ទីភ្នាក់ងារវាយតម្លៃគុណភាពខ្យល់ IQ Air រកឃើញថា ឥណ្ឌាជាប្រទេសដែលបំពុលបរិស្ថានបំផុតទី៣នៅលើពិភពលោក

របាយការណ៍ស្ដីពីគុណភាពខ្យល់ពិភពលោកប្រចាំឆ្នាំ២០២៣ បានបង្ហាញថា ឥណ្ឌាបានក្លាយជាប្រទេស ដែលមានគុណភាពខ្យល់អាក្រក់បំផុតទីបីលើពិភពលោកក្នុងចំណោម១៣៤ ប្រទេស បន្ទាប់ពីប្រទេសបង់ក្លាដែស និងប្រទេសប៉ាគីស្ថាន។ ជាមួយគ្នានេះ ឥណ្ឌាបានជាប់ចំណាត់ថ្នាក់ជាប្រទេស ដែលបំពុលបរិស្ថានខ្លាំងបំផុតទី៨ នៅក្នុងឆ្នាំ២០២៣។

នៅក្នុងចំណោមទីក្រុងទាំង៥០ ដែលមានការបំពុលបរិស្ថានច្រើនបំផុតនៅលើពិភពលោក គឺមានទីក្រុងរហូតដល់៤២ឯណោះ ដែលស្ថិតនៅក្នុងប្រទេសឥណ្ឌា ដោយក្នុងនោះទីក្រុងបេហ្គូសារ៉ៃ (Begusarai) បានជាប់ជាតំបន់ទីប្រជុំជន ដែលមានការបំពុលខ្យល់ខ្លាំងបំផុតក្នុងឆ្នាំ២០២៣ បន្ទា​ប់មកគឺទីក្រុងហ្គូវ៉ាហាទី (Guwahati) និងទីក្រុងញូវដែលី។

យោងតាមទីភ្នាក់ងារ IQ Air បានឱ្យដឹងថា ទិន្នន័យនៅក្នុងរបាយការណ៍របស់ទីភ្នាក់ងារនេះត្រូវបានប្រមូលពីស្ថានីយត្រួតពិនិត្យគុណភាពខ្យល់ជាង៣ម៉ឺនស្ថានីយនៅទូទាំងទីតាំងជិត៨​ពាន់កន្លែងក្នុងប្រទេស ដែនដី និងតំបន់សរុបចំនួន១៣៤ក្នុងពិភពលោក៕

អត្ថបទ៖ សុខ ជា