តម្លៃមាសនៅលើទីផ្សារអន្តរជាតិហក់ឡើងខ្ពស់បំផុតមិនធ្លាប់មានក្នុងប្រវត្តិសាស្ត្រ តើមកពីមូលហេតុអ្វី?

លោក យៀប ជុន យ៉ុង (Yeap Jun Rong) អ្នកជំនាញផ្នែកយុទ្ធសាស្រ្តទីផ្សារនៃគេហទំព័រតាមដានទីផ្សារ និងហាងឆេងមាស IG បានលើកឡើងថា បណ្ដាអ្នកវិនិយោគរំពឹងទុកថា សង្គ្រាមពាណិជ្ជកម្មពិភលោកនឹងកាន់តែកើនឡើងកម្ដៅ ហើយកត្តានេះបានជំរញឱ្យវិនិយោគិនសម្រុកទិញចូលមាស ដើម្បីការពារហានិភ័យ។

នៅក្នុងស្ថានការណ៍វិវត្តចុងក្រោយនេះ ដើម្បីឆ្លើយតបទៅនឹងសង្គ្រាមពាណិជ្ជកម្មបញ្ឆេះឡើងដោយប្រធានាធិបតីអាម៉េរិកលោក ដូណាល់ ត្រាំ សហភាពអឺរ៉ុបបានដំឡើងពន្ធ៥០%លើការនាំចូលស្រាវីស្គីអាម៉េរិក ហើយការដំឡើងពន្ធនេះបានធ្វើឱ្យលោក ដូណាល់ ត្រាំ ខឹងឆេះដុំ ហើយបានគំរាមតាមបណ្ដាញទំនាក់ទំនងសង្គម Truth Social ថា លោកនឹងយកពន្ធ២០០%លើការនាំចូលស្រាគ្រប់ប្រភេទរបស់អឺរ៉ុប។

ពន្ធគយរបស់លោក ដូណាល់ ត្រាំ ត្រូវបានព្យាករយ៉ាងទូលំទូលាយថា នឹងបង្កឱ្យ

អតិផរណាហក់ឡើងខ្ពស់ និងភាពមិនប្រាកដប្រជានៃសេដ្ឋកិច្ច ហើយជំរុញឱ្យហាងឆេងមាសឡើងខ្ពស់ឈានដល់ការបំបែកកំណត់ត្រាជាបន្តបន្ទាប់នៅក្នុងឆ្នាំ២០២៥ នេះ ព្រោះមាសត្រូវបានទទួលស្គាល់ថា ជាទ្រព្យសកម្មដ៏មានសុវត្ថិភាពបំផុត សម្រាប់ការពារហានិភ័យផ្នែកនយោបាយ និងអតិផរណា៕

ដោយ: តែម សុខុម