ជាក់ស្ដែង ធនាគារជាតិរបស់ថៃថ្មីៗនេះ បានទម្លាក់ការព្យាករណ៍កំណើនសេដ្ឋកិច្ចរបស់ប្រទេសខ្លួនសម្រាប់ឆ្នាំ២០២១នេះ មកនៅត្រឹមចំនួនតិចតួចបំផុតត្រឹម ០,៧% ប៉ុណ្ណោះ ដោយសារតែរងផលប៉ះពាល់ពីវិបត្តិឆ្លងរាលដាលកូវីដ១៩ ដែលបាននិងកំពុងអូសបន្លាយអស់រយៈពេលជាច្រើនខែមកហើយ។
ក្នុងកិច្ចប្រជុំរបស់គណៈកម្មាធិការគោលនយោបាយរូបិយវត្ថុរបស់ធនាគារកណ្តាលថៃ បានសម្រេចកាត់បន្ថយការព្យាករកំណើនសេដ្ឋកិច្ចរបស់ប្រទេសថៃក្នុងឆ្នាំ២០២១ ពី ១,៨% ដែលបានព្យាករកាលពីខែមុន ចុះមកនៅត្រឹម ០,៧% ប៉ុណ្ណោះ។
បន្ថែមពីលើនេះ ធនាគារជាតិរបស់ថៃ ថែមទាំងបានទម្លាក់ការព្យាករកំណើនសេដ្ឋកិច្ចថៃសម្រាប់ឆ្នាំក្រោយ ពី ៣,៩% មកត្រឹម ៣,៧% ផងដែរ។
គួរកត់សម្គាល់ថា ការបន្តព្យាករទម្លាក់កំណើនសេដ្ឋកិច្ចរបស់ថៃ នៅឆ្នាំនេះ និង ឆ្នាំក្រោយ ធ្វើឡើងនៅបន្ទាប់ពីធនាគារជាតិថៃ មើលឃើញពីភាពមិនស្រាកស្រាន្ដសោះឡើយ នៃករណីឆ្លងកូវីដ១៩ ប្រភេទឌែលតា ដែលធ្វើឲ្យសេដ្ឋកិច្ចថៃពិបាកនឹងស្តារឡើងវិញ ទោះបីមានវិស័យជាទិភាពដូចជា វិស័យកសិកម្ម និងការនាំចេញ ជួយជ្រោមជ្រែងបានខ្លះយ៉ាងណាក្តី។
វិស័យទេសចរណ៍ ដែលចូលរួមចំណែកដ៏ធំជារៀងរាល់ឆ្នាំសម្រាប់កំណើនសេដ្ឋកិច្ចថៃ បន្តជាប់គាំង ដោយសារតែកូវីដ១៩បានមកពន្យារពេលម្តងហើយម្តងទៀត ក្នុងការបើកទទួលយកភ្ញៀវទេសចរណ៍បរទេស។
ដំណោះស្រាយចម្បងបំផុតសម្រាប់ស្តារសេដ្ឋកិច្ចថៃឡើងវិញនាពេលបច្ចុប្បន្ន គឺត្រូវទប់ស្កាត់ការបន្ដផ្ទុះការរីករាលដាលឆ្លងកើនឡើងនៃមេរោគកូវីដ១៩ឌែលតាឲ្យបានប្រសើរជាងនេះ បូករួមនឹងការពន្លឿនការចែកចាយវ៉ាក់សាំង ដើម្បីឲ្យសកម្មភាពសេដ្ឋកិច្ច និងប្រាក់ចំណូលរបស់ពលរដ្ឋត្រលប់មករកសភាពដើមវិញ។
ធនាគារជាតិថៃបានបង្ហាញជំនឿចិត្តដល់រាជរដ្ឋាភិបាលថៃថា អាចគ្រប់គ្រងកូវីដ-១៩បានប្រសើរឡើងវិញ យ៉ាងយូរបំផុតត្រឹមដើមត្រីមាសទី៤ឆ្នាំ២០២១នេះ។
អត្ថបទគួរអាន
សូមបញ្ជាក់ថា នាយករដ្ឋមន្ត្រីថៃ លោកប្រយុទ្ធ ចាន់អូចា កាលពីពេលថ្មីៗនេះ ក៏ធ្លាប់បានអះអាងប្រកបដោយភាពជឿជាក់ថា រដ្ឋាភិបាលរបស់លោកនឹងអាចគ្រប់គ្រងលើជំងឺកូវីដ១៩បាន យ៉ាងយូរក្នុងរយៈពេល ៤ទៅ៦សប្តាហ៍ខាងមុខនេះ។ ប៉ុន្តែផ្ទុយស្រឡះពីការអះអាងរបស់លោកតែម្តង ក្រោយពីបានបញ្ជាក់នូវគោលជំហរខាងលើរួចមិនបានប៉ុន្មានថ្ងៃផង ថៃបន្តរកឃើញករណីឆ្លងកូវីដ១៩ដល់ទៅជាង២ម៉ឺនករណី ដែលជាកំណត់ត្រាប្រវត្តិសាស្ត្រច្រើនបំផុតមិនធ្លាប់មាននៅក្នុងប្រទេសថៃនោះទេ។
គិតត្រឹមថ្ងៃព្រហស្បតិ៍ទី៥ សីហានេះ ថៃមានជសរុបជិត ៧០ម៉ឺននាក់ហើយ ខណៈអ្នកស្លាប់សរុបមានជាង ៥ពាន់នាក់។ ក្នុងនោះតំបន់ដែលមានការឆ្លងរាលដាលខ្លាំងជាងគេគឺស្ថិតក្នុងក្រុងបាងកក និងខេត្តជុំវិញនោះជាច្រើនទៀត៕
None
