![វិស័យសំណង់](https://cdn.cambonomist.com/media/images/krnchlsmphr_nngbrkkhrsnng.2e16d0ba.fill-960x540.jpg)
របាយការណ៍របស់ធនាគារជាតិនៃកម្ពុជា បានបង្ហាញថា វិស័យសំណង់ត្រូវបានប៉ាន់ស្មានថា មានកំណើនទាបនៅក្នុងឆមាសទី១ ឆ្នាំ២០២៤នេះ ដែលគាំទ្រដោយគម្រោងអភិវឌ្ឍន៍សាធារណៈសំខាន់ៗដូចជាផ្លូវ ស្ពាន និងអាកាសយាន្តដ្ឋានជាដើម។ ក៏ប៉ុន្តែបើមើលទៅលើការនាំចូលសម្ភារ និងបរិក្ខារសំណង់មកកាន់ទីផ្សារកម្ពុជា នៅឆមាសទី១ ឆ្នាំនេះវិញ គឺមានការកើនឡើងជាង២២% បើធៀបនឹងរយៈពេលដូចគ្នាកាលពីឆ្នាំមុន។
លោក សុខ ឡៃ អ្នកគ្រប់គ្រងទូទៅរបស់ក្រុមហ៊ុនពិស្ណុការ ដែលជាក្រុមហ៊ុនម៉ៅការសំណង់ធំមួយនៅកម្ពុជា បានវាយតម្លៃថា ការកើនឡើងការនាំចូលសម្ភារ និងបរិក្ខារសំណង់នេះ អាចជាសញ្ញាមួយនៃការកម្រើកឡើងវិញរបស់វិស័យសំណង់របស់កម្ពុជា។
តែយ៉ាងណា លោក សង្កេតឃើញថា វិស័យសំណង់របស់កម្ពុជាបច្ចុប្បន្ន គឺមានសកម្មភាពទៅតាមផ្នែកមួយចំនួនប៉ុណ្ណោះ។ តួយ៉ាង គម្រោងសាងសង់ដែលមានកញ្ចប់ថវិកាស្រាប់នៅតែដំណើរការធម្មតា ខណៈគម្រោងវិនិយោគផ្នែកអចលនទ្រព្យវិញ គឺនៅមានសភាពទ្រឹងនៅឡើយ។ ដោយឡែក ពាក់ព័ន្ធតម្លៃសម្ភារ និងគ្រឿងសំណង់វិញត្រូវបានលោក សុខ ឡៃ អះអាងថា ពុំមានការប្រែប្រួលគួរឱ្យកត់សម្គាល់នោះទេ។
ជាមួយគ្នានេះ ឧកញ៉ា ហួត ជា ប្រធានក្រុមហ៊ុន ហួត ជា ផ្គត់ផ្គង់សម្ភារសំណង់ បានគូសបញ្ជាក់ថា កំណើននៃការនាំចូលសម្ភារ និងបរិក្ខារសំណង់នៅឆមាសទី១នេះ អាចទំនងបណ្តាលមកពីការកើនឡើងនៃការសាងសង់ហេដ្ឋារចនាសម្ព័ន្ធនៅក្នុងវិស័យរដ្ឋ តួយ៉ាងដូចជាអគារពន្ធដារ និងអគារ ប.ស.ស ជាដើម។
ដោយឡែកសម្រាប់សកម្មភាពសាងសង់របស់វិស័យឯកជន ដូចជាគម្រោងបុរីលំនៅឋានជាដើមហាក់នៅទ្រឹងនៅឡើង ខណៈការសាងសង់ផ្ទះរបស់ប្រជាពលរដ្ឋទូទៅ ក៏មិនមានសម្ទុះខ្លាំងនោះដែរ ពោលគឺមានតែចំពោះសំណង់ដែលមានភាពចាំបាច់ប៉ុណ្ណោះ។
យ៉ាងណាមិញ ឯកឧត្តម មាស សុខសេនសាន រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានគូសបញ្ជាក់ថា វិស័យអចលនទ្រព្យ និងសំណង់របស់កម្ពុជា នាពេលបច្ចុប្បន្ននៅតែបន្តរងនូវផលប៉ះពាល់នៅឡើយ ពិសេសគឺសកម្មភាពទិញលក់អចលនទ្រព្យតែម្តង គឺមិនទាន់មានការងើបឡើងវិញនោះទេ។
តែយ៉ាងណាថ្នាក់ដឹកនាំរូបនេះកត់សម្កាល់ឃើញថា ចរន្តនៃការនាំចូលសម្ភារសំណង់ចូលមកកម្ពុជានៅដើមឆ្នាំនេះ ហាក់មានការកើនឡើងមកវិញគួរឱ្យកត់សម្កាល់ ដែលអាចជាសញ្ញាវិជ្ជមានមួយក្នុងការជំរុញការងើបឡើងវិញរបស់វិស័យនេះ។
សូមជម្រាបថា បើតាមរបាយការណ៍របស់ធនាគារជាតិនៃកម្ពុជា នៅឆមាសទី១ឆ្នាំនេះ តម្លៃគម្រោងសំណង់ទទួលបានការអនុម័តមានការថយចុះប្រមាណ២៣% ដោយក្នុងនោះ សំណង់លំនៅឋានថយចុះជិត១៥% និងសំណង់ផ្សេងៗថយចុះជិត៣៣% ខណៈសំណង់សាធារណៈកើនឡើងជាង២%៕