លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកប្រចាំនៅកម្ពុជា បានចាត់ទុកការជំរុញកិច្ចសហប្រតិបត្តិការទេសចរណ៍ក្នុងក្របខណ្ឌ «ប្រទេស៣គោលដៅ១» របស់ថ្នាក់ដឹកនាំកម្ពុជា ជាមួយថ្នាក់ដឹកនាំវៀតណាម និងឡាវ ជាផែនការដ៏ល្អមួយសម្រាប់វិស័យទេសចរណ៍ ខណៈកន្លងមកក្របខណ្ឌនេះពុំទាន់ត្រូវបានអនុវត្តពេញលេញនៅឡើយទេ។ មិនបានអនុវត្តពេញលេញ ក៏ដោយសារតែវិស័យរបស់រដ្ឋ និងឯកជនពុំទាន់មានការស្រុះស្រួលគ្នា ខណៈសេវាកម្មទេសចរណ៍របស់ប្រទេសទាំងបី ក៏ពុំទាន់ស៊ីចង្វាក់គ្នា។ បើតាមលោក ធួន ស៊ីណាន ដើម្បីឱ្យក្របខណ្ឌ«ប្រទេស៣ គោលដៅ១» អាចមានដំណើរការទៅបានលុះណាតែមានកិច្ចសហប្រតិបត្តិការរវាងរដ្ឋ និងរដ្ឋ និងវិស័យឯកជនជាមួយវិស័យឯកជន ខណៈកិច្ចការនេះទាមទារឱ្យមានការគាំពារ និងយកចិត្តទុកដាក់ពីស្ថាប័នរដ្ឋ ទើបអាចប្រព្រឹត្តទៅប្រកបដោយប្រសិទ្ធភាព។
ដោយឡែក លោកជំទាវ ឆាយ ស៊ីវលីន ប្រធានសមាគមទេសចរណ៍កម្ពុជា កត់សម្គាល់ឃើញថា កន្លងមកហេដ្ឋារចនាសម្ព័ន្ធ និងការតភ្ជាប់តំបន់ទេសចរណ៍សម្រាប់បម្រើឱ្យក្របខណ្ឌ៣ប្រទេសគោលដៅទេសចរណ៍តែមួយរវាងកម្ពុជា វៀតណាម និងឡាវ នៅមានកម្រិតនៅឡើយ ដោយសារប្រព័ន្ធដឹកជញ្ជូនឆ្លងដែននៅពុំទាន់ស៊ីចង្វាក់គ្នា ស្របពេលនីតិវិធីក្នុងការផ្តល់ទិដ្ឋាការរួមមិនទាន់មានការឯកភាពគ្នា។ បើតាមអ្នកជំនាញរូបនេះ ដើម្បីឱ្យក្របខណ្ឌ «ប្រទេស៣គោលដៅ១» អាចដំណើរការទៅបានលុះណាតែស្ថាប័នរដ្ឋមានឆន្ទៈ គោលនយោបាយ និងការប្ដេជ្ញាចិត្តក្នុងការដោះស្រាយជារួម នោះទើបអាចធ្វើឱ្យក្របខណ្ឌនេះមានការរីកចម្រើនទៅមុខ។
ពាក់ព័ន្ធនឹងបញ្ហានេះដែរ សារព័ត៌មាន ខេមបូណូមីស ពុំទាន់អាចទាក់ទងសុំការបញ្ជាក់បន្ថែមពីអ្នកនាំពាក្យក្រសួងទេសចរណ៍បាននៅឡើយទេ។
សូមបញ្ជាក់ថា កាលពីពេលថ្មីៗនេះ សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានជួបពិភាក្សាការងារពាក់ព័ន្ធវិស័យទេសចរណ៍ជាមួយថ្នាក់ដឹកនាំប្រទេសវៀតណាម និងឡាវ នៅទីក្រុងគូឡាឡាំពួ ប្រទេសម៉ាឡេស៊ី។ ថ្នាក់ដឹកនាំនៃប្រទេសទាំងបីបានឯកភាពនឹងណែនាំឱ្យរដ្ឋមន្ត្រីទេសចរណ៍នៃប្រទេសទាំង៣ បន្តពិភាក្សាជាមួយគ្នា សំដៅជំរុញកិច្ចសហប្រតិបត្តិការទេសចរណ៍ក្នុងក្របខណ្ឌ«ប្រទេស៣ គោលដៅ១»៕
អត្ថបទ៖ បូ ដូឡា
