![វិស័យពាណិជ្ជកម្ម](https://cdn.cambonomist.com/media/images/tmktlp12hhsaadddgg.2e16d0ba.fill-960x540.jpg)
បើតាមការគូសបញ្ជាក់របស់ធនាគារជាតិនៃកម្ពុជា គិតត្រឹមឆមាសទី១ឆ្នាំ២០២៤ នេះ កម្ពុជាមានទុនបម្រុងអន្តរជាតិ ប្រមាណ២០ពាន់លានដុល្លារអាម៉េរិក ធ្លាក់ចុះប្រមាណ០,១% បើធៀបនឹងរយៈពេលដូចកាលពីឆ្នាំមុន តែចំនួននេះប្រហាក់ប្រហែលនឹងចុងឆ្នាំ២០២៣។ តាមរយៈទុនបម្រុងនេះសបញ្ចាក់ថា កម្ពុជានៅតែអាចរក្សាបានទុនបម្រុងអន្តរជាតិ ក្នុងកម្រិតមួយខ្ពស់ បើទោះបីជាកម្ពុជាប្រឈមនឹងភាពមិនប្រាកដប្រជាខ្ពស់នៃស្ថានភាពហិរញ្ញវត្ថុ និងសេដ្ឋកិច្ចអន្តរជាតិ ក៏ដោយ។
បើតាមធនាគារជាតិនៃកម្ពុជា ការថយចុះទុនបម្រុងរបស់កម្ពុជានេះ គឺបណ្តាលមកពីកត្តាមួយចំនួនដូចជា ការថយចុះនៃប្រាក់បញ្ញើរបស់រាជរដ្ឋាភិបាល ការថយចុះនៃប្រាក់បម្រុងកាតព្វកិច្ច និងការរងសម្ពាធពីការប្រែប្រួលស្ថានភាពទីផ្សារហិរញ្ញវត្ថុអន្តរជាតិ ដែលបណ្តាលមកពីការកើនឡើងនៃអត្រាចំណូលសញ្ញាប័ណ្ណ វិនិយោគដែលរងឥទ្ធិពលពីភាពមិនប្រាកដប្រជាពីការកាត់បន្ថយអត្រាការប្រាក់គោលរបស់បណ្តាធនាគារកណ្តាលធំៗ ជាពិសេសធនាគារកណ្ដាលអាម៉េរិក និងធនាគារកណ្តាលអឺរ៉ុប។
ទុនបម្រុងអន្តរជាតិចំនួន២០ពាន់លានដុល្លារនេះ គឺមានកម្រិតខ្ពស់គ្រប់គ្រាន់ដែលស្មើនឹង៧ខែ នៃការនាំចូលទំនិញ និងសេវានៅគ្រាបន្ទាប់ ដែលខ្ពស់ជាងកម្រិតអប្បបរមា៣ខែ សម្រាប់ប្រទេសកំពុងអភិវឌ្ឍន៍ ដែលត្រូវបានចាត់ទុកថាខ្ពស់គ្រប់គ្រាន់ក្នុងការរួមចំណែករក្សាជំនឿទុកចិត្តរបស់វិនិយោគិន និងសាធារណជនមកលើស្ថិរភាពសេដ្ឋកិច្ចកម្ពុជា ដែលជាមូលដ្ឋានចាំបាច់មួយ ក្នុងការបង្កើនប្រសិទ្ធភាពនៃការអនុវត្តនយោបាយរូបិយវត្ថុនិងអត្រាប្តូរប្រាក់។
យ៉ាងណាមិញ បើតាមការអះអាងរបស់ធនាគារជាតិ ការវិនិយោគទុនបម្រុងអន្តរជាតិ ត្រូវបានអនុវត្តដោយប្រុងប្រយ័ត្ន និងមានភាពបត់បែនខ្ពស់។ ហើយហានិភ័យនៃការវិនិយោគត្រូវបានគ្រប់គ្រង និងតាមដានយ៉ាងហ្មត់ចត់ ដោយគោរពតាមសេចក្ដីណែនាំការវិនិយោគរបស់ធនាគារជាតិនៃកម្ពុជា សំដៅធានាឱ្យបាននូវការគ្រប់គ្រងទុនបម្រុងអន្តរជាតិ ប្រកបដោយសុវត្ថិភាព សន្ទនីយភាព និងទទួលបានចំណូលសមស្រប។
គួរបញ្ជាក់ថា ការវិនិយោគលើសញ្ញាបណ្ណបៃតង និងសញ្ញាបណ្ណដែលពាក់ព័ន្ធនឹងបរិស្ថាន សង្គម និងអភិបាលកិច្ច ត្រូវបានជំរុញ និងបន្តយកចិត្តទុកដាក់ក្នុងគោលដៅចូលរួមចំណែកលើកកម្ពស់ការអនុវត្តតាមគោលនយោបាយវិនិយោគប្រកបដោយការទទួលខុសត្រូវ ដើម្បីរក្សាបានចីរភាព សុវត្ថិភាពការវិនិយោគទុនបម្រុង និងស្របតាមនិន្នាការនៃការវិនិយោគសកល៕