ឯកឧត្តម រស់ ភីរុណ អគ្គលេខាធិការនៃគណៈកម្មការគ្រប់គ្រងល្បែងពាណិជ្ជកម្មកម្ពុជា បានគូសបញ្ជាក់ថា ការរីកដុះដាល់នៃល្បែងស៊ីសងអនឡាញខុសច្បាប់ កំពុងបង្កការរំខាន និងប៉ះពាល់ដល់ល្បែងពាណិជ្ជកម្មស្របច្បាប់ តាមរយៈការធ្វើឱ្យចំណូលធ្លាក់ចុះ និងប៉ះពាល់ដល់ការចំណាយប្រតិបត្តិការ។ លើសពីនេះ បញ្ហានេះ ក៏បានធ្វើឱ្យប៉ះពាល់ដល់ផែនការប្រមូលចំណូលក្នុងវិស័យល្បែងពាណិជ្ជកម្មចូលរដ្ឋផងដែរ។ បើតាមការអះអាងរបស់មន្រ្តីជាន់ខ្ពស់រូបនេះ រាល់ល្បែងអនឡាញទាំងអស់សុទ្ធតែជាល្បែងខុសច្បាប់ ពោលគឺរាជរដ្ឋាភិបាលពុំដែលផ្តល់អាជ្ញាបណ្ណឱ្យល្បែងប្រភេទនេះនោះទេ។
ពាក់ព័ន្ធនឹងផែនការប្រមូលចំណូលចូលក្នុងថវិកាជាតិ ត្រូវបានមន្រ្តីជាន់ខ្ពស់រូបនេះគូសបញ្ជាក់ថា ប្រសិនបើមិនមានការប្រែប្រួលទេ រដ្ឋាភិបាលមានផែនការដំឡើងច្បាប់ថវិកាប្រមូលចំណូលពន្ធពីអាជីវកម្មល្បែងពាណិជ្ជកម្មនៅក្នុងឆ្នាំ២០២៤ខាងមុខ ហើយគណៈកម្មការគ្រប់គ្រងល្បែងពាណិជ្ជកម្មកម្ពុជា នឹងខិតខំអនុវត្តឱ្យសម្រេចបានតាមផែនការដែលបានគ្រោងទុក។
បើតាមការគូសបញ្ជាក់ពីមន្រ្តីជំនាញរូបនេះ មកទល់អំឡុងខែធ្នូ ឆ្នាំ២០២៣នេះ គណៈកម្មការគ្រប់គ្រងល្បែងពាណិជ្ជកម្មកម្ពុជា បានផ្ដល់អាជ្ញាប័ណ្ណពេញលេញដល់អាជីវកម្មល្បែងពាណិជ្ជកម្មចំនួន១០៤ក្រុមហ៊ុន និងអាជ្ញាធរប័ណ្ណបណ្ដោះអាសន្នចំនួន៧៦ក្រុមហ៊ុន ប៉ុន្តែក្នុងចំណោមក្រុមហ៊ុនទាំងនេះ ក៏មានក្រុមហ៊ុនចំនួន១ ត្រូវបានដកអាជ្ញាធរប័ណ្ណចេញវិញ ដោយសារតែអនុវត្តមិនបានត្រឹមត្រូវតាមលក្ខខណ្ឌកំណត់។
គួរបញ្ជាក់ថា កាលពីឆ្នាំ២០២១ កន្លងទៅ រដ្ឋទទួលបានចំណូលពីវិស័យនេះ តែជាង៩លានដុល្លារប៉ុណ្ណោះ។ ជាមួយគ្នានេះ រដ្ឋបានដាក់គោលដៅប្រមូលចំណូលពីវិស័យនេះ ឲ្យបានគ្រប់ផែនការ៣៥លានដុល្លារ បន្ទាប់ពីទម្លាក់២៥% នៃផែនការប្រមូលចំណូលក្នុងវិស័យនេះ៕
