តម្លៃមាស បានធ្លាក់ចុះខ្លាំង ក្រោយវិនិយោគិនរំពឹងសង្គ្រាមពន្ធមានភាពធូរស្បើយ

តម្លៃមាសបានធ្លាក់ចុះខ្លាំងចាប់តាំងពីសប្តាហ៍មុនមកម្ល៉េះ ខណៈទីផ្សារភាគហ៊ុនសកលមានការកើនឡើងគួរឱ្យកត់សម្គាល់ ចំពេលមានសញ្ញានៃការថមថយនូវសង្គ្រាមពាណិជ្ជកម្មពិភពលោក ជាពិសេសរវាងសហរដ្ឋអាម៉េរិក និងប្រទេសចិន​។ តម្លៃមាសបានធ្លាក់ចុះក្នុងរង្វង់៦,៥% បើធៀបនឹងកម្រិតដែលបានហក់ឡើងខ្ពស់បំផុតកាលពីថ្ងៃអង្គារ សប្ដាហ៍មុន។

លោក ម៉ៃឃើល ប្រោន (Michael Brown) អ្នកយុទ្ធសាស្រ្តស្រាវជ្រាវជាន់ខ្ពស់នៅក្រុមហ៊ុន Pepperstone បានព្យាករថា តម្លៃមាសអាចនឹងធ្លាក់ចុះថែមទៀតនៅក្នុងរយៈពេលដ៏ខ្លីនេះដោយសារកត្តាមួយចំនួនរួមមានការថយចុះតម្រូវការមាស ការទិញមាសលើសកម្រិត ហានិភ័យសាច់ប្រាក់ងាយស្រួល និងភាពយឺតយ៉ាវនៃការទិញមាសរបស់ធនាគារកណ្តាលពិភពលោក។ ទោះជាយ៉ាងណា ហេតុផលចម្បងនៃការធ្លាក់ចុះតម្លៃមាសនេះ គឺភាពធូរស្បើយនៃសង្គ្រាមពាណិជ្ជកម្ម បន្ទាប់ពីលោក ដូណាល់ ត្រាំ បាននិយាយថា លោកនឹងកាត់បន្ថយពន្ធយ៉ាងច្រើនលើប្រទេសចិន ដែលធ្វើទីផ្សារភាគហ៊ុនមានការកើនឡើងទូទាំងពិភពលោក។

តែយ៉ាងណាលោក ប្រោន រំពឹងថា តម្លៃមាសនឹងបន្តកើនឡើងនៅក្នុងរយៈពេលវែងដោយសារតែភាពមិនប្រាកដប្រជា ដែលកំពុងបន្តពាក់ព័ន្ធបញ្ហាសង្គ្រាមពាណិជ្ជកម្មសកល ខណៈមាសនៅតែជាជម្រកសុវត្ថិភាពបំផុតជាងទ្រព្យផ្សេងទៀត៕

ដោយ៖ សុខ មង្គល