ការលក់សព្វាវុធទៅឲ្យកោះតៃវ៉ាន់នាពេលនេះ គឺធ្វើឡើងបន្ទាប់ពីអាមេរិកកាលពីឆ្នាំមុន ក៏បានលក់សព្វាវុធទៅឲ្យកោះមួយនេះដែរ ដែលរួមបញ្ចូលទាំងយន្តហោះគ្មានមនុស្សបើក និង ឧបករណ៍ការពារមីស៊ីលនៅតាមសមុទ្រ ដើម្បីបង្កើនសមត្ថភាពការពាររបស់ខ្លួន។ រដ្ឋបាល លោកប៉ៃដិន បានអនុម័តការលក់សព្វាវុធ បែបពាណិជ្ជកម្មដោយផ្ទាល់ដល់កោះតៃវ៉ាន់ផងដែរ ចាប់តាំងពីឡើងកាន់ឡើងតំណែងជាប្រធានាធិបតីអាមេរិកមក។ យ៉ាងណាមិញ នៅថ្ងៃពុធ ទី៤ ខែសីហា ភ្នាក់ងារសហប្រតិបត្តិការសន្តិសុខការពារជាតិរបស់មន្ទីរបញ្ចកោណសហរដ្ឋអាមេរិកបានជូនដំណឹងដល់សភាអំពីការលក់សព្វាវុធដល់កោះតៃវ៉ាន់ ដែលមានទំហំទឹកប្រាក់ចំនួន ៧៥០ លានដុល្លារ។
សូមជ្រាបថា កិច្ចព្រមព្រៀងនេះធ្វើឡើងបន្ទាប់ពីការលក់សព្វាវុធរបស់អាមេរិកទៅឲ្យទីក្រុងតៃប៉ិ គឺចំពេលដែល ប្រទេសចិនកំពុងបង្កើនសម្ពាធយោធា និងទំនាក់ទំនងការទូតប្រឆាំងនឹងកោះតៃវ៉ាន់ ដោយចិនអះអាងថា កោះនេះស្ថិតគ្រប់គ្រងដោយទីក្រុងប៉េកាំង។
ទីភ្នាក់ងារសហប្រតិបត្តិការសន្តិសុខការពារជាតិនៃមន្ទីរបញ្ចកោណអាមេរិក បាននិយាយដែរថា ការលក់សព្វាវុធនេះនឹងជួយបង្កើន“ សមត្ថភាពរបស់កោះតៃវ៉ាន់ក្នុងការឆ្លើយតបទៅនឹងការគំរាមកំហែងនាពេលបច្ចុប្បន្ន និង អនាគត” ខណៈពេលដែលមាន ការពង្រឹងកិច្ចសហប្រតិបត្តិការបន្ថែមទៀត ជាមួយសហរដ្ឋអាមេរិកនិងសម្ព័ន្ធមិត្តផ្សេងទៀត” ។
អត្ថបទគួរអាន
យ៉ាងណាមិញ ក្រសួងការបរទេសតៃវ៉ាន់បានសម្តែងការកោតសរសើរចំពោះសហរដ្ឋអាមេរិកដោយនិយាយនៅលើបណ្តាញសង្គម Twitter ថា ការសម្រេចចិត្តនេះបង្ហាញពីការប្តេជ្ញាចិត្តរបស់ទីក្រុងវ៉ាស៊ីនតោនចំពោះទំនាក់ទំនងនឹងកោះតៃវ៉ាន់ និងអនុញ្ញាតឱ្យកោះនេះរក្សា“ ការការពារខ្លួនរឹងមាំ សន្តិភាពនិងស្ថិរភាពក្នុងតំបន់” ។
ទាក់ទងនឹងការទិញលក់សព្វាវុធរវាងកោះតៃវ៉ាន់ និង អាមេរិកនេះ អ្នកនាំពាក្យរបស់ក្រសួងការបរទេសចិនបាននិយាយថា ខ្លួនបានជំទាស់យ៉ាងដាច់ខាតចំពោះការលក់សព្វាវុធនេះ ហើយក៏បានរិះគន់ខ្លាំងទៅដល់ទីក្រុងវ៉ាស៊ីនតោនផងដែរ ។ អ្នកនាំពាក្យរូបនេះបន្តទៀតថា ការលក់នេះបានជ្រៀតជ្រែកក្នុងកិច្ចការផ្ទៃក្នុងរបស់ចិនហើយបានព្រមានថា ចិននឹងចាត់វិធានការឆ្លើយតបវិញនៅពេលដែលបញ្ហាវិវត្តកាន់តែធំឡើង។ នេះបើយោងតាមការចុះផ្សាយរបស់សារព័ត៌មានរ៉យទ័រ៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
