ឥណ្ឌូនេស៊ីផ្អាកនាំចេញប្រេងដូង ចំពេលអតិផរណាស្បៀងអាហារពិភពលោកកើនឡើង

ឥណ្ឌូនេស៊ីដែលជាប្រទេសផលិតប្រេងដូងឈានមុខគេក្នុងពិភពលោកនោះ ថ្មីៗនេះ បានប្រកាសអំពីផែនការហាមឃាត់ការនាំចេញប្រេងបន្លែមានការពេញនិយមប្រើប្រាស់ច្រើននៅក្នុងប្រទេសនេះ ដើម្បីធ្វើយ៉ាងណារក្សាទុកបំពេញតម្រូវការប្រើប្រាស់ក្នុងស្រុក។ ប៉ុន្ដែ វិធានការនេះ ក៏ត្រូវបានគេមើលឃើញថា អាចនឹងរុញច្រានឲ្យអតិផរណាស្បៀងអាហារពិភពលោកដែលកំពុងកើនខ្ពស់ស្រាប់ទៅហើយនោះ នឹងហក់ឡើងកាន់តែខ្ពស់ថែមមួយកម្រិតទៀត។ នេះបើតាមការរាយការណ៍ដោយរ៉យទ័រ។

ឥណ្ឌូនេស៊ីផ្អាកនាំចេញប្រេងដូង

ការដែលប្រទេសឥណ្ឌូនេស៊ីផ្អាកនាំចេញប្រេងឆា និងវត្ថុធាតុដើមដែលគេប្រើប្រាស់យ៉ាងទូលំទូលាយក្នុងផលិតផលរាប់ចាប់ពីនំខេករហូតដល់គ្រឿងសម្អាងផ្សេងទៀតនោះ អាចបង្កើនថ្លៃដើមសម្រាប់អ្នកផលិតអាហារវេចខ្ចប់នៅទូទាំងពិភពលោក និងបង្ខំឱ្យរដ្ឋាភិបាលជាច្រើននឹងត្រូវជ្រើសរើសប្រើប្រាស់ប្រេងបន្លែ ឬក៏ប្រើជីវឥន្ធនៈ។ ប្រទេសឥណ្ឌូណេស៊ី ត្រូវបានគេដឹងថា គឺមានផ្គត់ផ្គង់ប្រេងដូងជាងពាក់កណ្តាលនៅក្នុងទីផ្សារពិភពលោក។

ប្រធានាធិបតីឥណ្ឌូណេស៊ីលោក Joko Widodo បាននិយាយថា លោកចង់ធានាឱ្យបាននូវផលិតផលម្ហូបអាហារនៅក្នុងស្រុកបន្ទាប់ពីអតិផរណាស្បៀងអាហារសកលលោកបានកើនឡើងដល់កម្រិតខ្ពស់បំផុត បន្ទាប់ពីប្រទេសរុស្ស៊ីលុកលុយអ៊ុយក្រែនដែលជាប្រទេសផលិតស្បៀងអាហារដ៏សំខាន់មួយនៅក្នុងពិភពលោក។

លោក វីដូដូ បានបន្តថា លោកនឹងតាមដាននិងវាយតម្លៃលើការអនុវត្តគោលការណ៍នេះដើម្បីឱ្យលទ្ធភាពរកទិញប្រេងឆានៅតាមទីផ្សារក្នុងស្រុកមានច្រើន និងមានតម្លៃសមរម្យ។

មន្ត្រីជាន់ខ្ពស់ឥណ្ឌាបាននិយាយដែរថា ការប្រកាសរបស់ឥណ្ឌូនេស៊ីនេះ នឹងធ្វើឱ្យប៉ះពាល់ដល់អ្នកប្រើប្រាស់ច្រើនបំផុតនៅប្រទេសឥណ្ឌា និងនៅទូទាំងពិភពលោក ដោយគេចាត់ទុកថា វិធានការនេះគឺជារឿងអកុសល និងមិននឹកស្មានដល់ទាល់តែសោះ។

តម្លៃប្រេងបន្លែជំនួស បានកើនឡើងជាការឆ្លើយតបទៅនឹងវិធានការ ដែលនឹងត្រូវចូលជាធរមាននៅថ្ងៃទី២៨ ខែមេសាខាងមុខនេះ។ ប្រេងសណ្តែកសៀងដែលជាប្រេងឆាប្រើប្រាស់ច្រើនបំផុតទី២នោះបានកើនឡើង ៤,៥% ដល់កម្រិតខ្ពស់បំផុតមួយ។ នេះបើយោងតាមក្រុមប្រឹក្សាពាណិជ្ជកម្មទីក្រុងឈីកាហ្គោ។

តម្លៃប្រេងដូងឆៅជាសកលដែលឥណ្ឌូនេស៊ីប្រើសម្រាប់ផលិតប្រេងឆានោះ បានកើនឡើងដល់កម្រិតខ្ពស់ជាប្រវត្តិសាស្ត្រនៅឆ្នាំនេះ នៅចំពេលមានតម្រូវការកើនឡើង និងទិន្នផលធ្លាក់ចុះនៅប្រទេសឥណ្ឌូនេស៊ីនិងម៉ាឡេស៊ី បូកផ្សំទាំងវិធានការរបស់ឥណ្ឌូណេស៊ីក្នុងការរឹតបន្តឹងការនាំចេញប្រេងដូងនៅក្នុងខែមករា ដែលត្រូវបានដកចេញវិញកាលពីខែមីនា។

ឥណ្ឌូនេស៊ី ប្រេងឆា ជាមធ្យមមានតម្លៃជាង១ដុល្លារ៨៤សេនក្នុងមួយលីត្រ ហើយគិតមកទល់ពេលនេះ វាបានកើនឡើងថ្លៃជាង៤០%។ នៅក្នុងខេត្តមួយចំនួន តម្លៃប្រេងឆាបានហក់ឡើងថ្លៃទ្វេដងផងដែរ។ ជុំវិញតម្លៃប្រេងឆាឡើងថ្លៃនេះ រដ្ឋាភិបាលឥណ្ឌូនេស៊ី ក៏បានបើកការស៊ើបអង្កេតលើករណីពុករលួយទាក់ទងនឹងការអនុញ្ញាតឲ្យមានការនាំចេញ ដោយគ្មានច្បាប់អនុញ្ញាតផងដែរ ដែលវាត្រូវបានគេសង្ស័យថា ជាកត្តាមួយធ្វើឲ្យតម្លៃប្រេងឆាក្នុងស្រុកឡើងថ្លៃខ្ពស់។

ប្រទេសផ្សេងៗទៀតបានបង្កើតគោលនយោបាយការពារដំណាំនិយម ដើម្បីព្យាយាមទប់តម្លៃក្នុងស្រុកកុំឱ្យឡើងថ្លៃ។ អាហ្សង់ទីន ដែលជាប្រទេសនាំចេញសណ្តែកសៀងកែច្នៃលំដាប់កំពូលក្នុងពិភពលោកមួយដែរនោះ បានផ្អាកការលក់ប្រេងសណ្តែកសៀង និងអាហារទៅក្រៅប្រទេសមួយរយៈពេលខ្លីនៅពាក់កណ្តាលខែមីនាមក បន្ទាប់មកបានដំឡើងអត្រាពន្ធនាំចេញលើផលិតផលទាំងនេះពី ៣១% ទៅ ៣៣%ផងដែរ៕

សូមជម្រាបថា ការទូទាត់សំណងធានារ៉ាប់រងកូវីដនៅថៃ បានកើនឡើងយ៉ាងគំហុកពីត្រឹមតែជាង៣៤ម៉ឺនដុល្លារក្នុងឆ្នាំ ២០២០ មកដល់ដល់ ជាង ២២០លានដុល្លារក្នុងឆ្នាំ ២០២១ ហើយបានកើនឡើងយ៉ាងគំហុកនៅដើមឆ្នាំ២០២២នេះ៕

អត្ថបទ៖ សុខ ជា

None