ដើម្បីអាចឆ្លើយតបនឹងតម្រូវការរបស់ទីផ្សារអន្តរជាតិ មន្ត្រី និងអ្នកជំនាញស្នើឱ្យផលិតអំបិលនៅខេត្តកែប និងខេត្តកំពតទាំងអស់ កែប្រែបច្ចេកទេសនៃការផលិតរបស់ខ្លួន ដ្បិតបច្ចុប្បន្នការផលិតអំបិលរបស់កសិករនៅពុំទាន់ស្របតាមស្តង់ដារនាំចេញនៅឡើយទេ ពោលគឺការផលិតភាគច្រើននៅធ្វើតាមបែបប្រពៃណី។ តើអំបិលកម្ពុជាត្រូវកែប្រែចំណុចអ្វីខ្លះ ដើម្បីអាចប្រកួតប្រជែងជាមួយប្រទេសក្នុងតំបន់ និងអាចហក់ចូលទីផ្សារអន្តរជាតិ?
ឧកញ៉ា ចាន់ ស៊ីថា ម្ចាស់សហគ្រាសផលិតទឹកត្រី អ៊ីឆេ ង៉ូវហេង និងជាអ្នកផលិតអំបិលមួយរូប នៅខេត្តកំពតជឿជាក់ថា នៅក្នុងឆ្នាំ២០២៤នេះ កសិករទំនងជាអាចផលិតអំបិលបានច្រើនជាងឆ្នាំមុខ ប្រសិនបើពុំមានភ្លៀងកក់ខែទេនោះ។ ហើយតម្លៃអំបិលទៀតសោតក៏អាចនឹងមានការកើនឡើងផងដែរ បន្ទាប់អំបិលកម្ពុជាបានចុះបញ្ជីជាផលិតផលម៉ាកសម្គាល់ភូមិសាស្ត្រ(GI)កាលពីឆ្នាំ២០២៣ កន្លងទៅ។
យ៉ាងណាមិញ អ្នកជំនាញរូបនេះកត់សម្គាល់ឃើញថា បច្ចេកទេសនៃផលិត និងការពិនិត្យគុណភាពអំបិលនៅតែជាបញ្ហាប្រឈមសម្រាប់អ្នកផលិតអំបិលនៅកម្ពុជា ដែលមានទាមទារឱ្យមានការជួយបណ្តុះបណ្តាល និងបង្កើតកន្លែងពិសោធន៍ឱ្យបានត្រឹមត្រូវ ដើម្បីអាចប្រកួតប្រជែង និងឈានដល់ការនាំចេញទៅកាន់ទីផ្សារអន្តរជាតិ។
អត្ថបទគួរអាន
ពាក់ព័ន្ធនឹងការផលិតអំបិលនេះ ឯកឧត្តម ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានគូសបញ្ជាក់ថា ការផលិតអំបិលបច្ចុប្បន្នមានបញ្ហាប្រឈមមួយចំនួន ដូចជាឯកសារដីស្រែអំបិលមិនទាន់មានភាពច្បាស់លាស់ និងមិនទាន់មានដៃគូអភិវឌ្ឍន៍ ព្រមទាំងកង្វះខាតកម្លាំងពលកម្ម ខណៈការផលិតនៅធ្វើតាមបែបប្រពៃណីនៅឡើយ ដែលពុំទាន់មានកម្រិតស្តង់ដារត្រឹមត្រូវ។
តែយ៉ាងណាអ្នកនាំពាក្យរូបនេះអះអាងថា ក្រសួង និងអ្នកពាក់ព័ន្ធ កំពុងយកចិត្តទុកដាក់ ដើម្បីដោះស្រាយបញ្ហាទាំងនេះឱ្យបានរួចរាល់នាពេលខាងមុខ ដ្បិតអំបិល គឺជាមុខទំនិញយុទ្ធសាស្រ្តដ៏សំខាន់មួយរបស់កម្ពុជា។ ទន្ទឹមនេះ ឯកឧត្តម ជឿជាក់ថា អំបិលកម្ពុជានឹងមានឱកាសកាន់តែល្អសម្រាប់ចូលក្នុងទីផ្សារអឺរ៉ុបនាពេលខាងមុខ។
បើយោងតាមទិន្នន័យពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅក្នុងឆ្នាំ២០២៣ កន្លងទៅ កម្ពុជាផលិតអំបិលបានជាង៧ម៉ឺន៩ពាន់តោន និងនៅសល់បន្ទាប់ពីការប្រើប្រាស់រួចចំនួនជាង១ម៉ឺន៧ពាន់តោន។ គួរបញ្ជាក់ថា នៅក្នុងឆ្នាំ២០២៣ កម្ពុជាពុំបាននាំចូលអំបិលពីក្រៅប្រទេស សម្រាប់ត្រៀមផ្គត់ផ្គង់តម្រូវការប្រើប្រាស់ក្នុងស្រុកនោះទេ ខណៈកាលពីឆ្នាំ២០២២ កម្ពុជាបាននាំចូលអំបិលមួយចំនួន ដើម្បីបំពេញតម្រូវការផ្គត់ផ្គង់ក្នុងស្រុក ដោយសារតែកត្តាអាកាសធាតុបានធ្វើឱ្យទិន្នផលអំបិលមានការថយចុះ៕
អត្ថបទ៖ បូ ដូឡា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
