លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ភីភីលីង ស៊ីឃ្យួរីធី កត់សម្គាល់ឃើញថា តម្លៃហាងឆេងមាសនៅមួយរយៈពេលចុងក្រោយនេះបានហក់ឡើងថ្លៃបន្តិចវិញ បន្ទាប់ពីបានធ្លាក់ចុះយ៉ាងគំហុកប៉ុន្មានថ្ងៃក្រោយការបោះឆ្នោតនៅសហរដ្ឋអាម៉េរិក។ បើតាមអ្នកជំនាញរូបនេះ គិតត្រឹមរសៀលថ្ងៃទី២០ ខែវិច្ឆិកា នេះ ហាងឆេងមាសនៅលើទីផ្សារអន្តរជាតិ ត្រូវបានគេជួញដូរក្នុងតម្លៃ២,៦៤០ដុល្លារក្នុង១អោន ឬស្មើនឹង៣,១៨០ដុល្លារក្នុង១តម្លឹងនៅលើទីផ្សារកម្ពុជា។ ទោះបីតម្លៃហាងឆេងមាសគីឡូឡើងចុះពុំទាន់មានស្ថិរភាពក៏ពិតមែន ប៉ុន្តែអ្នកជំនាញរូបនេះ ជឿជាក់ថា នៅក្នុងរយៈពេលវែងតម្លៃហាងឆេងមាសនឹងនៅតែមានការកើនឡើង ដោយសារតែបណ្ដាប្រទេសធំៗ និងធនាគារនានា នៅតែមានតម្រូវការមាសដើម្បីស្តុកទុក។ តែយ៉ាងណាលោក ឡុង សំណាង បានគូសបញ្ជាក់ថា តម្លៃហាងឆេងមាសអាចនឹងធ្លាក់ចុះនៅក្នុងពេលណាមួយដែលប្រាក់ដុល្លារអាម៉េរិកមានតម្លៃកើនឡើង។
ដោយឡែក លោកបណ្ឌិត ភី សារ៉ាត់ ទីប្រឹក្សាជាន់ខ្ពស់សមាគមពាណិជ្ជករគ្រឿងអលង្ការ និងត្បូងមានតម្លៃកម្ពុជាកត់សម្គាល់ឃើញថា នៅមួយរយៈពេលចុងក្រោយនេះ តម្លៃហាងឆេងមាសគីឡូបានឡើងចុះលឿនគួរឱ្យកត់សម្គាល់ ហើយចាប់ពីពេលនេះរហូតដល់ខែធ្នូ ឆ្នាំ២០២៤ តម្លៃហាងឆេងមាសនឹងបន្តប្រែប្រួលឡើងចុះទៅតាមស្ថានភាពសេដ្ឋកិច្ចរបស់ពិភពលោក។ លោកបណ្ឌិត ភី សារ៉ាត់ បានអះអាងថា តម្លៃមាសនឹងអាចធ្លាក់ថ្លៃនៅចុងខែវិច្ឆិកានេះ ដោយសារជនជាតិចិននាំគ្នាសម្រុកលក់មាស ប៉ុន្តែមាសនឹងអាចឡើងថ្លៃវិញនៅអំឡុងខែធ្នូ ព្រោះជនជាតិចិនសម្រុកទិញមាសចូលវិញ ដោយសារពួកគេមានតម្រូវការនៅក្នុងពិធីបុណ្យចូលឆ្នាំចិន។ ការប្រែប្រួលតម្លៃហាងឆេងមាសនេះ ត្រូវអ្នកជំនាញរូបនេះលើកឡើងថា ពុំមានផលប៉ះពាល់អ្វីច្រើនដល់កម្ពុជានោះឡើយ ដោយសារនៅកម្ពុជាមានអ្នកនិយមប្រើប្រាស់មាសប្រមាណ២០%ប៉ុណ្ណោះ ខណៈការទិញមាសគីឡូដើម្បីទុកចំណេញ ក៏ពុំសូវមានច្រើននោះដែរ។
គួរបញ្ជាក់ថា តម្លៃហាងឆេងមាសបានហក់ឡើងដល់កម្រិតខ្ពស់បំផុតរហូតដល់៣,៣៦០ដុល្លារក្នុង១តម្លឹងកាលពីចុងខែតុលា ប៉ុន្តែតម្លៃមាសបានធ្លាក់ចុះវិញជាបន្តបន្ទាប់ ជាពិសេសនៅប៉ុន្មានថ្ងៃក្រោយការបោះឆ្នោជ្រើសរើសប្រធានាធិបតីនៅសហរដ្ឋអាម៉េរិកតែម្តង៕
ត្ថបទ៖ បូ ដូឡា,រូបភាព ឯកសារ
