អាជ្ញាធរចិនអះអាងថា ស្ថានភាពឆ្លងរាលដាលកូវីដ១៩នៅក្រោយបុណ្យចូលឆ្នាំចិនមានក្នុងកម្រិតទាប

បន្ទាប់ពីរដ្ឋាភិបាលទីក្រុងប៉េកាំងបានបន្ធូរបន្ថយគោលនយោបាយសូន្យកូវីដដ៏តឹងរ៉ឹង កាលពី ខែធ្នូកន្លងទៅនេះ ការធ្វើដំណើរនៅក្នុង និងទៅក្រៅប្រទេសចិន អំឡុងពេលថ្ងៃឈប់សម្រាកនៃពិធីបុណ្យចូលឆ្នាំប្រពៃណីចិន បានកើនឡើងយ៉ាងខ្លាំងគួរឲ្យកត់សម្គាល់។ ដែលក្នុងនោះ មនុស្សរាប់លាននាក់បានធ្វើដំណើរតាមមធ្យោបាយផ្សេងៗដូចជាយន្តហោះ រថភ្លើង និងឡានក្រុង ជាដើម ដើម្បីទៅដើរកម្សាន្តនៅតំបន់ទេសចរណ៍នានា និងទៅស្រុកកំណើត។

មន្ត្រីក្រសួងដឹកជញ្ជូនចិនបានប្រាប់អ្នកយកព័ត៌មានថា ចំនួនអ្នកដំណើរប្រចាំឆ្នាំបានកើនឡើងដល់ ៨៩២លាននាក់ នៅចន្លោះពីថ្ងៃទី៧ ដល់ថ្ងៃទី២៩ ខែមករា ដែលចំនួននេះបានកើនឡើងប្រមាណ ៥៦% ធៀបទៅនឹងឆ្នាំ២០២២ ប៉ុន្តែបានធ្លាក់ចុះប្រមាណ ៤៧% ធៀបនឹងរយៈពេលដូចគ្នាកាលពីឆ្នាំ២០១៩ មុនពេលផ្ទុះកូវីដ១៩។

គួររំឭកថា កាលពីដើមខែធ្នូឆ្នាំ២០២២ រលកនៃការឆ្លងទូទាំងប្រទេសចិនបានរីករាលដាលយ៉ាងគំហុក នៅក្រោយពេលដែលប្រទេសចិនបើកទ្វារប្រទេសឲ្យមានការធ្វើដំណើរដោយគ្មានការរិតត្បិត។ ក្នុងនោះ អ្នកជំនាញក្នុងវិស័យសុខាភិបាលក៏បានព្រមានថា អាចមានដល់ទៅ ៨០% នៃប្រជាជនសរុប បានឆ្លងមេរោគនេះរួចទៅហើយ ដូចនេះវាក៏អាចបន្ធូរបន្ថយនូវលទ្ធភាពនៃការផ្ទុះឡើងវិញនៃជំងឺរាតត្បាត នៅក្នុងរយៈពេលប៉ុន្មានខែខាងមុខនេះបានដែរ។ ប៉ុន្តែ គេនៅតែមានការព្រួយបារម្មណ៍ពី ប្រជាជននៅតាមទីជនបទដាច់ស្រយាលដែលមិនសូវមានលទ្ធភាពព្យាបាលជំងឺគ្រប់គ្រាន់។

សូមជម្រាបថា កាលពីសប្តាហ៍មុន មជ្ឈមណ្ឌលគ្រប់គ្រង និងបង្ការជំងឺរបស់ប្រទេសចិន ហៅកាត់ថា CDC បាននិយាយថា ចំនួនអ្នកឆ្លងធ្ងន់ធ្ងរ និងចំនួនអ្នកស្លាប់បានធ្លាក់ចុះ ហើយគេក៏មិនបានរកឃើញប្រភេទរីរុសបម្លែងថ្មីដែរ។ ករណីជំងឺ COVID-19 នៅក្នុងប្រទេសចិនបានធ្លាក់ចុះចំនួន៧២% ពីកម្រិតកំពូលនៅដើមខែមករានេះ ខណៈដែលចំនួនអ្នកស្លាប់នៅក្នុងមន្ទីរពេទ្យបានធ្លាក់ចុះរហូតដល់ ៧៩%។

ទោះជាយ៉ាងណាក៏ដោយ អ្នកជំនាញបរទេសមួយចំនួននៅតែមានមន្ទិលថា ទិន្នន័យចំនួនអ្នកស្លាប់ដោយសារកូវីដ១៩ ដែលរដ្ឋាភិបាលចិនបានរាយការណ៍នោះ អាចមិនមែនជាចំនួនសរុបពិតប្រាកដនោះទេ ព្រោះគេមិនបានរាប់បញ្ចូលចំនួនអ្នកដែលស្លាប់នៅផ្ទះនោះឡើយ។ លើសពីនេះគ្រូពេទ្យខ្លះបាននិយាយថា ពួកគេត្រូវបានលើកទឹកចិត្ត មិនឲ្យរាប់ករណីស្លាប់មួយចំនួនដោយសារកូវីដ១៩ ជាមូលហេតុនៃការស្លាប់របស់អ្នកជំងឺនោះទេ៕

អត្ថបទដោយ៖ សារៀម លក្ខិណា