លោក ស៊ី ជីនពីង នឹងបើកសមាជបក្សកុម្មុយនិស្តចិននៅចុងសប្ដាហ៍នេះ ចំពេលដែលប្រទេសកំពុងជួបបញ្ហាចាក់ស្រេះជាច្រើន
ប្រធានាធិបតីចិន លោក ស៊ី ជីនពីង នឹងឡើងបង្ហាញខ្លួននៅថ្ងៃអាទិត្យ ទី ១៦ តុលា ដើម្បីចាប់ផ្តើមបើកកិច្ចប្រជុំសមាជបក្សកុម្មុយនិស្តចិន ដែលជាបក្សកា…
លោក គ្រីស្នា ស្រ៊ីនីវ៉ាសាន(Krishna Srinivasan) ប្រធាននាយកដ្ឋានប្រចាំតំបន់អាស៊ី និងអាស៊ីប៉ាស៊ីហ្វិករបស់ IMF បាននិយាយថា រូបិយបណ្ណក្នុងតំបន់អាស៊ីជាច្រើនបានធ្លាក់ថ្លៃយ៉ាងខ្លាំង ដោយសារការរឹតបន្តឹងរូបិយវត្ថុរបស់សហរដ្ឋអាមេរិក ដែលបាននាំឱ្យមានគម្លាតខុសគ្នាខ្លាំងនៃអត្រាប្តូរប្រាក់របស់ពួកគេធៀបនឹងប្រាក់ដុល្លារអាមេរិក និងឈានទៅធ្វើឱ្យថ្លៃដើមក្នុងការនាំចូលសម្រាប់ប្រទេសទាំងនោះកើនឡើងផងដែរ។ ជាមួយគ្នានេះ អតិផរណា បានកើនខ្ពស់ក្នុងប្រទេសក្នុងតំបន់ទាំងនេះ លើសពីកំរិត ដែលគេបានកំណត់ទុកដៅទៅទៀត លើកលែងតែចិន និងជប៉ុនប៉ុណ្ណោះ។
អ្នកជំនាញរូបនេះបានកត់សម្គាល់ទៀតថា ស្របពេលដែល IMF រំពឹងថាអតិផរណានឹងឡើងដល់កំរិតខ្ពស់បំផុតនៅដាច់ឆ្នាំ២០២២នេះក្ដី ប៉ុន្ដែ កំណើនអតិផរណាកើនឡើងពីមួយខែទៅមួយខែ បានរុញច្រើនឱ្យបន្ទាត់ក្រហមនៃអតិផរណា ចូលមកដល់មុនការរំពឹងទុក ជាពិសេសប្រសិនបើអត្រាការប្រាក់គោលនៅទូទាំងសកលកើនឡើងកាន់តែខ្លាំង។ ប្រការនះគឺទាមទារឱ្យមានការរឹតបន្តឹងគោលនយោបាយរូបិយវត្ថុឱ្យបានលឿនជាងមុន និងខ្លាំងជាងមុន ក្នុងប្រទេសនៅតំបន់អាស៊ី។
លោក ស្រ៊ីនីវ៉ាសាន បន្តថា ការបន្តធ្លាក់ថ្លៃរូបិយបណ្ណ និងការកើនឡើងនៃអត្រាការប្រាក់ក៏អាចបង្កឱ្យមានភាពតានតឹងផ្នែកហិរញ្ញវត្ថុនៅក្នុងបណ្តាប្រទេសអាស៊ី ដែលមានបំណុលខ្ពស់ផងដែរ។ ជាក់ស្តែងនៅដើមសប្តាហ៍នេះ ប្រាក់បាតរបស់ថៃ បានធ្លាក់ថ្លៃដល់កំរិតទាបបំផុតមិនធ្លាប់មានក្នុងរយៈពេល២៦ឆ្នាំចុងក្រោយពោលគឺជិត៣៨បាត ទើបប្តូរបាន១ដុល្លារអាមេរិក ខណៈប្រាក់យ៉េនជប៉ុនធ្លាក់ដល់ជាង១៤៧យ៉េន ជាអត្រាទាបបំផុតមិនធ្លាប់មានក្នុងជាង៣ទសវត្សរ៍ចុងក្រោយ។
ក្រៅពីនេះ IMF មើលឃើញថា បច្ចុប្បន្នតំបន់អាស៊ី ជាតំបន់ដែលមានប្រទេសជាប់ជំពាក់បំណុលធំជាងគេលើពិភពលោក ហើយប្រទេសមួយចំនួនមានហានិភ័យខ្ពស់នៃការធ្លាក់ចូលក្នុងវិបត្តិបំណុល។ ជាក់ស្តែង កំរិតបំណុលក្នុងប្រទេសមានសេដ្ឋកិច្ចកំពុងរីកចម្រើនចំនួន៣១ ក្នុងនោះក៏មានដែរប្រទេសក្នុងតំបន់អាស៊ី បានកើនឡើងដល់ ២៥០%នៃ GDP របស់ប្រទេសទាំង ៣១សរុបចូលគ្នាទៅហើយ។
សូមជម្រាបថា មូលនិធិរូបិយវត្ថុអន្តរជាតិ IMF ទើបបានបន្ទាបការព្យាករណ៍កំណើនសេដ្ឋកិច្ចសកលសម្រាប់ឆ្នាំ ២០២៣ ពី២,៩%មកនៅត្រឹម២,៧%។ IMF ព្រមានថាប្រសិនបើអតិផរណារបស់សហរដ្ឋអាមេរិកបង្ហាញពីភាពមិនថមថយ ហើយធនាគារកណ្តាលនៅតែរក្សាគោលនយោបាយរូបិយវត្ថុដដែល មិនព្រមផ្លាស់ប្តូរសម្រាប់រយៈពេលទៅមុខទៀត នោះបន្ទុកបំណុលសម្រាប់ប្រទេសកំពុងរីកចម្រើនអាចកើនឡើងកាន់តែធ្ងន់ធ្ងរ។ នេះគេនៅមិនទាន់គិតពីប្រទេសក្រីក្រ មានប្រាក់ចំណូលទាប ហើយមានសមត្ថភាពតិចតួចក្នុងការសងបំណុលរបស់ពួកគេផង៕
