ទឡ្ហីករណ៍ទាំងនេះធ្វើឡើងបន្ទាប់ពីប្រធានាធិបតីសហរដ្ឋអាមេរិកលោក ចូ បៃដិន ចាត់ទុកប្រទេសចិនគឺជា «ការប្រកួតប្រជែងមួយដ៏លឿន» ហើយបានស្នើឱ្យបង្កើនថវិកាការពារជាតិអាមេរិកក្នុងទឹកប្រាក់ប្រមាណ ៨៦៦ ពាន់លានដុល្លារ សម្រាប់ឆ្នាំ២០២៤ ដោយក្នុងនោះ ៨៤២ ពាន់លានដុល្លារនឹងត្រូវប្រើប្រាស់ដោយមន្ទីរបញ្ជកោណអាមេរិក។ ប្រសិនបើកញ្ចប់ថវិកាការពារជាតិនេះ ត្រូវបានយល់ព្រមដោយសភាអាមេរិកតាមសំណើរបស់លោក ចូ បៃដិន មែននោះ វានឹងក្លាយជាការចំណាយជាប្រវត្តិសាស្ត្រដ៏ច្រើនបំផុតក្នុងពេលសន្តិភាពសម្រាប់យោធាអាមេរិក ដោយលើសពីការចំណាយ ៣,២% ធៀបនឹងឆ្នាំមុន។
រដ្ឋមន្ត្រីការពារជាតិអាមេរិកលោក Lloyd Austin បាននិយាយថា ការចំណាយថ្មីនេះនឹងក្លាយទៅជាការវិនិយោគដ៏ធំបំផុតសម្រាប់រក្សា និងពង្រឹងគុណសម្បត្តិយោធារបស់អាមេរិកលើប្រទេសចិន។ ដើម្បីរក្សាបានអត្ថប្រយោជន៍នេះ បញ្ជាការដ្ឋានប្រចាំឥណ្ឌូប៉ាស៊ីហ្វិករបស់អាមេរិកបាននិងកំពុងបង្កើនសមត្ថភាពការពារ និងរារាំងរបស់ខ្លួនប្រឆាំងនឹងទីក្រុងប៉េកាំង រួមទាំងសព្វាវុធ ហេដ្ឋារចនាសម្ព័ន្ធថ្មីៗ ព្រមទាំងទំនាក់ទំនងកាន់តែស៊ីជម្រៅជាមួយប្រទេសសម្ព័ន្ធមិត្តនៅក្នុងតំបន់ផងដែរ។
យ៉ាងណាមិញ ប្រទេសចិនក៏មិនឈរឱបដៃនៅស្ងៀមមើលអាមេរិកនោះដែរ ដោយកាលពីកិច្ចប្រជុំសភាកាលពីដើមខែនេះ បានប្រកាសពីការចំណាយលើយោធាប្រចាំឆ្នាំដល់ទៅជាង ២២៤ ពាន់លានដុល្លារ លើការធ្វើទំនើបកម្ម និងពង្រីកបច្ចេកវិទ្យាយោធាទំនើបដើម្បីធ្វើយ៉ាងណា រត់តាមឱ្យទាន់មហាអំណាចយោធាផុតលេខអាមេរិក។
អត្ថបទគួរអាន
យោងតាមលោក Malcolm Davis អ្នកវិភាគជាន់ខ្ពស់នៅវិទ្យាស្ថានគោលនយោបាយយុទ្ធសាស្ត្រអូស្ត្រាលីបាននិយាយថា សហរដ្ឋអាមេរិកបាននិងកំពុងព្យាយាមអភិវឌ្ឍយុទ្ធសាស្ត្រយោធាបន្ថែម ដើម្បីឆ្លើយតបនឹងប្រទេសចិន។
លោក ដាវីស បានគូសបញ្ជាក់ថា៖ គេកំពុងមើលឃើញពីការចាប់ផ្តើមនៃប្រកួតប្រជែងនៃការវាយប្រហារដោយមីស៊ីលនៅក្នុងតំបន់ ជាមួយនឹងអ្វីដែលសហរដ្ឋអាមេរិក ត្រូវតែធ្វើឱ្យប្រាកដថា ខ្លួនចាំបាច់ត្រូវតែការពារទីតាំងយុទ្ធសាស្ត្រក្នុងរយៈចម្ងាយមួយ ជាជាងកន្លែងដែលនាវាចម្បាំង និងយន្តហោះរបស់ខ្លួនកំពុងឈរជើងនៅក្នុងដែនអំណាចយោធាបិទជិតរបស់ចិន»។
ដោយឡែក បើតាមលោក Raymond Kuo អ្នកជំនាញផ្នែកសន្តិសុខតំបន់អាស៊ីបូព៌ាប្រចាំនៅវិទ្យាស្ថានស្រាវជ្រាវសិក្សា Rand Corporation របស់សហរដ្ឋអាមេរិកបានឱ្យដឹងថា ប្រសិនបើកញ្ចប់ថវិកាយោធានោះនឹងចូលជាធរមានមែននោះ វានឹងមានសារៈសំខាន់ណាស់សម្រាប់យោធាអាមេរិកក្នុងការធ្វើឲ្យមានអាទិភាពចម្បងនៅអាស៊ីប៉ាស៊ីហ្វិក។ លោក រ៉ាយមុនដ៍ បានសង្កត់ធ្ងន់ថា៖ «នៅអំឡុងពេលសង្គ្រាមប្រឆាំងភេរវកម្ម» សហរដ្ឋអាមេរិកបានសំដៅ និងផ្តោតសំខាន់តែទៅលើតំបន់មជ្ឈិមបូព៌ា និងអាស៊ីកណ្តាល ប៉ុន្តែឥឡូវនេះ ទីក្រុងវ៉ាស៊ីនតោនបាននិងកំពុងបង្កើន «ឥរិយាបទសកម្ម» នៅក្នុអាស៊ីប៉ាស៊ីហ្វិក រួមទាំងការពង្រីកមូលដ្ឋានយោធាជាដើម។
ទោះជាយ៉ាងណា លោកមើលឃើញថា ប្រទេសចិននឹងបន្តបណ្ដាក់ទុនលើការធ្វើទំនើបកម្មយោធារបស់ខ្លួនទាំងសមត្ថភាពវាយប្រហារធម្មតា ក៏ដូចជាផ្នែកលំហរអ៊ីនធឺណិត និងលំហរអាកាស។ ប៉ុន្តែក្នុងពេលជាមួយគ្នានោះ ទីក្រុងប៉េកាំងក៏នឹងសម្លឹងមើលការពង្រីកទំនាក់ទំនងសេដ្ឋកិច្ចជាមួយប្រទេសនៅក្នុងតំបន់មួយចំនួនផងដែរ ដើម្បីកាត់បន្ថយកិច្ចសហប្រតិបត្តិការរបស់ពួកគេជាមួយសហរដ្ឋអាមេរិក៕
