ការតថ្លៃជាបន្តបន្ទាប់រវាងអ៊ុយក្រែន និងសហរដ្ឋអាម៉េរិក រួមជាមួយសហភាពអឺរ៉ុប លើបញ្ហាសន្តិភាពនៅអ៊ុយក្រែន កំពុងក្តៅគគុក ខណៈបច្ចុប្បន្នទីក្រុងវ៉ាស៊ីនតោន កំពុងដាក់សម្ពាធជាថ្មីដល់ទីក្រុងគៀវ ឲ្យទទួលយកកិច្ចព្រមព្រៀម និងផែនការដែលព្រាងឡើងដោយសហរដ្ឋអាម៉េរិក ហើយបានដាក់កំហិតឱ្យអ៊ុយក្រែន ផ្តល់ចម្លើយឱ្យបានមុនថ្ងៃបុណ្យណូអែល។
ពាក់ព័ន្ធនឹងការដាក់កំហិតនេះ ប្រធានាធិបតីអ៊ុយក្រែន លោក វ៉្លូឌីមៀ ហ្សេឡិនស្គី បានលើកឡើងថា អ៊ុយក្រែន បានបង្ហាញសហរដ្ឋអាម៉េរិក នូវក្របខណ្ឌចំនួន២០ចំណុច ដែលបានកែសម្រួល ដើម្បីបញ្ចប់សង្គ្រាមរបស់ខ្លួនជាមួយរុស្ស៊ី ប៉ុន្តែទោះបីជាយ៉ាងណាក៏ដោយបញ្ហា នៃការប្រគល់ទឹកដីនៅតែជាចំណុចជាប់គាំងដ៏សំខាន់មួយនៅក្នុងការចរចានេះ។
មេដឹកនាំអ៊ុយក្រែន បានសង្កត់ធ្ងន់ថា ការសម្រេចចិត្តណាមួយពាក់ព័ន្ធនឹងបញ្ហាទឹកដី វាជាសិទ្ធិអំណាចរបស់ប្រជាជន ហើយប្រជាជនអ៊ុយក្រែន អាចសម្រេចចិត្តបានតាមរយៈការធ្វើប្រជាមតិ។ លោកបានចាត់ទុកការកំណត់ឱសានវាទរបស់ទីក្រុងវ៉ាស៊ីនតោន ក្នុងការឱ្យអ៊ុយក្រែន ផ្តល់ចម្លើយមិនបានផ្តល់ពេលវេលាគ្រប់គ្រាន់សម្រាប់ទីក្រុងគៀវ ក្នុងការពិចារណានោះទេ។
ពាក់ព័ន្ធនឹងបញ្ហានេះដែរ សហភាពអឺរ៉ុប បានអះអាងថា រាល់កិច្ចព្រមព្រៀងសន្តិភាព នៅអ៊ុយក្រែន គឺមិនអាចធ្វើបានឡើយ បើគ្មានអ៊ុយក្រែន ហើយក៏មិនអាចមើលរំលងអឺរ៉ុបនោះដែរ៕
ដោយៈ សរ សុជាតិ
