ហាងឆេងមាសលើទីផ្សារអន្តរជាតិ ត្រូវបានព្យាករថា អាចនឹងហក់ឡើងលើសកម្រិតកំណត់ត្រា ខណៈប្រាក់ដុល្លារធ្លាក់ថ្លៃដោយសារពាក្យសម្ដីរបស់លោក ដូណាល់ ត្រាំ

ហាងឆេងមាសនៅលើទីផ្សារអន្តរជាតិ បានហក់ឡើងជាង១,២% ឈានដល់៣,៣៨៤ដុល្លារអាម៉េរិកក្នុងមួយតម្លឹងកាលពីថ្ងៃសុក្រ សប្ដាហ៍មុន ដែលខុសគ្នាតែជាង១៧ដុល្លារអាម៉េរិកប៉ុណ្ណោះ បើធៀបនឹងកម្រិតកំណត់ត្រាខ្ពស់បំផុត៣,៤០២ដុល្លារអាម៉េរិក ក្នុងមួយតម្លឹង កាលពីអំឡុងខែតុលា ឆ្នាំ២០២៤។

លោក បាត ម៉េឡេក (Bart Melek) ប្រធានផ្នែកយុទ្ធសាស្រ្តទំនិញនៅក្រុមហ៊ុនផ្ដល់សេវាហិរញ្ញវត្ថុកាណាដា TD Securities បានលើកឡើងថា ការធ្លាក់ចុះនៃតម្លៃប្រាក់ដុល្លារអាម៉េរិក គឺជាកត្តាមួយដែលជំរុញឱ្យហាងឆេងមាសហក់ឡើង ហើយក្នុងនោះបញ្ហាពន្ធគយ ដែលលើកឡើងដោយប្រធានាធិបតី ដូណាល់ ត្រាំ គឺជាកត្តាជះឥទ្ធិពលដ៏ធំ។

អ្នកជំនាញរូបនេះបានបន្ថែមទៀតថា ចំណាត់ការរបស់លោក ដូណាល់ ត្រាំ អាចនឹងធ្វើឱ្យតម្លៃទំនិញហក់ឡើងកាន់តែខ្ពស់ ហើយទីផ្សារមាសប្រហែលមើលឃើញថា នេះជាសញ្ញានៃការហក់ឡើងអតិផរណា ដែលទាមទារឱ្យមានការជួយគាំទ្របន្ថែមទៀតពីបណ្ដាធនាគារកណ្ដាល។

គួររំឭកថា អំឡុងវេទិកាសេដ្ឋកិច្ចពិភពលោកក្នុងទីក្រុងដាវ៉ូស ប្រទេសស្វីស កាលពីថ្ងៃព្រហស្បតិ៍ សប្ដាហ៍មុន លោក ដូណាល់ ត្រាំ បានអំពាវនាវឱ្យធនាគារកណ្ដាលនានាជុំវិញពិភពលោកបញ្ចុះអត្រាការប្រាក់ឱ្យបានឆាប់ ហើយការលើកឡើងរបស់លោកបានធ្វើឱ្យប្រាក់ដុល្លារអាម៉េរិកធ្លាក់ថ្លៃដល់កម្រិតទាបមិនធ្លាប់មានក្នុងរយៈពេលមួយខែនេះ។

ទន្ទឹមនេះ លោក ដូណាល់ ត្រាំ ក៏បានប្រកាសដែរថា ការដំឡើងពន្ធគយរបស់សហរដ្ឋអាម៉េរិក លើប្រទេសម៉ិកស៊ិក ប្រទេសកាណាដា ប្រទេសចិន និងសហភាពអឺរ៉ុប អាចត្រូវបានប្រកាសនៅថ្ងៃទី១ ខែកុម្ភៈ ដើមឆ្នាំ២០២៥ នេះ៕

ដោយ: តែម សុខុម