លោកបណ្ឌិត ហុង វណ្ណៈ អ្នកសិក្សាស្រាវជ្រាវសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជាកត់សម្គាល់ឃើញថា ការប្រើប្រាស់ប្រាក់រៀលនៅ១ទសវត្សរ៍កន្លងមកនេះហាក់មានស្ថិរភាពល្អនៅក្នុងទីផ្សារ ខណៈអត្រាប្ដូរប្រាក់ស្ថិតក្នុងចន្លោះបម្រែបម្រួលពី៤ពាន់រៀល ទៅ៤ពាន់១៥០រៀលក្នុង១ដុល្លារអាម៉េរិក ដែលធ្វើឱ្យអ្នកប្រើប្រាស់ប្រាក់រៀលទទួលបានផលចំណេញជាងការប្រើប្រាស់ប្រាក់ដុល្លារ ដែលកំពុងធ្លាក់ថ្លៃ។ សម្រាប់អ្នកជំនាញរូបនេះ នៅពេលប្រាក់រៀលមានស្ថិរភាពល្អបានធ្វើឱ្យការប្រើប្រាស់មានភាពងាយស្រួលក្នុងទីផ្សារ ខណៈការចរាចរប្រាក់រៀលច្រើននឹងធ្វើឱ្យតម្លៃប្រាក់រៀលមានការកើនឡើង ហើយពលរដ្ឋកាន់តែមានទំនុកចិត្ត។
ជាមួយគ្នានេះលោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពកត់សម្គាល់ឃើញថា ទំនោរនៃការប្រើប្រាស់ប្រាក់រៀលនៅកម្ពុជានាពេលបច្ចុប្បន្នហាក់មានការកើនឡើងនិងមានភាពងាយស្រួលចាយជាងប្រាក់ដុល្លារ ដោយសារការដោះដូរមិនសូវមានភាពសាំញុំាដូចប្រាក់ដុល្លារ។ អ្នកជំនាញរូបនេះបានសង្កត់ធ្ងន់ថា ទោះបីកម្មវិធី KHQR Code បានជួយសម្រួលឱ្យការចាយប្រាក់រៀលកាន់តែមានភាពងាយស្រួលយ៉ាងណាក៏ដោយ តែប្រាក់ដុល្លារអាម៉េរិកនៅតែមានចរាចរច្រើននៅក្នុងចរន្តសេដ្ឋកិច្ចនៅកម្ពុជា។ សម្រាប់លោក យង់ គិមអេង ការរក្សាបានស្ថិរភាពតម្លៃប្រាក់រៀលបានរួមចំណែកយ៉ាងសំខាន់ក្នុងការជួយគាំទ្រដល់សេដ្ឋកិច្ច និងការធ្វើពាណិជ្ជកម្មរបស់កម្ពុជា។
ដោយឡែកលោកជំទាវ ជា សិរី ទេសាភិបាលធនាគារជាតិនៃកម្ពុជាបានបញ្ជាក់កាលពីទៅកន្លងទៅថា ការប្រើប្រាស់ប្រាក់រៀលកាន់តែច្រើននៅក្នុងចរន្តសេដ្ឋកិច្ច វានឹងជួយពង្រឹងអធិបតេយ្យជាតិ និងការកសាងសង្គមជាតិឱ្យកាន់តែរីកចម្រើន និងប្រកបដោយនិរន្តរភាព។ ដើម្បីលើកកម្ពស់ការប្រើប្រាស់ប្រាក់រៀល លោកជំទាវ ស្នើឱ្យក្រសួង-ស្ថាប័ន គ្រឹះស្ថានធនាគារ និងហិរញ្ញវត្ថុ រោងចក្រ ក្រុមហ៊ុន-សហគ្រាស ម្ចាស់អាជីវកម្ម ប្រជាពលរដ្ឋទូទៅ និងភាគីពាក់ព័ន្ធបន្តរួមចំណែកប្រើប្រាស់ប្រាក់រៀលនៅក្នុងប្រតិបត្តិការរបស់ខ្លួនឱ្យកាន់តែច្រើនឡើង ដូចជាតាមរយៈការទូទាត់ ការបិទស្លាកតម្លៃទំនិញ និងសេវានានា ការផ្តល់ឥណទាន និងការសន្សំជាប្រាក់រៀល ព្រមទាំងផ្ដល់លក្ខខណ្ឌអនុគ្រោះឱ្យបានច្រើនចំពោះការប្រើប្រាស់ប្រាក់រៀល។
ជាមួយគ្នានេះលោក រ័ត្ន សោភ័ណ ប្រធានសមាគមធនាគារនៅកម្ពុជាធ្លាប់បានវាយតម្លៃថា ការរក្សាបាននូវស្ថិរភាពប្រាក់រៀល ពិតជាមានសារសំខាន់ណាស់សម្រាប់ជួយធានាស្ថិរភាពសេដ្ឋកិច្ចជាតិ។ លើសពីនេះការរក្សាបានស្ថិរភាពប្រាក់រៀល វានឹងជួយធ្វើឱ្យប្រជាពលរដ្ឋកាន់តែមានទំនុកចិត្តលើប្រាក់រៀល និងមិនភ័យខ្លាចនៅពេលដែលអត្រាប្តូរប្រាក់ដុល្លារមានការប្រែប្រួលឡើងចុះខ្លាំង ដ្បិតថា ផ្នត់គំនិតនៃការភ័យខ្លាចនេះ វាក៏ជះផលអវិជ្ជមានដល់សេដ្ឋកិច្ចផងដែរ។
គួរបញ្ជាក់ថា នៅក្នុងរយៈពេលជាង៤០ឆ្នាំកន្លងមកនេះ វត្តមានរបស់ប្រាក់រៀលបានរួមចំណែកយ៉ាងសំខាន់ក្នុងការជួយស្តារ និងកសាងអធិបតេយ្យភាព សេដ្ឋកិច្ច និងសង្គមជាតិ។ ការប្រើប្រាស់ប្រាក់រៀលកាន់តែច្រើននឹងផ្តល់លទ្ធភាពដល់ធនាគារជាតិនៃកម្ពុជា ក្នុងការអនុវត្តនយោបាយរូបិយវត្ថុ និងអត្រាប្តូរប្រាក់កាន់តែមានប្រសិទ្ធភាព ជាពិសេសការកំណត់អត្រាការប្រាក់គោល និងការផ្តល់សាច់ប្រាក់បន្ថែមដល់សេដ្ឋកិច្ច ដែលអាចមានឥទ្ធិពលទៅលើអត្រាការប្រាក់ទីផ្សារ ការវិនិយោគ ការប្រើប្រាស់ និងស្ថិរភាពថ្លៃផងដែរ៕
អត្ថបទ៖ បូ ដូឡា,រូបភាព ឯកសារ
