លោក ហាលុក បាយរ៉ាក់តា (Haluk Bayraktar) នាយកប្រតិបត្តិក្រុមហ៊ុន តួកគី Baykar Technology និងលោក ណូម៉េន ចូសូហ្វ (Norman Joesoef) នាយកប្រតិបត្តិក្រុមហ៊ុនផលិតឧបករណ៍ការពារជាតិ របស់ឥណ្ឌូនេស៊ី Republikorp បានចុះកិច្ចព្រមព្រៀងបណ្តាក់ទុនរួមគ្នា ក្រោមវត្តមានរបស់ប្រធានាធិបតីឥណ្ឌូនេស៊ី លោក ប្រាបូវ៉ូ ស៊ូបៀនតូ និងប្រធានាធិបតីតួកគី រីសេប តាយីប អឺដូហ្កាន ក្នុងអំឡុងពេលលោកបំពេញទស្សនកិច្ចនៅប្រទេសឥណ្ឌូនេស៊ី កាលពីថ្ងៃទី១២ ខែកុម្ភៈ។
ការបណ្តាក់ទុនរួមគ្នារវាងក្រុមហ៊ុនទាំងពីរនេះ គឺផ្តោតលើការបង្កើតរោងចក្រផលិតយន្តហោះគ្មានមនុស្សបើក ឬដ្រូនសម្រាប់ប្រើប្រាស់ក្នុងវិស័យយោធានៅក្នុងប្រទេសឥណ្ឌូនេស៊ី។ កិច្ចព្រមព្រៀងនេះ ក៏បានបង្ហាញពីផែនការពង្រឹងឧស្សាហកម្មការពារជាតិ របស់ឥណ្ឌូនេស៊ី តាមរយៈការផលិតក្នុងស្រុក និងការផ្ទេរបច្ចេកវិទ្យាផងដែរ។
ជាផ្នែកមួយនៃភាពជាដៃគូ ការបណ្តាក់ទុនរួមគ្នានេះនឹងត្រូវបង្កើតឡើងនៅប្រទេសឥណ្ឌូនេស៊ី ដើម្បីផ្តោតលើការផលិត ការផ្គុំ និងការថែទាំយន្តហោះដ្រូន។ ក្រុមហ៊ុន Republikorp បាននិយាយកាលពីថ្ងៃព្រហស្បតិ៍ ថា ផលិតផលដំបូងដែលត្រូវផលិតនៅក្នុងប្រទេសឥណ្ឌូនេស៊ីនោះ រួមមានយន្តហោះដ្រូនប្រភេទ Bayraktar TB3 ចំនួន៦០គ្រឿង និងប្រភេទ Bayraktar ចំនួន៩គ្រឿង។
ទន្ទឹមនេះ កងកម្លាំងផ្លូវអាកាសរបស់ឥណ្ឌូនេស៊ី ក៏បានដាក់ពាក្យស្នើសុំរដ្ឋាភិបាលឥណ្ឌូនេស៊ី ដើម្បីទិញយន្តហោះដ្រូនប្រភេទ Anka ចំនួន១២គ្រឿង ពីក្រុមហ៊ុន Aerospace របស់តួកគីក្នុងតម្លៃសរុបចំនួន៣០០លានដុល្លារផងដែរ៕
អត្ថបទ៖ សុខ មង្គល
