុងពិនិត្យមើលការដកពន្ធលើថាមពលឧស្ម័នមុនគេ ដើម្បីដោះស្រាយការកើនឡើងនៃតម្លៃប្រេងសាំងនិយាយដោយឡែក និងអតិផរណានិយាយជារួម។ មន្ត្រីអាមេរិកដដែលបន្ថែមថា លោកបៃឌិន ក៏កំពុងវាយតម្លៃពីលទ្ធភាពផ្អាកការយកពន្ធលើថាមពលក្នុងស្រុក ដើម្បីកាត់បន្ថយតម្លៃសម្រាប់អ្នកប្រើប្រាស់ផងដែរ។
គួរជម្រាបថា មុនឈានដល់ការពិចារណាដកពន្ធលើថាមពលឧស្ម័នរបស់ចិន ប្រធានាធិបតីចូ បៃឌិន ធ្លាប់បានស្តីបន្ទោសដល់ក្រុមហ៊ុនប្រេងធំៗរបស់ខ្លួន ដែលបរាជ័យក្នុងការបង្កើនការផលិត និងបណ្តោយឱ្យមានការខ្វះខាតប្រេង និងតម្លៃក៏កើនឡើង។
សូមបញ្ជាក់ថា អ្នកជំនាញក៏ធ្លាប់បានព្រមានរួចហើយដែរ ប្រសិនបើអាមេរិកពិតជាដករនាំងពន្ធលើទំនិញចិនមែន វាគ្រាន់តែអាចទៅបន្ទាបតម្លៃនៅលើមុខទំនិញមួយចំនួនប៉ុណ្ណោះ ដូចជាវត្ថុធាតុដើមសំខាន់ៗ ហើយវានឹងមិនធ្វើឱ្យអតិផរណាធ្លាក់ចុះដល់កម្រិតដូចពីមុនវិញ ឬទៅតាមអ្វីដែលគេចង់បាននោះទេ ដោយហេតុថា អត្រាអតិផរណាខ្ពស់នៅអាមេរិកដូចពេលបច្ចុប្បន្ន មិនមែនដោយសារតែរនាំងពន្ធលើទំនិញចិនតែមួយមុខឡើយ។ វាបានរួមចំណែកពីកត្តាជាច្រើន រួមមាននិន្នាការសេដ្ឋកិច្ចសកល ដែលរង្គោះរង្គើដោយសារសង្គ្រាមនៅអ៊ុយក្រែន ការមិនទាន់ងើបឈររឹងមាំ ក្រោយវិបត្តិកូវីដ១៩ និងផលប៉ះពាល់លើខ្សែចង្វាក់ផ្គត់ផ្គង់ជាដើម។ ដូច្នេះ គេត្រូវដោះស្រាយបញ្ហាទាំងនេះទន្ទឹមគ្នា ទើបអាមេរិកអាចមើលឃើញពីការធ្លាក់ចុះអតិផរណាមកវិញ។
គួររំឭកថា ពន្ធគយដែលដាក់លើទំនិញចិន អំឡុងរដ្ឋការអតីតប្រធានាធិបតី Donald Trump បានអនុវត្តក្នុងអត្រា ២៥% លើផលិតផលចិនក្នុងតម្លៃសរុបដល់ទៅរាប់ពាន់លានដុល្លារ។ ការដាក់ទណ្ឌកម្មនេះ មានគោលបំណងកាត់បន្ថយឱនភាពពាណិជ្ជកម្មរបស់សហរដ្ឋអាមេរិក និងបង្ខំឱ្យប្រទេសចិនទទួលយកការអនុវត្តពាណិជ្ជកម្ម ដែលលោកត្រាំហៅថា ជារឿងយុត្តិធម៌ និងស្មើភាពគ្នា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
