របាយការណ៍ដដែលឱ្យដឹងទៀតថា កំណើនទំហំសេដ្ឋកិច្ចឌីជីថលរបស់អាស៊ាននៅឆ្នាំនេះ គឺហក់ឡើងលឿនជាងការរំពឹងទុកដល់ទៅ៣ឆ្នាំ ខណៈបើធៀបនឹងឆ្នាំមុនឆ្នាំ២០២១ ទំហំសេដ្ឋកិច្ចឌីជីថលមានត្រឹម ១៦១ពាន់លានដុល្លារប៉ុណ្ណោះ ពោលគឺបានកើនឡើងដល់ទៅ ២០%។
ដោយឡែកក្នុងចំណោមប្រទេសទាំង១០ក្នុងតំបន់របាយការណ៍ខាងលើបានកត់សម្គាល់ពី ប្រទេសខ្លាសេដ្ឋកិច្ចទាំង៦ក្នុងតំបន់ រួមមានប្រទេសឥណ្ឌូនេស៊ី ម៉ាឡេស៊ី ហ្វីលីពីន សិង្ហបុរី ថៃ និង ប្រទេសវៀតណាម គឺជាប្រទេសមានសន្ទុះសេដ្ឋកិច្ចឌីជីថលខ្លាំងជាងគេ។ ជាក់ស្តែង បើតាមការប៉ាន់ស្មាន ប្រទេសធំៗទាំង៦នេះនឹងឈានទៅសម្រេចបានទំហំសេដ្ឋកិច្ចឌីជីថលដល់ ២០០ពាន់លានដុល្លារក្នុងតម្លៃទំនិញសរុប គិតត្រឹមឆ្នាំ២០២៥។
ក្នុងចំណោមប្រទេសទាំង៦ខាងលើ វៀតណាម ជាប្រទេសនាំមុខជាងគេ ជាមួយនឹងការព្យាករកំណើន ៣១% នៃបរិមាណទំនិញសរុប ពីតម្លៃ ២៣ពាន់លានដុល្លារក្នុងឆ្នាំ ២០២២ ដល់តម្លៃ៤៩ពាន់លានដុល្លារក្នុងឆ្នាំ២០២៥។ ប្រទេសហ្វីលីពីនជាអ្នកតាមពីក្រោយ ដោយព្យាករកំណើនពីតម្លៃ ២០ពាន់លានដុល្លារក្នុងឆ្នាំ ២០២២ ដល់ ៣៥ពាន់លានដុល្លារក្នុងឆ្នាំ ២០២៥។
ទន្ទឹមនឹងនេះ ទំហំសេដ្ឋកិច្ចឌីជីថលរបស់ប្រទេសទាំង៦ដដែល ត្រូវបានព្យាករថា នឹងកើនដល់១ទ្រីលានដុល្លារនៅឆ្នាំ ២០៣០ ប្រសិនបើក្រុមហ៊ុននានាផ្តោតលើប្រាក់ចំណេញកាន់តែច្រើនសម្រាប់រយៈពេលបីឆ្នាំខាងមុខ។ ការទិញទំនិញតាមប្រព័ន្ធអនឡាញ ត្រូវបានរំពឹងថា មានសន្ទុះកើនឡើងខ្លាំង ហើយនិងក្លាយជាទម្លាប់មួយរបស់អ្នកប្រើប្រាស់នាពេលអនាគត។
អត្ថបទគួរអាន
ទោះយ៉ាងណារបាយការណ៍របស់ e-Conomy SEA 2022 មិនបានលម្អិតពីទិន្នន័យក្នុងប្រទេសតូចៗដែលនៅសេសសល់ក្នុងតំបន់ឡើយ រួមមាន ប្រ៊ុយណេ កម្ពុជា ឡាវ និងមីយ៉ាន់ម៉ា ហើយសូម្បីតែប្រទេសដែលនៅក្បែរតំបន់ដូចជា ទីម័រខាងកើតនិង ប៉ាពួញូហ្គីណេ ក៏របាយការណ៍មិនបានបញ្ជាក់ដែរ។
ក្រៅតែពីទំហំសេដ្ឋកិច្ចឌីជីថល ដែលវាស់វែងដោយទំហំប្រតិបត្តិការលើប្រមាណទំនិញសរុប (GMV) ចំនួនអ្នកប្រើប្រាស់អ៊ីធឺណែតនៅក្នុងតំបន់មួយនេះ មានកំណើនអ្នកប្រើប្រាស់ថ្មីៗជាង ២០លាននាក់បន្ថែមទៀតក្នុងឆ្នាំ២០២២នេះ ធ្វើឱ្យអ្នកប្រើប្រាស់អ៊ីនធឺណែតសរុបបានកើនដល់ ៤៦០លាននាក់។ យ៉ាងណាមិញ នេះជាចំនួនមួយដែលបង្ហាញពីកំណើនយឺត ដោយវាបានកើនឡើងត្រឹមតែ៤%ប៉ុណ្ណោះក្នុងឆ្នាំ២០២២ បើធៀបនឹងឆ្នាំមុន ដែលមានកំណើនដល់ ១០% និងកំណើន ១១% កាលពីឆ្នាំ២០២០ ជាគ្រាដែលជំងឺរាតត្បាតកូវីដ១៩កំពុងវាយលុកខ្លាំង៕
