តើមាសបានរួមចំណែកសំខាន់យ៉ាងណាក្នុងការជួយជំរុញកំណើនសេដ្ឋកិច្ច និងភាពសម្បូរសប្បាយក្នុងសង្គមថៃ?

នេះបើយោងតាមការចុះផ្សាយរបស់សារព័ត៌មាន បាងកក ប៉ុស្ដិ៍  

ទោះបីស្ថានភាពសង្គមរបស់ថៃ ចេះតែវិវត្តទៅមុខឥតឈប់ឈរ មាសនៅតែបន្តជាផ្នែកមួយដ៏សំខាន់នៃជីវិតរបស់ពលរដ្ឋថៃ ដែលកត្តានេះបានជំរុញឱ្យតម្រូវការប្រើប្រាស់មាសនៅក្នុងប្រទេសក្បែរខាងកម្ពុជា មួយនេះ កើនឡើងខ្ពស់បំផុតក្នុងចំណោមបណ្ដាប្រទេសសមាជិកអាស៊ាននៅ២ត្រីមាសជាប់គ្នាក្នុងឆ្នាំ២០២៤ ដែលនេះឆ្លុះបញ្ចាំងឱ្យឃើញថា មាសនៅតែជាវត្ថុសំខាន់ទាំងផ្នែកវប្បធម៌ និងសេដ្ឋកិច្ច។

ជាមួយគ្នានេះ មាស ក៏បានរួមចំណែកជួយឱ្យពលរដ្ឋថៃ ទទួលបានសេវាហិរញ្ញវត្ថុកាន់តែប្រសើរឡើងផងដែរ ដោយធ្វើឱ្យពួកគេមានលទ្ធភាពប្រើប្រាស់ប្រព័ន្ធប្រាក់បញ្ញើសន្សំ ប្រព័ន្ធឥណទាន និងប្រព័ន្ធទូទាត់។ ទោះបីជាពលរដ្ឋថៃរហូតដល់ទៅ៩៥,៦% មានគណនីធនាគារប្រើប្រាស់គិតត្រឹមឆ្នាំ២០២១យ៉ាងណាក៏ដោយ ក៏លទ្ធភាពទទួលបានឥណទាននៅមានកម្រិតនៅឡើយ ជាហេតុធ្វើឱ្យការផ្តល់ប្រាក់កម្ចីក្រៅផ្លូវការ ឬការចងការប្រាក់កើនឡើងខ្ពស់។ ជាការពិតណាស់ មាសនឹងធ្វើជាស្ពានតភ្ជាប់គម្លាតនេះ ជាពិសេសនៅតាមតំបន់ជនបទដែលហាងបញ្ចាំនានាទទួលយកមាសជាទ្រព្យបញ្ចាំ ឬទ្រព្យធានាសម្រាប់ការផ្ដល់ប្រាក់កម្ចី ហើយមាសបានគ្របដណ្ដប់រហូតដល់ទៅ៨៨%នៃទ្រព្យបញ្ចាំទាំងអស់នៅក្នុងឆ្នាំ២០២៣។

ប្រទេសថៃ បានទទួលយកគំនិតផ្តួចផ្តើមមាសឌីជីថល ដែលសំដៅដល់ការជួញដូរមាសនៅលើ Platform អនឡាញដូចជានៅលើកម្មវិធី ឬ App ប៉ាវ តាំង (Pao Tang App) ជាដើម ដែលគណនីជួញដូរមាសឌីជីថលថ្មីៗនៅលើ App មួយនេះបានកើនឡើង៧០% កាលពីដើមឆ្នាំ២០២៣។ នវានុវត្តន៍ ឬ បច្ចេកវិទ្យាថ្មីៗទាំងនេះបានជួយបញ្ជ្រាបឱ្យមាសទៅដល់មនុស្សកាន់តែច្រើន និងបញ្ចូលវាទៅក្នុងប្រព័ន្ធហិរញ្ញវត្ថុសម័យទំនើប។

ភាពគួរឱ្យជឿជាក់របស់មាសបានធ្វើឱ្យមាសកាន់តែមានភាពទាក់ទាញ ដោយជាង៦០%នៃអតិថិជនជាអ្នកប្រើប្រាស់ទូទាំងពិភពលោកជឿជាក់លើមាសជាងរូបិយបណ្ណសម្រាប់ការពារហានិភ័យពីអតិផរណា។ បណ្ដាគ្រឹះស្ថានធនាគារ និងធនាគារកណ្ដាលទូទាំងពិភពលោក ក៏បានប្រើមាសសម្រាប់រក្សាស្ថិរភាពហិរញ្ញវត្ថុផងដែរ តាមរយៈការផ្ដល់ផលិតផលធនាគារដូចជាគណនីសន្សំមាស ដែលអនុញ្ញាតឱ្យម្ចាស់គណនីសន្សំ និងវិនិយោគលើមាសជាដើម។

អ្នកជំនាញមើលឃើញថា នៅឆ្នាំ២០២៥ ខាងមុខ មាសនឹងនៅតែជាឧបករណ៍ហិរញ្ញវត្ថុដ៏គួរឱ្យជឿទុកចិត្ត ដែលនឹងជួយជំរុញកំណើនសេដ្ឋកិច្ចរបស់ប្រទេសថៃ ប្រកបដោយស្ថិរភាព សុវត្ថិភាព និងផលចំណេញ ស្របពេលពិភពលោកស្ថិតក្នុងភាពមិនប្រាកដប្រជា៕

ដោយ: តែម សុខុម