អ្នកជំនួញនៅក្នុងវិស័យស្រូវអង្ករវៀតណាម បានគូសបញ្ជាក់ថា គោលដៅនាំចេញអង្ករ ៦លាន ៥សែនតោនរបស់ប្រទេសវៀតណាម ទំនងជាមិនអាចសម្រេចបាននោះឡើយ ក្នុងឆ្នាំ ២០២០នេះ ព្រោះបើតាមរបាយការណ៍ពីគយវៀតណាមបានបង្ហាញថា ក្នុងរយៈពេល ១១ខែ ដើមឆ្នាំ ២០២០នេះ វៀតណាម សម្រេចបានការនាំចេញអង្ករត្រឹមតែ ៥លាន ៧សែនតោនប៉ុណ្ណោះ។
រីឯ តម្លៃអង្ករនាំចេញរបស់វៀតណាម ក៏មានការកើនឡើងថ្លៃខ្លាំង រហូតដល់ទៅ ៥០០ដុល្លារអាមេរិកក្នុងមួយតោន ដោយសារតែ កង្វះខាតកុងតឺន័រ សម្រាប់ដឹកជញ្ជូនទំនិញទៅកាន់ អតិថិជន ហើយតម្លៃជួលកុងតឺន័រទំហំ ២០ហ្វីត ក៏កើនឡើងថ្លៃដល់ ៥ពាន់ដុល្លារអាមេរិក ដែលកាលពីខែតុលា គឺត្រឹមតែ ១.៥០០ដុល្លារអាមេរិកប៉ុណ្ណោះ។
អត្ថបទទាក់ទង!
ដោយឡែក ចំពោះប្រទេសថៃ បានទម្លាក់គោលដៅនាំចេញអង្កររបស់ខ្លួន មកនៅត្រឹម ៦លានតោន ទាបជាងគោលដៅរបស់ប្រទេសវៀតណាមទៅទៀត ហើយអ្នកជំនួញនៅក្នុងវិស័យស្រូវអង្ករថៃ ក៏បានព្យាករដែរថា គោលដៅនាំចេញអង្ករក្នុងឆ្នាំ ២០២០នេះ គឺពុំអាចសម្រេចបាននោះឡើយ ព្រោះថា បើតាមរបាយការណ៍ពីសមាគមអ្នកនាំចេញអង្កររបស់ថៃ បានបង្ហាញថា គិតត្រឹមរយៈពេល ១០ខែ ដើមឆ្នាំ ២០២០នេះ ថៃ សម្រេចបានការនាំចេញអង្ករជាង ៤លាន ៥សែនតោន ធ្លាក់ចុះដល់ទៅ ៣១% បើធៀបនឹងពេលដូចគ្នា កាលពីឆ្នាំមុន។
ចំពោះតម្លៃអង្ករថៃ ក៏មានការកើនឡើងទៅដល់ចន្លោះ ៥០០ ទៅ ៥២០ដុល្លារអាមេរិក ក្នុងមួយតោន ហើយក៏ជួបប្រទះនូវ បញ្ហាដឹកជញ្ជូនដោយសារ កង្វះខាតកុងតឺន័រ សម្រាប់ដឹកជញ្ជូន។
សូមបញ្ជាក់ដែរថា សមាគមអ្នកនាំចេញអង្កររបស់ថៃ ក៏បានព្យាករជាថ្មីថា ថៃ អាចនឹងសម្រេចការនាំចេញអង្ករបានប្រមាណ ៥លាន ៧សែនតោន ដែលមានទឹកប្រាក់សរុប ៣.៨០០លានដុល្លារអាមេរិក នៅក្នុងឆ្នាំ ២០២០នេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
