មេមូលនិធិ IMF បានជំរុញឱ្យបណ្ដាប្រទេសនៅអាស៊ី ពង្រឹងកិច្ចសហប្រតិបត្តិការក្នុងតំបន់ និងកាត់បន្ថយរបាំងពាណិជ្ជកម្ម ដើម្បីការពារសេដ្ឋកិច្ចរបស់ពួកគេឱ្យកាន់តែប្រសើរឡើងពីភាពមិនប្រាកដប្រជាសកល។
នាយកគ្រប់គ្រងមូលនិធិរូបិយវត្ថុអន្តរជាតិ លោកស្រី គ្រីស្តាលីណា ចចជីវ៉ា (Kristalina Georgieva) បានព្រមានថា សង្គ្រាមដ៏អូសបន្លាយនៅមជ្ឈិមបូព៌ាអាចនឹងជំរុញឱ្យថាមពលរួមមានប្រេងឥន្ធនៈ និងឧស្ម័នហ្គាសជាដើម ហក់ឡើងថ្លៃកាន់តែខ្លាំង ដែលជះផលប៉ះពាល់ដល់ទីផ្សារហិរញ្ញវត្ថុនានា ធ្វើឱ្យកំណើនសេដ្ឋកិច្ចយឺត និងបង្កើនអតិផរណា។ លោកបានសង្កត់ធ្ងន់ថា ពិភពលោកកំពុងប្រឈមមុខនឹងវិបត្តិកាន់តែញឹកញាប់ និងមិនអាចព្យាករដឹងមុន។ ទន្ទឹមនឹងនេះ លោកស្រី ជំរុញឱ្យរដ្ឋាភិបាលប្រទេសនានាត្រៀមខ្លួនសម្រាប់ការរង្គោះរង្គើថ្មីៗដល់សេដ្ឋកិច្ច ដែលមិននឹកស្មានដល់។
សង្គ្រាមនៅតំបន់មជ្ឈិមបូព៌ា បានធ្វើឱ្យរាំងស្ទះរួចទៅហើយដល់ការធ្វើដំណើរ និងការដឹកជញ្ជូនប្រេងឆ្លងកាត់ច្រកសមុទ្រហ័រមូស ដែលជាផ្លូវដ៏សំខាន់សម្រាប់ការផ្គត់ផ្គង់ថាមពលរបស់ពិភពលោក។ ថាមពលហក់ឡើងថ្លៃខ្ពស់អាចធ្វើឱ្យអតិផរណាហក់ឡើង និងធ្វើឱ្យកំណើនសេដ្ឋកិច្ចពិភពលោកធ្លាក់ចុះ។
មូលនិធិ IMF បានអះអាងថា ខ្លួនកំពុងតាមដានស្ថានភាពយ៉ាងយកចិត្តទុកដាក់ ហើយនឹងរួមបញ្ចូលការវាយតម្លៃរបស់ខ្លួននៅក្នុងរបាយការណ៍ទស្សនវិស័យសេដ្ឋកិច្ចពិភពលោក បន្ទាប់នៅក្នុងខែមេសា ឆ្នាំនេះ។ ទោះបីជាមានហានិភ័យយ៉ាងណាក្ដី ក៏មូលនិធិ IMF នៅតែរំពឹងថា សេដ្ឋកិច្ចពិភពលោកនឹងសម្រេចបានកំណើនក្នុងរង្វង់ប្រមាណ៣,៣% ក្នុងឆ្នាំ២០២៦ នេះ។
យ៉ាងណាមិញនាយកគ្រប់គ្រងមូលនិធិរូបិយវត្ថុអន្តរជាតិ ក៏បានជំរុញឱ្យបណ្ដាប្រទេសនៅអាស៊ី ពង្រឹងកិច្ចសហប្រតិបត្តិការក្នុងតំបន់ និងកាត់បន្ថយរបាំងពាណិជ្ជកម្ម ដើម្បីការពារសេដ្ឋកិច្ចរបស់ពួកគេឱ្យកាន់តែប្រសើរឡើងពីភាពមិនប្រាកដប្រជាសកល៕
ដោយ: តែម សុខុម
