ទោះបីជាតុលាការធម្មនុញ្ញថៃ សម្រេចយ៉ាងណាក៏ដោយនៅលើញតិមួយរបស់គណបក្សឆ្ពោះទៅមុខដែលកំពុងស្វះស្វែងរកការបន្តគាំទ្រលោក ភីថា លីមចារឿនរ៉ាត់ អោយធ្វើជា បេក្ខជននាយករដ្ឋមន្រ្តី នៅថ្ងៃទី១៦ ខែ សីហា នេះ ក៏មិនមានអ្វីរាំងស្ទះ ដល់គណបក្សភឿថៃ នៅក្នុងការបង្កើតរដ្ឋាភិបាលដែរ ដោយសារតែគណបក្សនេះទំនងជាទទួលការគាំទ្រពី ព្រឹទ្ធសមាជិកទៅហើយ ។
កាលពីថ្ងៃទី១០ ខែ សីហា ឆ្នាំ២០២៣ លោក ភូថាំ វីឆាយ៉ាឆៃ (Phumtham Wechyachai) អនុប្រធានគណបក្សភឿថៃ បានបង្ហាញនូវជំនឿទុកចិត្ត ថា លោក ស៊្រីថា ថាវីស៊ីន បេក្ខជននាយករដ្ឋមន្រ្តីរបស់គណបក្សភឿថៃ នឹងអាចទទួលការគាំទ្រគ្រប់គ្រាន់នៅសភា ។
យោងទៅតាមការផ្សាររបស់កាសែតឌឹណេសិន បានឲ្យដឹងថា ក្រោយពេលដែលលោក ភូថាំ លើកឡើងបែបនេះ លោក វ៉ាន់ឆៃ ស៊នស៊ីរី ព្រឹទ្ធសមាជិកថៃមួយរូប បានបន្ទថា លោក ស្រ៊ីថា នឹងទទួលការគាំទ្រទាំងស្រុងពីព្រឹទ្ធសមាជិកនៅក្នុងការបោះឆ្នោតជ្រើសរើសនាយករដ្ឋមន្រ្តីថៃថ្មីនៅពេលខាងមុខ ។
អត្ថបទគួរអាន
លោកបានអះអាងថា ព្រឹទ្ធសមាជិកយល់ថា ថៃត្រូវតែទទួលឱកាសថ្មីហើយអាចនឹងមិនខ្ជះខ្ជាយពេលវេលាបន្តទៀតទៀត នៅលើបញ្ហានេះ ។
លោកបានបញ្ជាក់ថា “ តាមដែលខ្ញុំទទួលបាន សហការីជាព្រឹទ្ធសមាជិកថៃទាំងអស់ ក៏នឹងគាំទ្របេក្ខជនមកពីគណបក្សណា ដែលអាចប្រមូលមតិភាគច្រើននៅក្នុងសភា ដើម្បីក្លាយជានាយករដ្ឋមន្រ្តី” ។
សម្រាប់តំណែងនាយករដ្ឋមន្រ្តី គណបក្សភឿថៃត្រូវការសម្លេងគាំទ្រត្រឹមតែ ៣៧៦ សម្លេងទេ ប៉ុន្តែពេលនេះ ភឿថៃ អាចប្រមូលការគាំទ្រពីសម្ព័ន្ធភាព ៩ បក្ស បានសម្លេងទាំងអស់ ២៣៨ សម្លេង ដោយឡែក គណបក្ស ប៉ាឡាង ប្រាឆារ៉ាត់ ដែលដឹកនាំដោយ ឧបនាយករដ្ឋមន្រ្តីចាំផ្ទះ ប្រាវីត វង្សស៊ូវ៉ាន់ ដែលមានអសនៈ ៤០ ក៏បានប្រកាសគាំទ្របន្ថែមទៀត ដូច្នេះប្រសិន បើភឿថៃទទួលការគាំទ្រពី ព្រឹទ្ធសមាជិកថៃ ២៥០ សម្លេងបន្ថែមទៀត គណបក្សឆ្ពោះទៅមុខ ដែលឈ្នះឆ្នោតនឹងក្លាយជាគណបក្សប្រឆាំង ។
នៅក្នុងប្រទេសថៃ គណបក្សឈ្នះឆ្នោតមិនប្រាកដថា អាចដឹកនាំរដ្ឋាភិបាលបានឡើយ ជាក់ស្តែង កាលពីការបោះឆ្នោតឆ្នាំ២០១៩ គណបក្សភឿថៃ ជាគណបក្សឈ្នះឆ្នោត ដែលទទួលបានការគាំទ្រ ១៣៦ សម្លេង ប៉ុន្តែត្រូវចាញ់ដៃគណបក្សប៉ាឡាង ប្រឆារ៉ាត់ ដែលមាន ១១៦ អសនៈរួបរួមជាមួយនឹងគណបក្សដ៏ទៃ ដើម្បីកាន់អំណាច ៕
