ធនាគារកណ្តាលថៃ រឹតបន្តឹងវិធានការបង្ក្រាបការឆបោកតាមប្រព័ន្ធអនឡាញ និងរំហូរប្រាក់ខុសច្បាប់

លោក វីតៃ រតនាកន (Vitai Ratanakorn) ទេសាភិបាលធនាគារកណ្តាលថៃ បានប្រកាសក្របខណ្ឌថ្មីនេះនៅឯកិច្ចប្រជុំកំពូលធុរកិច្ចក្រុងបាងកក។ ក្របខ័ណ្ឌនេះបានចូលជាធរមាននៅថ្ងៃទី១០ ខែកញ្ញា ឆ្នាំ២០២៦ ហើយតម្រូវឱ្យគ្រឹះស្ថានហិរញ្ញវត្ថុ និងអ្នកប្តូរប្រាក់ជាង២,០០០កន្លែងចាត់វិធានការការពារមិនឱ្យសេវាកម្មរបស់ខ្លួនត្រូវបានប្រើប្រាស់សម្រាប់ប្រព្រឹត្តការឆបោក អំពើពុករលួយ ឬសកម្មភាពខុសច្បាប់ផ្សេងៗ។
ក្រោមវិធានការថ្មីនេះធនាគារនានាត្រូវពិនិត្យយ៉ាងតឹងរ៉ឹងលើការដាក់ប្រាក់បញ្ញើជាសាច់ប្រាក់ដែលមានលើសពី១៥ម៉ឺនដុល្លារ។ ចំណែកការទិញមាសដែលមានតម្លៃចាប់ពីជាង៣០ម៉ឺនដុល្លារឡើងទៅ ក៏នឹងត្រូវរឹតបន្តឹងការត្រួតពិនិត្យផងដែរ។
ធនាគារកណ្តាលថៃ បាននិយាយថា វិធានការដែលបានអនុវត្តកន្លងមកកំពុងបង្ហាញលទ្ធផលបណ្ដើរៗហើយ។ ជាក់ស្ដែងការដកសាច់ប្រាក់ក្នុងទំហំធំបានធ្លាក់ចុះ៥២% ក្នុងរយៈពេលមួយឆ្នាំមកនេះ ខណៈការដកមាសក្នុងទំហំធំបានធ្លាក់ចុះ៧០%។ ចំណែកឯការខាតបង់ពីការឆបោកតាមប្រព័ន្ធអនឡាញដែលបោកបញ្ឆោតជនរងគ្រោះឱ្យផ្ទេរប្រាក់ដោយខ្លួនឯងបានធ្លាក់មកនៅត្រឹមប្រមាណ៥៥លានដុល្លារ នៅត្រីមាសទី២ ឆ្នាំ២០២៦ ថយចុះ៨០% បើធៀបនឹងរយៈពេលដូចគ្នាក្នុងឆ្នាំ២០២៥។

ប្រទេសថៃ ក៏កំពុងសហការជាមួយមូលនិធិរូបិយវត្ថុអន្តរជាតិ (IMF) និងធនាគារពិភពលោកដើម្បីរៀបចំផែនការគំរូក្រុងបាងកក ដែលមានគោលបំណងផ្តល់ជាគំរូឱ្យប្រទេសដទៃយកទៅអនុវត្ត ដើម្បីពង្រឹងការប្រយុទ្ធប្រឆាំងការឆបោកតាមប្រព័ន្ធឌីជីថល៕

ដោយ: តែម សុខុម