យ៉ាងណាក៏ដោយចុះ អាជ្ញាធរចិនក្នុងតំបន់នោះ ក៏បានប្រាប់នាវានេសាទរបស់ខ្លួនទាំងអស់ឱ្យចៀសវាងការបង្កជម្លោះណាមួយ ដែលអាចកើតឡើង តែគេមិនទាន់ប្រាកដថាបញ្ជានោះ វាអនុវត្តយ៉ាងហ្មត់ចត់ប៉ុនណានោះទេ។ រីឯខាងអាជ្ញាធរជប៉ុនវិញកំពុងតាមឃ្លាំមើលនាវានេសាទរបស់ចិនយ៉ាងយកចិត្តទុក ខ្លាចក្រែងចូលមកក្នុងដែនទឹករបស់ខ្លួនគ្រប់គ្រង ដ្បិតថា បញ្ហាតំបន់សមុទ្រចិនខាងកើតនេះ គឺជាជម្លោះដ៏រសើបរវាងចិន និងជប៉ុនអស់រយៈពេលជាច្រើនមកហើយ។ នេះបើតាមការចុះផ្សាយដោយសារព័ត៌មាន Nikkei Asia។
បម្រាមលើនាវានេសាទនៅតំបន់សមុទ្រចិនខាងកើត ត្រូវបានប្រទេសចិនដកចេញវិញនៅថ្ងៃទី ១៧ ខែសីហា ហើយកងកម្លាំងឆ្មាំសមុទ្រជប៉ុនដែលមានសមត្ថកិច្ចនៅក្បែរតំបន់នោះដែរ បាននិយាយថា គេឃើញមាននាវានេសាទចិនចំនួន ១០ គ្រឿងបានធ្វើនាវាចរនៅខាងក្រៅដែនទឹកនៃកោះសេនកាគុសរបស់ជប៉ុនតែម្តង។
មន្ត្រីរដ្ឋាភិបាលជប៉ុនម្នាក់បាននិយាយថា៖ «មានទូកនេសាទចិនជាច្រើនដែលចេញដំណើរភ្លាមៗ នៅពេលដែលការហាមឃាត់ការនេសាទត្រូវបានដកចេញ ប្រការនេះហើយយើងនឹងត្រូវតែតាមដានយ៉ាងដិតដល់នូវសកម្មភាពរបស់ពួកគេ»។
អត្ថបទគួរអាន
យោងតាមប្រព័ន្ធផ្សព្វផ្សាយរដ្ឋចិន បានចេញផ្សាយថា អ្នកនេសាទចិនទាំងឡាយដែលនៅតំបន់ឆ្នេរសមុទ្រចិនខាងកើត ត្រូវបានអាជ្ញាធរនៅក្នុងតំបន់របស់ខ្លួនណែនាំឲ្យជៀសវាងការទាក់ទង ជាមួយនាវាបរទេសផ្សេងទៀត ដើម្បីការពារការឆ្លងជំងឺកូវីដ១៩។
ទោះបីជាបែបនេះក្តី គេសង្កេតឃើញថា ការផ្លាស់ទីនៃកប៉ាលនេសាទចិននៅក្នុងតំបន់សមុទ្រចិនខាងកើត គឺជាការបង្ហាញពីគោលជំហរស្ទាបស្ទង់មើលរបស់ទីក្រុងប៉េកាំង ចំពោះប្រទេសជប៉ុន តួយ៉ាងដូចភាពតានតឹងកាលពីខែសីហា ឆ្នាំ ២០១៦ កន្លងទៅ ទូកនេសាទរបស់ចិនបានចូលមកឡោមព័ទ្ធកោះសេនកាគុស (Senkakus) តែម្តង។
លើសពីនេះទៅទៀត លោក ស៊ីជីន ពីង ប្រធានាធិបតីចិន ក៏បានបង្កើនសម្ពាធយោធាលើដែនកោះជម្លោះ Senkakus ដែរ ដោយកាលពីឆ្នាំ ២០១៨ លោកបានបញ្ជាឲ្យផ្ទេរការគ្រប់គ្រងឆ្មាំឆ្នេរសមុទ្រពីអំណាចស៊ីវិល ទៅគណៈកម្មការយោធាកណ្តាល ហើយកាលឆ្នាំ ២០២១ កន្លងទៅ ឆ្មាំយោធាសមុទ្រនោះត្រូវបានរដ្ឋអំណាចទីក្រុងប៉េកាំងអនុញ្ញាតឲ្យប្រើកម្លាំងលើកប៉ាលបរទេសណា ដែលធ្វើនាវាចរចូលក្នុងដែនទឹករបស់ខ្លួន ប្រសិនបើចាំបាច់។
នៅក្នុងកាសែតចិន People's Daily ដែលគ្រប់គ្រងដោយបក្សកុម្មុយនិស្តចិន បានចោទប្រកាន់ប្រទេសជប៉ុនកាលពីថ្ងៃចន្ទ ទី១៥ សីហានេះថា «តែងបង្កបញ្ហាឥតឈប់ឈរលើបញ្ហាកោះដៃយ៉ូ (Diaoyu) ដែលចិនអះអាងថាជារបស់ខ្លួន តែជប៉ុនបានកាន់កាប់កោះនេះនិងហៅឈ្មោះថា កោះសិនកាគុស (Senkakus) វិញ៕
