ខ្សែចង្វាក់ផ្គត់ផ្គង់បច្ចេកវិទ្យារបស់ចិន កំពុងឆ្ពោះទៅរកការប្រឈមមុខផ្ទួនៗនៃការធ្លាក់ចុះតម្រូវការ និងភាពចលាចលរបស់បុគ្គលិក ក្រោយការសម្រាលការគ្រប់គ្រងកូវីដ១៩ របស់រដ្ឋាភិបាលក្រុងប៉េកាំង។
សញ្ញាធំមួយសម្រាប់ឧស្សាហកម្មគ្រឿងបង្គុំអេឡិចត្រូនិចដែលផលិតនៅចិន គឺក្រុមហ៊ុន Apple បានជូនដំណឹងទៅអ្នកផ្គត់ផ្គង់របស់ខ្លួននៅក្នុងប្រទេសនេះ ឱ្យបន្ថយការផលិតគ្រឿងបង្គុំសម្រាប់ផលិតផល AirPods, នាឡិកាដៃ Apple Watch និងកុំព្យូទ័រ MacBooks នៅត្រីមាសទី១ ឆ្នាំ២០២៣នេះ ដោយសារតម្រូវការចុះខ្សោយ។
ក្រុមហ៊ុនផ្គត់ផ្គង់មួយសម្រាប់ Apple ឱ្យដឹងថា ក្រុមហ៊ុនបច្ចេកវិទ្យាយក្សមួយនេះ ត្រូវបានប្រាប់ពីការបន្ថយការបញ្ជាទិញសម្រាប់ខ្សែផលិតផលទាំងអស់ ចាប់តាំងពីចុងត្រីមាសទី៤ ឆ្នាំ២០២២មក ដោយសារតម្រូវការមិនខ្លាំងដូចមុនឡើយ។ ខ្សែចង្វាក់ផ្គត់ផ្គង់នៅចិន គឺនៅតែព្យាយាមដោះស្រាយជាមួយការកែប្រែគោលនយោបាយថ្មី ដែលបណ្តាលឱ្យមានកង្វះខាតពលកម្ម ដោយសារករណីឆ្លងកូវីដ១៩ កើនឡើង។
អត្ថបទគួរអាន
ចំណែកក្រុមហ៊ុនផ្គត់ផ្គង់គ្រឿងបង្គុំអេឡិចត្រូនិចមួយទៀតសម្រាប់ Samsung, Apple និងក្រុមហ៊ុនស្មាតហ្វូនចិន បានលើកឡើងថា ការកើនឡើងរលកថ្មីនៃជំងឺកូវីដ១៩ បានរាលដាលយ៉ាងរហ័ស ហើយក្រុមហ៊ុនភាគច្រើនបំផុតមិនចង់ធ្វើចត្តាឡីស័កបុគ្គលិករបស់ពួកគេឡើយ។
បើតាមការលើកឡើងរបស់លោកស្រី Alicia Garcia Herrero ប្រធានសេដ្ឋវិទូសម្រាប់តំបន់ប៉ាស៊ីហ្វិកនៅធនាគារ Natixis ឱ្យដឹងថា ផលប៉ះពាល់ការផលិតនៅក្នុងប្រទេសចិននេះ អាចនឹងមិនយូរឡើយក្រោយការបើកប្រទេសឡើងវិញ ប្រសិនបើទីក្រុងសំខាន់ៗអាចគ្រប់គ្រងស្ថានការណ៍នេះបាន។ ប៉ុន្តែ កង្វះខាតតម្រូវការខាងក្រៅឯណោះវិញទេ ដែលនឹងក្លាយជាកត្តាសំខាន់ជាង សម្រាប់វិស័យផលិតរបស់ចិន ក្នុងឆ្នាំ២០២៣នេះ។
ក្រុមហ៊ុន Foxconn នៅក្រុងចីងចូវ បាននឹងកំពុងប្រឈមការខ្វះខាតកម្លាំងពលកម្មក្រោយការផ្ទុះកូវីដ១៩ កាលពីចុងខែតុលា។ ចំណែកក្រុមហ៊ុនផ្គត់ផ្គត់បច្ចេកវិទ្យាដទៃទៀតដូចជា Jabil, Pagatron និង LY iTech ក៏បាននិងកំពុងជ្រើសរើសកម្មករ-និយោជិក បន្ទាប់ពីកម្មករជាច្រើនបានលាឈប់ដោយសារការផ្ទុះកូវីដ១៩ និងឈប់សម្រាកមុនចូលឆ្នាំថ្មីមកដល់។
យ៉ាងណាមិញ ក្រុមហ៊ុនមួយចំនួនក៏នៅមានសុទិដ្ឋិនិយមផងដែរ ដូចជាក្រុមហ៊ុនឈីបយក្សចិន SMIC បានរំពឹងថា ស្ថានភាពនឹងកាន់តែប្រសើរឡើងឡើងវិញ ចាប់ពីខែមីនាទៅ បន្ទាប់ពីការផ្ទុះកូវីដ១៩នឹងមានដល់ចំណុចកំពូលនៅត្រឹមក្នុងអំឡុងខែកុម្ភៈខាងមុខ។
ជាមួយគ្នានេះ ក្រុមហ៊ុនវិនិយោគឯកជន J&J Investment ក៏បង្ហាញសុទិដ្ឋិនិយមផងដែរ ចំពោះការបើកប្រទេសចិនឡើងវិញ ដោយគ្រាន់តែមានការអាក់ខានផ្គត់ផ្គង់ក្នុងរយៈពេលខ្លីតែប៉ុណ្ណោះ ពោលគឺក្នុងប៉ុន្មានត្រីមាសបន្ទាប់ សេដ្ឋកិច្ចនឹងចាប់ផ្តើមងើបឡើងវិញជាបណ្តើរៗ៕
