បន្ថែមពីនេះ ឧបករណ៍ និងបណ្ដាញ 5G របស់ក្រុមហ៊ុនចិនមួយនេះ ក៏ត្រូវបានអាមេរិក និងកាណាដា ហាមឃាត់ដំឡើងប្រើប្រាស់នៅក្នុងប្រទេសទាំងនេះផងដែរ។ នេះបើតាមការរាយការណ៍ពីសារព័ត៌មានអន្តរជាតិធំៗជាច្រើន។
លោក Boham Sun ប្រធានក្រុមហ៊ុន Huawei Digital Power Asia-Pacific បាននិយាយថា ការរីកចម្រើននៃអាជីវកម្មថាមពលឌីជីថលរបស់ក្រុមហ៊ុន Huawei ដែលមានឧបករណ៍សំខាន់ៗដូចជា ឧបករណ៍បំប្លែងថាមពលអគ្គិសនី និងប្រព័ន្ធប្រសិទ្ធភាពថាមពលផ្អែកលើបច្ចេកវិទ្យា AI ក្នុងការផ្គត់ផ្គង់ដល់គ្រឿងបរិក្ខារ តាមរយៈការប្រើប្រាស់ថាមពលពន្លឺព្រះអាទិត្យ និង មជ្ឈមណ្ឌលទិន្នន័យនឹជាដើម ដែលទាំងអស់នេះ នឹងរួមចំណែកយ៉ាងធំធេងដល់ការរីកលូតលាស់ និង ការអភិវឌ្ឍរបស់ក្រុមហ៊ុនយក្ស Huawei ។
អត្ថបទគួរអាន
លោក Boham Sum បានគូសបញ្ចាក់ថា តំបន់អាស៊ីប៉ាស៊ីហ្វិក គឺជាទីផ្សារដែលមានសក្តានុពលធំបំផុត សម្រាប់អាជីវកម្មថាមពលឌីជីថលរបស់ក្រុមហ៊ុននេះ ដោយសារតែ ប្រទេសទាំងអស់នៅក្នុងតំបន់កំពុងចូលរួមយ៉ាងសកម្មនៅក្នុងការអនុវត្តថាមពល អព្យាក្រឹតកាបូន និង ថាមពលបៃតង។
គួររំឭកថា ក្រុមហ៊ុន Huawei ត្រូវបានដាក់កម្រិតមិនឱ្យទិញបច្ចេកវិទ្យាសំខាន់ៗរបស់អាមេរិក ខណៈការហាមឃាត់នេះបានប៉ះពាល់យ៉ាងខ្លាំងដល់អាជីវកម្មស្មាតហ្វូនរបស់ក្រុមហ៊ុននេះ។ ទន្ទឹមនឹងនោះ សហរដ្ឋអាមេរិក និង ប្រទេសលោកខាងលិចមួយចំនួនទៀតក៏បានហាមឃាត់ការប្រើប្រាស់ឧបករណ៍ 5G របស់ក្រុមហ៊ុន Huawei នៅក្នុងហេដ្ឋារចនាសម្ព័ន្ធទំនាក់ទំនងរបស់ពួកគេផងដែរ។
ក្រុមហ៊ុន Huawei នៅក្នុងខែមីនាបានរាយការណ៍ពីប្រាក់ចំណូលសរុបមានប្រមាណ ១០០ ពាន់លានដុល្លារ ក្នុងឆ្នាំ ២០២១ ដែលមានការធ្លាក់ចុះជិត៣០% បើធៀបក្នុងឆ្នាំ ២០២០។
គួរកត់សម្គាល់ថា ក្រុមហ៊ុន Huawei ត្រូវបានគេស្គាល់ថា ជាក្រុមហ៊ុនផលិតឧបករណ៍ទូរគមនាគមន៍ និង ស្មាតហ្វូន ប៉ុន្តែ ក្រុមហ៊ុននេះ ក៏មានចំណែកទីផ្សារពិភពលោកដ៏សំខាន់សម្រាប់ការផលិតឧបករណ៍បំប្លែងថាមពលអគ្គីសនី ដែលជាឧបករណ៍ដ៏សំខាន់ដែលប្រើក្នុងអាជីវកម្មថាមពលពន្លឺព្រះអាទិត្យ និង មជ្ឈមណ្ឌលទិន្នន័យផងដែរ។ តួរយ៉ាង អាជីវកម្មថាមពលឌីជីថលរបស់ក្រុមហ៊ុន Huawei មានបុគ្គលិកប្រហែល ៦ ពាន់នាក់ ជាមួយនឹងមជ្ឈមណ្ឌលស្រាវជ្រាវ និង អភិវឌ្ឍន៍ចំនួន ១២ នៅក្នុងប្រទេសចិន អឺរ៉ុប និង អាស៊ី។
គួរជម្រាបថា អាជីវកម្មថាមពលឌីជីថលបាននឹងកំពុងរុញចូលទៅក្នុងអាស៊ីប៉ាស៊ីហ្វិក ខណៈ ក្រុមហ៊ុនផ្គត់ផ្គង់ថាមពលស្អាត Sunseap នៅប្រទេសសិង្ហបុរីក៏កំពុងប្រើប្រាស់ឧបករណ៍ និង បច្ចេកវិទ្យារបស់គម្រោងថាមពលពន្លឺព្រះអាទិត្យរបស់ Huaweiផងដែរ ។
លោក Boham Sun បានអះអាងថា មានតម្រូវការជាច្រើនទៀតសម្រាប់អាជីវកម្មមួយនេះ កំពុងមាននៅក្នុងតំបន់អាស៊ីប៉ាស៊ីហ្វិក ដែលរួមមាន ប្រទេសជប៉ុន កូរ៉េខាងត្បូង ឥណ្ឌូនេស៊ី ថៃ និងវៀតណាមជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
