ធនាគារធំៗរបស់ជប៉ុន កំពុងអភិវឌ្ឍន៍ប្រព័ន្ធទូទាត់ថ្មីមួយ ដែលអាចទូទាត់ពាណិជ្ជកម្មអន្តរជាតិ បានឆាប់រហ័សបំផុត

ធនាគារខ្នាតយក្សចំនួន៣របស់ប្រទេសជប៉ុន រួមមានធនាគារ Mitsubishi UFJ Financial Group ធនាគារ Mizuho Financial Group និងធនាគារ Sumitomo Mitsui Financial Group នឹងចាប់ផ្តើមដំណើរការសាកល្បងប្រព័ន្ធទូទាត់ថ្មីនេះនៅដើមរដូវស្លឹកឈើជ្រុះឆ្នាំនេះជាមួយធនាគារជាង១០ផ្សេងទៀតនៅក្នុងប្រទេសជប៉ុន និងនៅក្រៅប្រទេស។

ធនាគារទាំងនេះនិយាយថា ប្រព័ន្ធទូទាត់ថ្មីនេះ ផ្ដោតជាចម្បងលើការទូទាត់ពាណិជ្ជកម្មទ្រង់ទ្រាយធំ ប៉ុន្តែអតិថិជនដែលជាអ្នកប្រើប្រាស់ទូទៅក៏ប្រហែលជាអាចប្រើប្រាស់ប្រព័ន្ធថ្មីនេះបានផងដែរ នៅថ្ងៃអនាគត។ បច្ចុប្បន្ន ការទូទាត់ជាអន្តរជាតិ តាមរយៈប្រព័ន្ធទូទាត់អន្តរជាតិ SWIFT ត្រូវឆ្លងកាត់ធនាគារអន្តរការី ឬធនាគារទំនាក់ទំនងរបស់ធនាគារអ្នកទទួលប្រាក់ជាច្រើន ដែលបង្កជាភាពស្មុគស្មាញ និងចំណាយពេលយូរ។

ដោយឡែក ការទូទាត់ពាណិជ្ជកម្មអន្តរជាតិ តាមរយៈប្រព័ន្ធទូទាត់ថ្មីដែលជប៉ុន កំពុងអភិវឌ្ឍន៍នេះនឹងប្រើពេលឆាប់រហ័ស ពោលគឺមិនដល់១ម៉ោងនោះទេ ប្រសិនបើអ្វីៗដំណើរការទៅដោយរលូន។ ទោះជាយ៉ាងណា ការទួទាត់តាមប្រព័ន្ធនេះអាចនឹងត្រូវការពេលយូររហូតដល់ទៅ១ខែឯណោះ ប្រសិនបើប្រតិបត្តិការខ្វះព័ត៌មានចាំបាច់សម្រាប់ការពិនិត្យផ្ទៀងផ្ទាត់ប្រឆាំងនឹងការលាងលុយកខ្វក់។

ប្រព័ន្ធថ្មីនេះនឹងប្រើប្រាស់រូបិយប័ណ្ណឌីជីថល Stablecoin ដែលភ្ជាប់ទៅនឹងរូបិយប័ណ្ណខុសៗគ្នា ដោយផ្ញើចេញដោយផ្ទាល់រវាងធនាគារ និងធនាគារតាមរយៈបណ្ដាញទូទាត់អន្តរជាតិ SWIFT ដែលធ្វើឱ្យប្រតិបត្តិការទូទាត់បែបនេះបញ្ចប់ដោយជោគជ័យយ៉ាងឆាប់រហ័សបំផុត។

ជាមួយនឹងការប្រើប្រាស់ប្រព័ន្ធ SWIFT ធនាគារនានានឹងមិនចាំបាច់វិនិយោគលើប្រព័ន្ធថ្មីទាំងស្រុងនោះទេ ហើយបណ្ដាក្រុមហ៊ុននឹងអាចស្នើសុំឱ្យធនាគារនានាជួយដំណើរការប្រតិបត្តិការទូទាត់របស់ខ្លួនតាមរយៈដំណើរការធម្មតារបស់ធនាគារទាំងនោះ៕

​ ដោយ: តែម សុខុម