ចិន ស៊ើបអង្កេតលើឧត្តមសេនីយ៍កំពូលម្នាក់ ក្រោយសង្ស័យទម្លាយអាថ៌កំបាំងនុយក្លេអ៊ែឱ្យសហរដ្ឋអាម៉េរិក

​របាយការណ៍ស៊ើបអង្កេតមួយ ដែលចេញផ្សាយកាលពីថ្ងៃអាទិត្យ ទី២៥ មករា បានបង្ហាញថា លោក ចាង យូសៀ (Zhang Youxia) ឧត្តមសេនីយ៍លំដាប់កំពូលម្នាក់របស់ចិន មិនត្រឹមតែរងការចោទប្រកាន់ពីបទលក់អាថ៌កំបាំងជាតិ ប៉ុណ្ណោះទេ ប៉ុន្តែបុរសវ័យ៧៥ឆ្នាំរូបនេះ ក៏ជាប់សង្ស័យពីបទទទួលសំណូកជាថ្នូរនឹងការដំឡើងឋានៈមន្ត្រីម្នាក់ឱ្យកាន់តំណែងជារដ្ឋមន្ត្រីក្រសួងការពារជាតិ ផងដែរ។ យោងតាមទីភ្នាក់ងារព័ត៌មាន Bloomberg ការស៊ើបអង្កេតនេះបានបង្ហាញលម្អិតថា លោក ចាង បានទម្លាយទិន្នន័យបច្ចេកទេសស្នូល នៃគ្រាប់បែកនុយក្លេអ៊ែ​ទៅឱ្យអាម៉េរិក និងបានប្រើប្រាស់អំណាចខុសច្បាប់ ដើម្បីបង្កើតបក្សពួកក្នុងជួរយោធា ព្រមទាំងប្រព្រឹត្តអំពើពុករលួយក្នុងការផ្គត់ផ្គង់សម្ភារៈសឹក។

ការចោទប្រកាន់ និងការបើកការស៊ើបអង្កេតលើលោក ចាង យូសៀ សមាជិកការិយាល័យនយោបាយ និងធ្លាប់ជាសម្ពន្ធមិត្តដ៏ជិតស្និទ្ធរបស់ប្រធានាធិបតី ស៊ី ជីនពីង នេះ បានបង្ហាញ​ពីការរុះរើក្បាលម៉ាស៊ីដឹកនាំ និងធ្វើឱ្យមានការរង្គោះរង្គើយ៉ាងខ្លាំងនៅវិស័យយោធារបស់ចិន។ ទន្ទឹមនឹងនេះ កាលពីថ្ងៃ​​ទី២៤ ខែមករា ក៏មានសេចក្តីថ្លែងការណ៍ថា លោក លីវ ជិនលី (Liu Zhenli) សមាជិកនៃគណៈកម្មការយោធាមជ្ឈិម ក៏កំពុងស្ថិតក្រោមការស៊ើបអង្កេតពីបទរំលោភវិន័យ និងច្បាប់យ៉ាងធ្ងន់ធ្ងរផងដែរ។

ជុំវិញការរុះរើក្បាលម៉ាស៊ីនថ្នាក់ដឹកនាំក្នុងវិស័យយោធារបស់ចិននេះដែរ រដ្ឋមន្ត្រីក្រសួងការពារជាតិ តៃវ៉ាន់ លោក វេលលីងតុន គូ (Wellington Koo) បានបញ្ជាក់នៅថ្ងៃ​​ទី២៦ ដើមសប្តាហ៍នេះថា តៃវ៉ាន់ កំពុងតាមដានយ៉ាងដិតដល់ចំពោះការផ្លាស់ប្តូរមិនប្រក្រតីក្នុងជួរថ្នាក់ដឹកនាំយោធាកំពូលរបស់ទីក្រុងប៉េកាំងនេះ។ លោកបានសង្កត់ធ្ងន់ថា ទោះបីជាមានការរុះរើផ្ទៃក្នុងយ៉ាងណាក៏ដោយ ក៏តៃវ៉ាន់មិនត្រូវធ្វេសប្រហែសឡើយ ព្រោះចិន មិនដែលបោះបង់មហិច្ឆតាក្នុងការប្រើប្រាស់កម្លាំងយោធាប្រឆាំងនឹងកោះតៃវ៉ាន់នោះទេ៕

អត្ថបទៈ សួន ឡង់ទី​