ហេតុអ្វីប្លុកប្រទេស BRICS មានផែនការបង្កើតទីភ្នាក់ងារវាយតម្លៃឥណទានអន្តរជាតិដូចគ្នាទៅនឹងទីភ្នាក់ងារវាយតម្លៃឥណទានរបស់អាម៉េរិក?

សហរដ្ឋអាម៉េរិកមានទីភ្នាក់ងារវាយតម្លៃឥណទានអន្តរជាតិ(Credit Rating Agency) ជាច្រើនដែលវាយតម្លៃក្រុមហ៊ុន និងប្រទេសនានាលើបញ្ហាសុខភាពហិរញ្ញវត្ថុ និងសមត្ថភាពទូទាត់សងត្រលប់របស់ពួកគេ ហើយទីភ្នាក់ងារវាយតម្លៃឥណទានកំពូលទាំង៣របស់សហរដ្ឋអាម៉េរិក រួមមានទីភ្នាក់ងារ មូឌី (Moody's) ទីភ្នាក់ងារ ស្ទែនដាត អ៊ែន ភួ (Standard and Poor's (S&P)) និងទីភ្នាក់ងារ ហ្វីច គ្រុប (Fitch Group)។ ទីភ្នាក់ងារវាយតម្លៃឥណទានអន្តរជាតិរបស់សហរដ្ឋអាម៉េរិក មានឥទ្ធិពលគ្របដណ្ដប់​លើទីផ្សារពិភពលោក ហើយមានសមត្ថភាពអាចជួយសម្រេច ឬបំផ្លាញក្ដីរំពឹងក្នុងអាជីវកម្មរបស់ក្រុមហ៊ុននានាបានតាមរយៈរបាយការណ៍វាយតម្លៃឥណទានរបស់ទីភ្នាក់ងារទាំងនោះ។

ទោះជាយ៉ាងណា ពេលនេះប្លុកប្រទេស BRICS មានផែនការបញ្ចប់ឥទ្ធិពលរបស់ទីភ្នាក់ងារវាយតម្លៃឥណទានអន្តរជាតិនានារបស់សហរដ្ឋអាម៉េរិក តាមយៈការបង្កើតតីភ្នាក់ងារវាយតម្លៃឥណទានអន្តរជាតិផ្ទាល់ខ្លួន។

ប្លុកប្រទេស BRICS ធ្លាប់បានទទួលរងផលប៉ះពាល់ដោយសារទីភ្នាក់ងារវាយតម្លៃឥណទានអន្តរជាតិរបស់សហរដ្ឋអាម៉េរិក ដែលកន្លងមកតែងតែឈ្លេចបង្ហាញតែចំណុចអវិជ្ជមានរបស់ពួកគេ និងមិនដែលអើពើនឹងចំណុចវិជ្ជមានរបស់ពួកគេឡើយ។

ដោយសារតែបែបនេះហើយទើបប្លុកប្រទេស BRICS គ្រោងចាប់ផ្តើមបង្កើតទីភ្នាក់ងារវាយតម្លៃឥណទានអន្តរជាតិរបស់ខ្លួន ដើម្បីទប់ទល់នឹងសណ្ដាប់ធ្នាប់ហិរញ្ញវត្ថុពិភពលោក ដែលគ្រប់គ្រងដោយសហរដ្ឋអាម៉េរិក។ ចំណាត់ការនេះនឹងដាក់ឱ្យប្លុកប្រទេស BRICS ទទួលបន្ទុក និងជាអ្នកសម្រេចចិត្តលើការវាយតម្លៃឥណទានរបស់ក្រុមហ៊ុនមួយដោយមិនចាំបាច់ពឹងផ្អែកលើសហរដ្ឋអាម៉េរិក។

ទេសាភិបាលធនាគារកណ្តាលរុស្ស៊ី លោកស្រី អែលវីរ៉ា ណាប៊ីលលីណា (Elvira Nabiullina) បានលើកឡើងថា វិមានក្រឹមឡាំង នឹងស្នើគំនិតផ្តួចផ្តើមសំខាន់ៗ ដែលផ្តល់ផលប្រយោជន៍ដល់ប្លុកប្រទេស BRICS ក្នុងរយៈពេលវែង។ លោកស្រីបានបញ្ជាក់ថា គំនិតផ្តួចផ្តើមដ៏សំខាន់មួយក្នុងចំណោមនោះ គឺការបង្កើតទីភ្នាក់ងារវាយតម្លៃឥណទានអន្តរជាតិថ្មីសន្លាងសម្រាប់ប្លុកប្រទេស BRICS ផ្ទាល់ខ្លួន។

ទេសាភិបាលរូបនេះបានសង្កត់ធ្ងន់ថា ទីភ្នាក់ងារវាយតម្លៃឥណទានអន្តរជាតិរបស់ប្លុកប្រទេស BRICS នឹងក្លាយជាទីភ្នាក់ងារវាយតម្លៃឥណទានអន្តរជាតិដ៏កំពូល ហើយនឹងមានវិសាលភាពគ្របដណ្តប់គ្រប់ប្រទេសទាំងអស់ទូទាំងពិភពលោក៕

ដោយ: តែម សុខុម