រហូតមកទល់ពេលនេះ ចិនបានចាក់វ៉ាក់សាំងជូនពលរដ្ឋខ្លួនជាង១ពាន់លានដូសហើយ ខណៈដែលការចាក់វ៉ាក់សាំងបានលឿននេះ ត្រូវបានគេមើលឃើញថា គឺជាកម្លាំងចលករដ៏សំខាន់មួយ ក្នុងការជួយរុញនាវាសេដ្ឋកិច្ចនៃប្រទេសនីមួយៗ ឲ្យងើបចេញពីវិបត្តិមេរោគកូវីដ-១៩ បានលឿនដែរ។
របាយការណ៍របស់ធនាគារពិភពលោកបានកត់សម្គាល់ឃើញនូវសញ្ញាវិជ្ជមានបន្ថែមទៀតនៃសេដ្ឋកិច្ចចិន ដែលជាប្រទេសមានសេដ្ឋកិច្ចរីកចម្រើន ដំបូងគេ ដែលបានងើបឡើងវិញពីវិបត្តិមេរោគរាតត្បាត។
សកម្មភាពរោងចក្រ និង អ្នកប្រើប្រាស់នៅប្រទេសចិន បានត្រឡប់មករក កម្រិតដូចកាលមុនពេលមានមេរោគរាតត្បាតវិញហើយ បើទោះបីជាអាជ្ញាធរបានដាក់ការរឹតត្បិតលើការធ្វើដំណើរនៅក្នុងតំបន់ខ្លះ ដើម្បីទប់ស្កាត់ការឆ្លងកូវីដ-១៩ បំប្លែងថ្មីក៏ដោយ។
បើតាមការព្យាកររបស់ធនាគារពិភពលោក បន្ទាប់ពីកើនឡើងដល់កំណើន៨,៥% នៅឆ្នាំ២០២១នេះ សេដ្ឋកិច្ចចិនទំនងជាថមថយកំណើនមកវិញនៅត្រឹម ៥,៤%វិញ នៅឆ្នាំ២០២២។
ការព្យាកររបស់ធនាគារពិភពលោក បានលើកឡើងថា មានតែប្រទេសចិន និងវៀតណាមប៉ុណ្ណោះ នៃប្រទេសតំបន់អាស៊ី ដែលមានការងើបឡើងវិញនៃសេដ្ឋកិច្ចក្នុងទម្រង់ជាអក្សរវី (V) មានន័យថាមានការធ្លាក់ចុះលឿន តែងើបឡើងវិញលឿនរហ័ស ត្រឡប់មករកស្ថានភាពដូចមុនពេលមិនទាន់មានផ្ទុះកូវីដ-១៩វិញ។
សូមបញ្ជាក់ថា ប្រទេសចិន កំពុងដំណើរការចាក់វ៉ាក់សាំងកូវីដ-១៩ យ៉ាងសកម្មភាពសម្រាប់ប្រជាជនរបស់ខ្លួនឲ្យបានដល់ ៤០% នៅត្រឹមដើមរដូវក្ដៅនេះ នៅគ្រាដែលធនាគារពិភពលោក បានគូសបញ្ជាក់ថា ការងើបឡើងវិញពេញលេញនៃសេដ្ឋកិច្ច គឺត្រូវការការបន្ដដំណើរការចាក់វ៉ាក់សាំងឲ្យបានលឿន និងទូលំទូលាយសម្រាប់ប្រជាជនរបស់ប្រទេសនីមួយ។
អត្ថបទគួរអាន
ទិន្នន័យស្ដីពីការចាក់វ៉ាក់សាំងសកលលោកដែលរៀបចំឡើងដោយសារព័ត៌មាន Bloomberg បានឲ្យដឹងថា គិតត្រឹមដំណាច់ខែមិថុនាឆ្នាំ២០២២១ ពិភពលោកមានការចាក់វ៉ាក់សាំងកូវីដ-១៩ បានជាង៣ពាន់លានដូសហើយ ដោយក្នុងនោះ មាន១៨០ប្រទេសបានចាក់វ៉ាក់សាំង ដោយក្នុងនោះមួយថ្ងៃៗប្រទេសទាំងអស់នោះ ចាក់បានប្រហែលជាង ៤៣លានដូស។
ក្នុងចំណោមនោះ ប្រទេសចិនមានការចាក់វ៉ាក់សាំងបានច្រើនជាងគេមានដល់ទៅ ជាង១ពាន់២រយលានដូសហើយ បន្ទាប់មកគឺអឺរ៉ុបចាក់បានប្រមាណ ៣៦០លានដូស ឥណ្ឌា មានជាង៣៣២លានដូស និងអាមេរិកមានជាង៣២៥លានដូស។ ស្របពេលដែលពិភពលោក កំពុងសម្រេចបានការចាក់វ៉ាក់សាំងបានកាន់តែច្រើន ប៉ុន្ដែ បញ្ហាមេរោគកូវីដ-១៩ បំប្លែងថ្មី នៅតែជាបញ្ហាចោទដ៏សំខាន់មួយសម្រាប់ពិភពលោកទាំងមូល ដ្បិតថាមេរោគបាននិងកំពុងបន្ដរាតត្បាតខ្លាំងនៅប្រទេសមួយចំនួន បើទោះបីជាប្រទេសខ្លះបានចាក់វ៉ាក់សាំងការពារគ្រប់ចំនួនដូសហើយក្ដី ក៏នៅតែប្រឈមនឹងការផ្ទុះរាលដាលមេរោគបំប្លែងថ្មីនេះដែរ តួយ៉ាងដូចនៅប្រទេសអ៊ីស្រាអែល និង អង់គ្លេសជាដើមនៅពេលនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
