ក្រុមហ៊ុនរុករករ៉ែនៅប្រទេសឥណ្ឌូនេស៊ីដែលជាអ្នកនាំចេញធ្យូងថ្មកម្ដៅដ៏ធំបំផុតនៅក្នុងពិភពលោកនោះ តាមធម្មតាមិននាំចេញធ្យូងថ្មទៅកាន់អឺរ៉ុបនោះទេ ដោយសារប្រទេសចិន ឥណ្ឌា និងប្រទេសអាស៊ីមួយចំនួនទៀត គឺជាគោលដៅនាំចេញកំពូលរបស់ពួកគេ។
ប៉ុន្តែស្របពេលមានការហាមប្រាមរបស់សហភាពអឺរ៉ុបលើការនាំចូលធ្យូងថ្មពីប្រទេសរុស្ស៊ីដែលបានចូលជាធរមានកាលពីខែសីហា ហើយរុស្ស៊ីបានបិទការផ្គត់ផ្គង់ឧស្ម័នមួយចំនួនទៅកាន់ទ្វីបនេះនៅចំពេលមានសង្រ្គាមនៅអ៊ុយក្រែន វាបានធ្វើឱ្យអ្នកទិញនៅអឺរ៉ុបកំពុងតែស្រវាដើររកទិញធ្យូងថ្មឆ្ងាយៗរហូតដល់ប្រទេសឥណ្ឌូនេស៊ី និងអូស្ត្រាលី។
លោក Pandu Sjahrir ប្រធានសមាគមរុករករ៉ែធ្យូងថ្មឥណ្ឌូនេស៊ីបានប្រាប់ទីភ្នាក់ងារ Nikkei Asia ក្នុងបទសម្ភាសន៍មួយកាលពីពេលថ្មៗនេះថា តម្រូវការសម្រាប់ធ្យូងថ្មរបស់ឥណ្ឌូនេស៊ីកំពុងកើនឡើងយ៉ាងខ្លាំងដោយសារតែបញ្ហាភូមិសាស្ត្រនយោបាយនេះ ហើយប្រទេសអាល្លឺម៉ង់គឺជាគម្រូដ៏ល្អមួយ។ ពួកគេកំពុងស្នើសុំទិញធ្យូងថ្មជាច្រើនពីឥណ្ឌូនេស៊ី។ ជាពិសេសនៅឆ្នាំក្រោយនេះ អាល្លឺម៉ង់នឹងក្លាយជាប្រទេសនាំចូលធ្យូងថ្មធំបំផុតទី២ ឬទី៣របស់ឥណ្ឌូនេស៊ីបន្ទាប់ពីចិន និងឥណ្ឌា។
ក្រុមហ៊ុន Bukit Asam ដែលហៅថា ក្រុមហ៊ុន PTBA នោះគឺជាក្រុមហ៊ុនរុករករ៉ែក្នុងស្រុកមួយ ដែលបានចាប់ផ្តើមដឹកជញ្ជូនធ្យូងថ្មទៅកាន់អឺរ៉ុប។ លោក Rafli Yandra នាយកផ្នែកអភិវឌ្ឍន៍អាជីវកម្មនៅក្រុមហ៊ុនគ្រប់គ្រងដោយរដ្ឋបាននិយាយថា ក្រុមហ៊ុននេះបាននាំចេញធ្យូងថ្មចំនួន ១៤ ម៉ឺន ៧ ពាន់តោនទៅកាន់ប្រទេសអ៊ីតាលីចាប់ពីខែមីនាដល់ខែកក្កដា។
អត្ថបទគួរអាន
លោក Yandra បានប្រាប់អ្នកយកព័ត៌មានថា សម្រាប់បណ្តាប្រទេសអ៊ឺរ៉ុបផ្សេងទៀតដូចជាអាល្លឺម៉ង់ និងប៉ូឡូញជាដើម ក្រុមហ៊ុន PTBA បច្ចុប្បន្នកំពុងស្ថិតក្នុងដំណើរការ ចរចាគ្នានៅឡើយ ដើម្បីជ្រៀតចូលក្នុងទីផ្សារទាំងនេះក្នុងតម្លៃប្រសើរជាងមុន។
ក្រុមហ៊ុន Bukit Asam បានផលិតធ្យូងថ្មចំនួនប្រហែល១៦ លានតោន នៅចន្លោះខែមករាដល់ខែមិថុនា ពោលគឺបានកើនឡើង ២០% បើធៀបនឹងរយៈពេលដូចគ្នានៅឆ្នាំ២០២១។
ក្រុមហ៊ុន Bumi Resources ដែលជាក្រុមហ៊ុនផលិតធ្យូងថ្មដ៏ច្រើនបំផុតនៅឥណ្ឌូនេស៊ី ក៏កំពុងតែធ្វើការដើម្បីបង្កើនផលិតកម្មនៅឆ្នាំនេះរហូតដល់ ៨៣ លានតោនពោលគឺកើនឡើងជាងឆ្នាំមុន ៦%។ ក្រុមហ៊ុននេះបានទទួលការសួរនាំ និងកំពុងពិភាក្សាដើម្បីដឹកជញ្ជូនធ្យូងថ្មទៅកាន់ប្រទេសមួយចំនួនដូចជា អាល្លឺម៉ង់ ប៉ូឡូញ និងអ៊ីតាលី។
តំណាងក្រុមហ៊ុននាំចេញធ្យូងថ្មឥណ្ឌូនេស៊ីបានលើកឡើងទៀតថា ពួកគេបានចាប់ផ្តើមបរិមាណនៃការដឹកជញ្ជូនតិចតួចទៅកាន់អឺរ៉ុប ប៉ុន្តែពួកគេអាចនឹងបង្កើនបរិមាណនេះនៅពេលដែលទិន្នផលមានសភាពធម្មតានៅក្រោយពេលបញ្ចប់រដូវធ្លាក់ភ្លៀង។
ក្រុមហ៊ុនជីករ៉ែធ្យូងថ្មនៅឥណ្ឌូនេស៊ីកំពុងទទួលបានប្រាក់ចំណេញយ៉ាងសន្ធឹកសន្ធាប់ ដោយសារតម្លៃធ្យូងថ្មកើនឡើង។ ក្រុមយហ៊ុន PTBA បានប្រកាសពីប្រាក់ចំណូលសុទ្ធរបស់ខ្លួនចំនួនជាង ៤១៥ លានដុល្លារនៅឆមាសទីមួយនៃឆ្នាំនេះ ពោលគឺបានកើនឡើង ២៤៦%បើធៀបនឹងរយៈពេលដូចគ្នាក្នុងឆ្នាំ២០២១ ខណៈដែលចំណូលរបស់ក្រុមហ៊ុន Adaro's បានកើនឡើង ៧ ដង ដល់ជាង ១ពាន់លានដុល្លារ ហើយក្រុមហ៊ុន Bayan Resources បានកើនឡើងជិត ៣ ដងរហូតដល់ ៩៧០ លានដុល្លារ៕
អត្ថបទ៖ សុខ ជា
