ការវាយតម្លៃបឋមបានប៉ាន់ប្រមាណថា គ្រោះរញ្ជួយដីធ្វើឱ្យថៃ ខាតបង់សេដ្ឋកិច្ចជាង៨០០លានដុល្លារ

លោក យុនយ៉ុង ថៃចារឿន (Yunyong Thaicharoen) ប្រធានក្រុមសេដ្ឋវិទូនៅមជ្ឈមណ្ឌលស្រាវជ្រាវសេដ្ឋកិច្ច នៃធនាគារ Siam Commercial Bank បានលើកឡើងថា គ្រោះរញ្ជួយដីដ៏រន្ធត់នៅទីក្រុងបាងកក ប្រទេសថៃ ដែលបណ្តាលឱ្យអគារ ដែលកំពុងសាងសង់ជាង៣០ជាន់មួយកន្លែងដួលរលំរាបដល់ដី កាលពីថ្ងៃទី២៨ ខែមីនា ឆ្នាំ២០២៥ ត្រូវបានគេព្យាករថា នឹងធ្វើឱ្យថៃ ខាតបង់សេដ្ឋកិច្ចប្រមាណ៨៧៩លានដុល្លារ ក្នុងរយៈពេលពី៣ ទៅ៤ខែខាងមុខ។

អ្នកជំនាញរូបនេះ បានលើកឡើងនៅក្នុងសិក្ខាសាលា ស្តីពីទស្សនវិស័យសេដ្ឋកិច្ចក្នុងស្រុក និងហិរញ្ញវត្ថុអ្នកប្រើប្រាស់កាលពីពេលថ្មីៗថា បន្ទាប់ពីមានការរញ្ជួយដីកាលពីថ្ងៃសុក្រ សប្តាហ៍មុន គ្រោះមហន្តរាយនេះនឹងធ្វើឱ្យប៉ះពាល់ដល់វិស័យទេសចរណ៍របស់ប្រទេសថៃ ជាចម្បង ដោយសារអ្នកទេសចរបរទេសខ្លះលើកពេលធ្វើដំណើរកម្សាន្ត និងខ្លះទៀតលុបចោលដំណើរទេសចរណ៍មកកាន់ប្រទេសថៃ។ ទន្ទឹមនឹងនេះ វិស័យអចលនទ្រព្យ ក៏ប្រឈមមុខនឹងការចុះខ្សោយទំនុកចិត្តពីអ្នកប្រើប្រាស់ ជាពិសេសសម្រាប់សំណង់អគារខុនដូខ្ពស់ៗតែម្តង។

បើតាមការអះអាងរបស់អ្នកជំនាញរូបនេះ គ្រោះរញ្ជួយដីដ៏ធ្ងន់ធ្ងរនេះនឹងធ្វើឱ្យទំនុកចិត្តអ្នកប្រើប្រាស់ និងអាជីវកម្មចុះខ្សោយ ជាពិសេសប៉ះពាល់ដល់ការចំណាយ និងការវិនិយោគលើទំនិញប្រើប្រាស់បានយូរ ដែលវានឹងរារាំងកំណើនប្រាក់កម្ចីនៅក្នុងប្រព័ន្ធធនាគារ។

ផ្ទុយពីការព្យាករខាងលើ មជ្ឈមណ្ឌលស្រាវជ្រាវ K-Research បានវាយតម្លៃថា គ្រោះរញ្ជួយដីដ៏ធ្ងន់ធ្ងរនៅថៃ អាចធ្វើឱ្យប្រទេសនេះខាតបង់សេដ្ឋកិច្ចប្រមាណ២០ពាន់លានដុល្លារ ឬជិត៥៨៦លានដុល្លារអាម៉េរិក។

ដោយឡែក អនុរដ្ឋមន្ត្រីក្រសួងហិរញ្ញវត្ថុ លោក ផាវផម រូចាណាសាគល (Paopoom Rojanasakul) រំពឹងថា ផលប៉ះពាល់សេដ្ឋកិច្ចពីការរញ្ជួយដីនឹងមានក្នុងកម្រិតតិចតួច និងមានរយៈពេលខ្លី ហើយលោកជឿជាក់ថា ទំហំផលិតផលក្នុងស្រុកសរុបរបស់ថៃ នឹងបន្តស្ថិតក្នុងគោលដៅ៣% នៅឆ្នាំនេះ៕

ដោយៈ សរ សុជាតិ