ការវិលត្រលប់របស់លោក ដូណាល់ ត្រាំ ទៅកាន់សេតវិមានជាថ្មីគួរឱ្យភ្ញាក់ផ្អើលនឹងក្លាយជាប្រភពដ៏ធំមួយដែលនាំឱ្យមានការប្រែប្រួលហាងឆេងតម្លៃមាស ដែលបានហក់ឡើងថ្លៃយ៉ាងគំហុកក្នុងរយៈពេល២ឆ្នាំកន្លងមកនេះ ដោយសារការតម្រូវការកើនឡើងខ្លាំងដើម្បីទប់ទល់នឹងអតិផរណា។ បញ្ហាភូមិសាស្ត្រនយោបាយ ដូចជាជម្លោះប្រដាប់អាវុធរវាងប្រទេសអ៊ីស្រាអែល ក្រុមហាម៉ាស់ ព្រមទាំងការឈ្លានពានរបស់រុស្ស៊ីទៅលើប្រទេសអ៊ុយក្រែន ក៏បានជំរុញឱ្យមាសហក់ឡើងថ្លៃផងដែរ។
ជាការកត់សម្គាល់ តម្លៃមាសបានធ្លាក់ចុះចាប់តាំងពីលោក ដូណាល់ ត្រាំ បានឈ្នះការបោះឆ្នោតប្រធានាធិបតីមក ដោយហាងឆេងមាសនៅញូវយ៉ក បានធ្លាក់ចុះមកនៅត្រឹមជាង២,៥៤១ដុល្លារអាម៉េរិកក្នុងមួយអោន ឬ ៣,០១០ដុល្លារអាម៉េរិក ក្នុងមួយតម្លឹង ដែលធ្លាក់ចុះពីកម្រិតខ្ពស់បំផុត២,៨០០ដុល្លារអាម៉េរិក ក្នុងមួយអោន ឬជាង៣,៤១៤ដុល្លារអាម៉េរិក ក្នុងមួយតម្លឹងកាលពីចុងខែតុលា។
ការជាប់ឆ្នោតរបស់លោក ដូណាល់ ត្រាំ បានធ្វើឱ្យប្រាក់ដុល្លារឡើងថ្លៃ ហើយមូលបត្របំណុលរបស់រតនាគារអាម៉េរិក ក៏ហក់ឡើង ជាហេតុនាំឱ្យមាសលែងសូវមានភាពទាក់ទាញដូចមុន។ ជាធម្មតាមាសមានតម្រូវការខ្ពស់ នៅពេលដែលទីផ្សារមិនសូវជឿទុកចិត្តលើធនបត្រ ឬក្រដាសប្រាក់ ប៉ុន្តែអត្រាការប្រាក់ខ្ពស់ជំរុញឱ្យទីផ្សាររក្សាទុកប្រាក់ដុល្លារ ជំនួសឱ្យមាសដែលមិនទទួលបានការប្រាក់។
អត្ថបទគួរអាន
លោក កូអ៊ីឈិរ៉ុ កាមេអ៊ី (Koichiro Kamei) មកពីវិទ្យាស្ថានយុទ្ធសាស្រ្តទីផ្សារបានលើកឡើងថា នៅមុនពេលបោះឆ្នោតនៅសហរដ្ឋអាម៉េរិក អ្នកវិនិយោគបានសម្រុកទិញមាសដើម្បីការពារហានិភ័យពីភាពចលាចលនយោបាយ។ បន្ទាប់ពីលោក ដូណាល់ ត្រាំ ឈ្នះការបោះឆ្នោត ការភ័យខ្លាចទាំងនោះ ក៏បានធូរស្រាល ដែលនាំឱ្យអ្នកវិនិយោគរយៈពេលខ្លីសម្រុកលក់ចេញមាសរបស់ពួកគេ។
លោក វីលៀម រ៉ាញ (William Rhind) នាយកប្រតិបត្តិក្រុមហ៊ុនអាម៉េរិក ហ្គ្រាណៃស៊ែរ (GraniteShares) បានកត់សម្គាល់ថា ការបោះឆ្នោតនៅសហរដ្ឋអាម៉េរិកនេះ បានជំរុញឱ្យអ្នកវិនិយោគងាកទៅវិនិយោគលើភាគហ៊ុន ដូចជាភាគហ៊ុនរបស់ក្រុមហ៊ុនបច្ចេកវិទ្យា និងបន្ទះឈីបខ្នាតយក្ស Nvidia ជំនួសឱ្យមាស។
ហាងឆេងមាសត្រូវបានព្យាករថា នឹងងើបឡើងវិញនៅឆ្នាំក្រោយ ហើយអាចនឹងហក់ឡើងថ្លៃលើសកម្រិតកំណត់ត្រាជាប្រវត្តិសាស្ត្រទៅទៀតដោយសារកំណើនតម្រូវការ និងគោលនយោបាយរបស់លោក ដូណាល់ ត្រាំ។ មាសបានហក់ឡើងដល់ជាង២,៧០០ដុល្លារក្នុងមួយអោន ឬជាង៣,២៩២ដុល្លារក្នុងមួយតម្លឹងកាលពីថ្ងៃសុក្រ សប្ដាហ៍មុន ចំពេលមានភាពតានតឹងរវាងរុស្ស៊ី និងអ៊ុយក្រែន។
ធនាគារវិនិយោគអាម៉េរិក UBS បានព្យាករថា មាសអាចនឹងឡើងថ្លៃរហូតដល់ទៅ២,៩០០ដុល្លារ ក្នុងមួយអោន ឬជិត៣,៥៣៧ដុល្លារ ក្នុងមួយតម្លឹងនៅឆ្នាំ២០២៥ ដោយសារកំណើនតម្រូវការពីអ្នកវិនិយោគជាស្ថាប័ន និងធនាគារកណ្ដាលនៅអាស៊ី ដូចជាឥណ្ឌា និងមហាយក្សចិន ជាដើម៕
ដោយ: តែម សុខុម
