លោកឧត្តមសេនីយ អេវើហាដ ហ្សូន (Eberhard Zorn) ដែលជាប្រមុខមេបញ្ជាការនៃកងទ័ពការពារជាតិអាល្លឺម៉ង់ (Bundeswehr) បានប្រាប់ទីភ្នាក់ងាររ៉យទ័រ (Reuters) នៅក្នុងបទសម្ភាសន៍មួយថា៖ «បើទោះបីកងកម្លាំងជើងគោករបស់រុស្សីភាគច្រើនកំពុងជាប់ដៃធ្វើសង្គ្រាមជាមួយអ៊ុយក្រែនក៏ដោយ ប៉ុន្តែយើងមិនគួរមើលស្រាលពីអនុភាពនៃកងកម្លាំងទីពីរ ដែលអាចនឹងត្រៀមខ្លួនសម្រាប់សង្គ្រាមធំនៅពេលណាក៏បាននោះទេ»។
អ្វីដែលមេបញ្ជាការកងទ័ពអាល្លឺម៉ង់រូបនេះចង់សំដៅនោះគឺ កងទ័ពេជើងទឹក និងកងទ័ពអាកាសរបស់រុស្សី ដែលភាគច្រើនមិនទាន់បានដាក់ពង្រាយក្នុងសមរភូមិជាមួយអ៊ុយក្រែនទេ ហើយកងទ័ពអាកាសរបស់វិមានក្រឹមឡាំងដ៏មានសក្តានុពលនេះ ក៏អាចបង្កការគំរាមគំហែងដល់អង្គការណាតូផងដែរ។
ឧត្តមសេនីយរូបនេះបានមានប្រសាសន៍ថា «លោកមានការព្រួយបារម្ភណាស់ថា ការអូសបន្លាយសង្គ្រាមនៅអ៊ុយក្រែន ជាសេណារីយ៉ូមួយថា រុស្សីក៏អាចនឹងពង្រីកជម្លោះក្នុងតំបន់អឺរ៉ុបទាំងមូលក៏ថាបាន ដោយសារលោកមើលឃើញថា ទីក្រុងម៉ូស្គូនៅតែបន្តបម្រុងទុកសម្ភារៈយោធា និងកម្លាំងយ៉ាងច្រើនក្នុងការប្រយុទ្ធរយៈពេលវែង។
ទោះបីជាយ៉ាងនេះក្តី បើយោងតាមការលើកឡើងរបស់ទីភ្នាក់ងារស៊ើបការណ៍សម្ងាត់អាមេរិកបានឲ្យដឹងកាលពីថ្ងៃពុធ ទី ៣១ សីហាថា យោធារុស្សីកំពុងមានការខ្វះខាតកម្លាំងកងទ័ពយ៉ាងខ្លាំង និងទំនងជាកំពុងស្វះស្វែងរកកងទ័ពបន្ថែម ដែលក្នុងនោះក៏អាចជាឧក្រិដ្ឋជនជាប់ទោសផងដែរ ដើម្បីទៅធ្វើសង្គ្រាមនៅអ៊ុយក្រែន។
អត្ថបទគួរអាន
គួរជម្រាបថា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានចុះហត្ថលេខាលើក្រឹត្យមួយកាលពីថ្ងៃព្រហស្បតិ៍សប្តាហ៍មុន ដើម្បីបង្កើនទំហំកងកម្លាំងប្រដាប់អាវុធរបស់រុស្ស៊ីពី ១លាន៩ សែននាក់ ទៅជាង ២ លាននាក់ ខណៈដែលសង្រ្គាមនៅអ៊ុយក្រែនឈានចូលដល់ខែទីប្រាំពីរ។
ស្របពេលជាមួយគ្នានេះ ទីក្រុងម៉ស្គូមិនដែលបានបង្ហាញពីទំហំខាតបង់នៃចំនួនកងទ័ព និងសព្វាវុធយោធាជាផ្លូវការណាមួយឡើយ ចាប់តាំងបើកការវាយប្រហារជាមួយអ៊ុយក្រែនមក តែនាពេលកន្លងមក ទីក្រុងកៀវបានប៉ាន់ប្រមាណកងទ័ពរុស្សីដែលស្លាប់មានរាប់ម៉ឺននាក់ឯណោះ។
មន្ត្រីអាមេរិកបាននិយាយក្នុងលក្ខខណ្ឌមិនបញ្ចេញឈ្មោះ ដើម្បីពិភាក្សាអំពីបញ្ហាចារកម្មថា «យោធារុស្ស៊ីកំពុងទទួលរងការខ្វះខាតកម្លាំងកងទ័ពប្រយុទ្ធយ៉ាងខ្លាំងនៅក្នុងប្រទេសអ៊ុយក្រែន»។
មន្ត្រីរូបនេះបាននិយាយថា វាត្រូវបានគេជឿថា ក្រសួងការពារជាតិទីក្រុងម៉ូស្គូកំពុងជ្រើសរើសទាហនកិច្ចសន្យាថ្មី រួមទាំងបង្ខំទាហានដែលរងរបួសឱ្យចូលប្រយុទ្ធឡើងវិញ ព្រមទាំងទិញបុគ្គលិកពីក្រុមហ៊ុនសន្តិសុខឯកជន ថែមទាំងបង់ប្រាក់បន្ថែមដល់ទាហានទាំងនោះផងដែរ។
និយាយដោយឡែក មន្ត្រីចារកម្មអាមេរិកដដែលបាននិយាយថា «ខ្លួនមានរបាយការណ៍គួរឱ្យទុកចិត្តដែលថា ក្រសួងការពារជាតិរុស្ស៊ីក៏ទំនងជាចាប់ផ្តើមជ្រើសរើសឧក្រិដ្ឋជន ដែលត្រូវបានកាត់ទោសនៅក្នុងប្រទេសអ៊ុយក្រែនធ្វើជាទាហាន ជាថ្នូរទៅនឹងការលើកលែងទោស និងសំណងហិរញ្ញវត្ថុថែមទៀងផង»៕
