ឥណ្ឌា ជាប្រទេសមួយដែលមិនសូវលូកមាត់លូកកច្រើននោះទេ នៅក្នុងបញ្ហាសង្គ្រាមរវាងរុស្ស៊ី និងអ៊ុយក្រែន ខណៈដែលអាមេរិក ដែលជាសម្ព័ន្ធមិត្ត ក៏ព្យាយាមឲ្យឥណ្ឌាឃ្លាតឆ្ងាយពីរុស្ស៊ីតាមដែលអាចធ្វើទៅបាន។ ប៉ុន្ដែ សំណួរសួរថា តើឥណ្ឌាអាចនៅឆ្ងាយពីរុស្ស៊ីបានយ៉ាងដូចម្ដេចទៅ? បើ ឥណ្ឌាត្រូវការពឹងផ្អែកការនាំចូលខ្ពស់ពីទីក្រុងមូស្គូ រួមទាំងការផ្គង់ផ្គងដូចជា អាវុធ និងគ្រាប់រំសេវ កាំជ្រួច និងយន្តហោះចម្បាំងផងនោះ។
យ៉ាងណាមិញ ឥណ្ឌាឥឡូវនេះ កំពុងប្រឈមនឹងបញ្ហាប្រេងឡើងថ្លៃ ដោយប្រទេសនេះ មានតម្រូវការប្រេងនាំចូលរហូតដល់៨០% សម្រាប់ការប្រើប្រាស់ក្នុងស្រុក ហើយជាទូទៅឥណ្ឌាទិញប្រេងពីរុស្ស៊ីប្រហែល ២% ទៅ៣% ប៉ុណ្ណោះ។ ក៏ប៉ុន្ដែ ដោយសារតែមកទល់ពេលនេះប្រេងឡើងថ្លៃខ្ពស់ដល់ទៅ ៤០%ទៅហើយនោះ បានជំរុញឲ្យរដ្ឋាភិបាលឥណ្ឌាកំពុងស្វែងរកការបង្កើនការនាំចូលប្រេងពីរុស្ស៊ីបន្ថែម ប្រសិនបើវាអាចជួយបន្ថយការចំណាយថ្លៃថាមពលទាបជាងមុន។
អត្ថបទគួរអាន
ត្រូវបានស្រង់សម្តីដោយសារព័ត៌មានរ៉យទ័រ ប្រភពពីរដ្ឋាភិបាលឥណ្ឌាបានអះអាងថា រុស្ស៊ីកំពុងផ្ដល់ជូននឹងការលក់ប្រេង និងមុខទំនិញជាច្រើនទៀត ជាមួយនឹងការបញ្ចុះតម្លៃយ៉ាងច្រើនសម្រាប់ឥណ្ឌា ហើយរដ្ឋាភិបាលនឹងរីកររាយក្នុងការទទួលយកការផ្ដល់ជូននេះ។ ប៉ុន្ដែ មិនទាន់មានការបញ្ជាក់ថា នឹងទិញក្នុងចំនួនប៉ុន្មាននោះទេ។ ក្រៅតែពីប្រេង ឥណ្ឌាក៏ំពុងរកមើលទិញជីកសិកម្មក្នុងតម្លៃថោក ពីប្រទេសរុស្ស៊ី និងបេឡារុសផងដែរ។
យ៉ាងណាក៏ដោយចុះ ប្រសិនបើរដ្ឋាភិបាលឥណ្ឌាពិតយល់ព្រមទិញប្រេងបន្ថែមពីឥណ្ឌា ស្របពេលប្រទេសលោកខាងលិចព្យាយាមកាត់ផ្ដាច់ការនាំចូលប្រេងពីឥណ្ឌា នោះ ឥណ្ឌាអាចនឹងត្រូវប្រឈមនឹងការមិនពេញចិត្តពីសំណាក់លោកខាងលិច ពិសេសអាមេរិកដែលជាសម្ព័ន្ធមិត្តរបស់ខ្លួននោះទេ ខណៈកន្លងមកអាមេរិកទើបតែបានសម្រេចបញ្ឈប់ការនាំចូលប្រេងពីរុស្ស៊ីរួចហើយ។
ទោះយ៉ាងណា គេមើលឃើញថា ឥណ្ឌាបានជ្រើសយកការដើរលើផ្លូវកណ្ដាលរួចទៅហើយ នៅក្នុងបញ្ហាសង្គ្រាមនៅអ៊ុយក្រែននេះ ដោយកន្លងមកឥណ្ឌាមិនបានចេញថ្កោលទោសរុស្ស៊ី លើការឈ្លានពានអ៊ុយក្រែនទេ ហើយឥណ្ឌាថែមទាំងបានបោះឆ្នោតអនុប្បវាទនៅអង្គការសហប្រជាជាតិ ស្ដីអំពីការទាមទារឲ្យរុស្ស៊ីបញ្ឈប់សង្គ្រាម និងដកទ័ពចេញពីអ៊ុយក្រែនផងដែរ។
គួរជម្រាបថា ឥណ្ឌា និងរុស្ស៊ី បានកសាងទំនាក់ទំនងជាច្រើនឆ្នាំមកហើយ ដោយឥណ្ឌាមានការពឹងផ្អែកលើរុស្ស៊ីសម្រាប់ការផ្គត់ផ្គង់សព្វាវុធរហូតដល់ ៦០ ភាគរយ ទោះបីជាមានការថយចុះគួរឱ្យកត់សម្គាល់ក្នុងទសវត្សរ៍ចុងក្រោយក៏ដោយ៕
អត្ថបទ វ៉ាន់ ស្រីរ័ត្ន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
